આ પણ વાંચો ટ્રેન્ડિંગ સમાચાર
મુંબઈ : ઈરાનમાં તખ્તા પલ્ટો લાવવાની જીદમાં ઈઝરાયેલ-અમેરિકાના ઈરાન પર થોંપવામાં આવેલા યુદ્વની આગમાં ચાર દિવસથી મિડલ-ઈસ્ટના દેશો પર હોમાતાં અને ઈરાનની આક્રમકતાંએ વિશ્વને ઓઈલ પુરવઠો સપ્લાય થતી સ્ટ્રેઈટ ઓફ હોર્મુઝ બંધ કરતાં વિશ્વમાં ઓઈલ કટોકટી સર્જાવાના અને અનેક દેશોના અર્થતંત્ર ડામાડોળ બનવાના એંધાણે આજે વૈશ્વિક બજારો ધરાશાયી થયા હતા. ઈરાન દ્વારા મિડલ-ઈસ્ટ, ગલ્ફના અમેરિકાને સપોર્ટ કરતાં દેશોમાં સ્થિત અમેરિકી મથકોને નિશાન બનાવાતા અને એની સાથે કત્તાર, ઈરાક, બહેરીન સહિતમાં ઓઈલ ઉત્પાદન મથકો પર પણ થયેલા મિસાઈલ-ડ્રોન હુમલાથી વિશ્વની ક્રુડ ઓઈલ, એલએનજી સહિતની સપ્લાય અટકવાના સ્પષ્ટ એંધાણે વૈશ્વિક ક્રુડ ઓઈલના ભાવો વધુ ઉછળતાં વૈશ્વિક બજારો પર માઠી અસર જોવાઈ હતી. ભારતીય શેર બજારો બોમ્બે સ્ટોક એક્સચેન્જ-બીએસઈ, નેશનલ સ્ટોક એક્સચેન્જ-એનએસઈ આજે-મંગળવારે હોળીના તહેવાર નિમિતે બંધ રહ્યા હતા. વૈશ્વિક ક્રુડ ઓઈલના ભાવમાં વધુ ૮થી ૯ ટકાનો ભડકો જોવાયો હતો. અમેરિકી શેર બજારોમાં સાંજે ફયુચર્સમાં ડાઉ જોન્સમાં ૮૫૦ પોઈન્ટનો કડાકો, નાસ્દાકમાં ૫૨૫ પોઈન્ટ નો કડાકો બતાવાતો હતો.
ગિફ્ટ નિફટીમાં ૭૦૦ પોઈન્ટનો કડાકો : ૨૪૨૨૬ સુધી ખાબકી સાંજે ૨૪૪૪૦ નજીક
ઈરાન-ઈઝરાયેલ-અમેરિકા યુદ્વની જવાળા અનેક દેશોમાં ફેલાતાં આ યુદ્વ કેટલું લાંબું ચાલશે એની અનિશ્ચિતતાને લઈ ભારતીય બજારોમાં આવતીકાલે-બુધવારે બજારોમાં મોટા ગાબડાં પડવાના સંકેત મળ્યા હતા. ભારતીય શેર બજારોમાં નિફટી ૫૦ ઈન્ડેક્સ માટે સાંકેતિક ગિફ્ટ નિફટી ઈન્ડેક્સમાં સાંજે એક તબક્કે ૭૦૦ પોઈન્ટથી વધુ કડાકો બોલાયા બાદ મોડી સાંજે ૫૫૦ પોઈન્ટનો ઘટાડો બતાવાતો હતો. ગિફ્ટ નિફટી નીચામાં ૨૪૨૨૬ સુધી આવી સાંજે પાંચ વાગ્યે ૨૪૪૪૦ નજીક ટ્રેડ થઈ રહ્યો હતો.
