આ પણ વાંચો ટ્રેન્ડિંગ સમાચાર
મુંબઈ : દેશમાં વાહનોના રિટેલ વેચાણની દ્રષ્ટિએ વર્તમાન વર્ષનો ફેબુ્રઆરી મહિનો એકદમ પ્રોત્સાહક રહ્યો છે. ગુડસ એન્ડ સર્વિસીઝ ટેકસ (જીએસટી)માં કપાતના લાભો તથા લગ્નસરાની મોસમને કારણે ગયા મહિનામાં વાહનોના રિટેલ વેચાણમાં વાર્ષિક ધોરણે ૨૫ ટકા જેટલી જોરદાર વૃદ્ધિ જોવા મળી છે. જો કે જાન્યુઆરીની સરખામણીએ વેચાણમાં ૧૧.૫૦ ટકા ઘટાડો જોવા મળ્યો છે. વર્તમાન નાણાં વર્ષના પ્રથમ ૧૧ મહિનામાં વાહનોના એકંદર વેચાણમાં ૧૨.૧૩ ટકા વધારો થયો છે.
ટુ વ્હીલર્સ તથા ઊતારુ વાહનો માટે મજબૂત માગને પરિણામે વાહનોનું એકંદર રિટેલ વેચાણ ફેબુ્રઆરીમાં વાર્ષિક ધોરણે ૨૫.૬૦ ટકા વધી ૨૪.૦૯ લાખ વાહનો રહ્યું છે એમ ફેડરેશન ઓફ ઓટોમોબાઈલ ડીલર્સ એસોસિએશન્સ (ફાડા)ના સુત્રોએ જણાવ્યું હતું.
ભારતના ઓટો રિટેલ ક્ષેત્ર માટે ફેબુ્રઆરી સિદ્ધિરૂપ મહિનો રહ્યો છે. વર્તમાન માર્ચમાં રિટેલ વેચાણ બાબતે ડીલરો જોરદાર આશાવાદ ધરાવી રહ્યા છે. ફાડાએ મેળવેલા અંદાજમાં ૭૫.૫૦ ટકા ડીલરો માર્ચમાં વેચાણમાં વૃદ્ધિ જળવાઈ રહેવાની અપેક્ષા રાખી રહ્યા છે, જ્યારે ૧૯.૯૦ ટકા ડીલરો વેચાણમાં સ્થિરતા રહેવા જ્યારે ૪.૬૦ ટકા ઘટાડો થવાની શકયતા જોઈ રહ્યા છે.
ટુ વ્હીલર્સનું વેચાણ વાર્ષિક ધોરણે ૨૫.૦૨ ટકા વધી ૧૭,૦૦,૫૦૫ એકમ (ટુ વ્હીલર્સ) રહ્યું છે. ટુ વ્હીલર્સમાં શહેરી વિસ્તારમાં ૨૮.૯૬ ટકા જ્યારે ગ્રામ વિસ્તારમાં ૨૨.૧૬ ટકા વધારો જોવા મળ્યો છે.
થ્રી વ્હીલર્સનું વેચાણ ફેબુ્રઆરીમાં ૨૪.૩૯ ટકા વધી ૧,૧૭,૧૩૦ રહ્યું છે જ્યારે ઊતારૂ વાહનોનું વેચાણ ૨૬.૧૨ ટકા વધી૩,૯૪,૭૬૮ રહ્યું છે. કમર્સિઅલ વાહનોનું વેચાણ ૨૮.૯૦ ટકા વધવા પામ્યું છે. વ્યક્તિગત વપરાશ તથા કમર્સિઅલ પ્રવૃત્તિ માટે વાહનોની માગ ઊંચી રહી હોવાનું જોવા મળી રહ્યું છે.
જીએસટીમાં ઘટાડાને કારણે વાહનોના રિટેલ વેચાણમાં માગમાં સ્થિરતા જોવા મળી રહી છે.વાહનોની શ્રેણીમાં સૌથી વધુ વેચાણ વૃદ્ધિ ટ્રેકટર્સમાં જોવા મળી છે. ટ્રેકટર્સનું વેચાણ ગત મહિને ૩૬.૩૫ ટકા વધી ૮૯૪૧૮ રહ્યું છે. ૨૦૨૫માં દેશમાં ચોમાસુ સારુ રહેતા ટ્રેકટર્સની માગમાં વધારો જોવા મળ્યો હોવાનું પણ સુત્રોએ ઉમેર્યું હતું.
જાન્યુઆરીમાં વાહનોનું એકંદર વેચાણ ૨૭,૨૨,૫૫૮ એકમ રહ્યું છે જેની સરખામણીએ ફેબુ્રઆરીનું વેચાણ ૧૧.૫૦ ટકા નીચું છે. વાહનોના વેચાણમાં વધારો થતાં ડીલરો પાસે ઊતારૂ વાહનોની ઈન્વેન્ટરી વધુ ઘટી ૨૭-૨૯ દિવસ જેટલી આવી ગઈ છે, જે ઓટો ઉદ્યોગ માટે સ્થિતિ મજબૂત હોવાના સંકેત આપે છે.
