મુંબઈ : ૬ માર્ચના સમાપ્ત થયેલા સપ્તાહમાં દેશના ફોરેકસ રિઝર્વમાં એક વર્ષનો સૌથી મોટો ઘટાડો જોવા મળ્યો છે. ફોરેકસ રિઝર્વમાં એકજ સપ્તાહમાં ૧૧.૬૮ અબજ ડોલરનો ઘટાડો થઈ ૭૧૬.૮૧ અબજ ડોલર પર આવી ગયું છે. યુદ્ધની સ્થિતિમાં ડોલર સામે રૂપિયાની નવી નીચી સપાટીને ધ્યાનમાં રાખી રિઝર્વ બેન્ક ઓફ ઈન્ડિયા દ્વારા ફોરેકસ બજારમાં કરાયેલી દરમિયાનગીરીને પરિણામે જંગી ઘટાડો જોવા મળ્યો છે.
યુદ્ધને કારણે છેલ્લા દસ દિવસથી રૂપિયા પર સતત દબાણ વધી રહ્યું છે. ૬ માર્ચના સપ્તાહમાં થયેલો ઘટાડો એક વર્ષનો સૌથી મોટો ઘટાડો હોવાનું રિઝર્વ બેન્કના સુત્રોએ જણાવ્યું હતું.
રિઝર્વ બેન્કની દરમિયાનગીરી ઉપરાંત ફોરેકસ રિઝર્વમાંની એસેટસના મૂલ્યાંકનમાં ફેરબદલને કારણે આ ઘટાડો જોવા મળ્યો હોવાનું એક એનાલિસ્ટે જણાવ્યું હતું.
સમીક્ષા હેઠળના સપ્તાહમાં રિઝર્વ બેન્ક દ્વારા ૬ અબજ થી વધુના મૂલ્યના ડોલરની વેચવાલી આવી પડી હતી. એસેટસના મૂલ્યમાં પણ ઘટાડો જોવાયો હતો. ગોલ્ડ રિઝર્વનું મૂલ્ય સદર સપ્તાહમાં ૧.૬૦ અબજ ડોલર ઘટયું હતું. ફોરેન કરન્સી એસેટસના મૂલ્યમાં ૯.૮૦ અબજ ડોલરનો ઘટાડો થયો હતો.
ફોરેન કરન્સી એસેટસ જે ડોલરના સ્વરૂપમાં દર્શાવવામાં આવે છે તેમાં રિઝર્વ બેન્ક દ્વારા ધરાવતી અન્ય દેશોની કરન્સીના મૂલ્યમાં થતી વધઘટની અસર પ્રતિબિંબિત થાય છે.