એશીયાના બજારોમાં કડાકો : નિક્કી ૧૭૭૮, કોસ્પી ૪૫૦ પોઈન્ટ, હેંગસેંગ ૨૯૨ તૂટયા
વિશ્વને ઓઈલ-ગેસનો પુરવઠો મોટાપાયે અટકવાની આશંકાએ વૈશ્વિક મોટી મંદી સર્જાવાના અને ખાસ એશીયાના ક્રુડ ઓઈલની આયાત પર નિર્ભર દેશોની આયાત-નિકાસો અટકી પડવાના એંધાણે આજે એશીયા-પેસેફિક દેશોના બજારોમાં કડાકો બોલાઈ ગયો હતો. જાપાનના ટોક્યો શેર બજારને નિક્કી ૨૨૫ ઈન્ડેક્સ આજે ૩.૦૬ ટકા એટલે કે ૧૭૭૮.૧૯ પોઈન્ટ તૂટીને ૫૬૨૭૯.૦૫, હોંગકોંગનો હેંગસેંગ ૨૯૧.૭૭ પોઈન્ટ એટલે કે સ૧.૧૨ ટકા તૂટીને ૨૫૭૬૮.૦૮ રહ્યા હતા. જ્યારે ચાઈનાના શાંઘાઈ શેર બજારનો સીએસઆઈ ૩૦૦ ઈન્ડેક્સ ૭૨.૭૭ પોઈન્ટ એટલે કે ૧.૫૪ ટકા તૂટીને ૪૬૫૫.૯૦, દક્ષિણ કોરિયાનો કોસ્પી ઈન્ડેક્સ ૭.૨૪ ટકા એટલે કે ૪૫૨.૨૨ પોઈન્ટ તૂટીને ૫૭૯૧.૯૧, તાઈવાનનો તાઈ ૨.૨૦ ટકા એટલે કે ૭૭૧.૪૪ પોઈન્ટ તૂટીને ૩૪૩૨૩.૬૫ બતાવાતા હતા.
લંડનનો ફુત્સી ૨૯૨, જર્મનીનો ડેક્ષ ૯૫૦ પોઈન્ટતૂટયા
યુરોપના દેશોના બજારોમાં પણ સાંજે ચાલુ બજારે સાર્વત્રિક ધબડકો બોલાયો હતો. લંડન શેર બજારનો ફુત્સી ૧૦૦ ઈન્ડેક્સ ૨૯૨ પોઈન્ટનો કડાકો, જર્મનીનો ડેક્ષ૯૫૦ પોઈન્ટનું ગાબડું, ફ્રાંસનો કેક ૪૦ ઈન્ડેક્સ ૨૬૦ પોઈન્ટનો કડાકો બતાવતા હતા. વિશ્વ બજારમાં ક્રુડ ઓઈલની આગની જવાળા સતત ભભૂકતી રહી આજે સાંજે આંતરરાષ્ટ્રીય ક્રુડ ઓઈલના ભાવ બ્રેન્ટ ક્રુડના બેરલ દીઠ ૮.૩૪ ટકા એટલે કે ૬.૫૦ ડોલર ઉછળીને ૮૪.૨૦ ડોલર, નાયમેક્ષ-ન્યુયોર્ક ક્રુડ બેરલ દીઠ ૭.૮૯ ટકા એટલે કે ૫.૬૫ ડોલર ઉછલીને ૭૬.૮૫ ડોલર નજીક બોલાતા હતા.
મોડી સાંજે અમેરિકી શેર બજારોમાં ડાઉ જોન્સ ૮૫૦, નાસ્દાકમાં ૫૨૫ પોઈન્ટનું ગાબડું
ઈરાન સાથે ઈઝરાયેલ, અમેરિકાનું યુદ્વ અંદાજથી વધુ ભયાનક બનવાના અને અપેક્ષાથી લાંબુ ચાલવાના અને અમેરિકાની પણ મોટી ખુવારી થવાના અંદાજો સાથે વૈશ્વિક અર્થતંત્રની સાથે અમેરિકી અર્થતંત્રની હાલત વધુ કફોડી બનવાના એંધાણે આજે અમેરિકી શેર બજારોમાં ફયુચર્સમાં ગાબડાં પડયા હતા. ન્યુયોર્ક શેર બજારનો ડાઉ જોન્સ સાંજે ૮૩૩ ુપોઈન્ટનો કડાકો અને નાસ્દાક શેર બજારનો નાસ્દાક ૧૦૦ મીનિ ઈન્ડેક્સ ફયુચર્સમાં ૫૨૫ પોઈન્ટનો કડાકો બતાવતા હતા.
