આ પણ વાંચો ટ્રેન્ડિંગ સમાચાર
Ahmedabad News: અમદાવાદના રાણીપ વિસ્તારમાં રહેતી એક 17 વર્ષીય સગીરાએ પોતાની સાથે થયેલા શારીરિક શોષણ અને તેના આપત્તિજનક વીડિયોને સોશિયલ મીડિયા પર વાઈરલ કરવા બદલ એક સગીર બહેનપણી અને એક યુવક મિત્ર સામે ફરિયાદ નોંધાવી છે. રાણીપ પોલીસે આ મામલે POCSO (પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સ) એક્ટ હેઠળ ગુનો નોંધી વધુ તપાસ હાથ ધરી છે.
સોશિયલ મીડિયાથી મિત્રતા
આ ઘટનાની શરૂઆત એક વર્ષ પહેલા થઈ હતી જ્યારે ભોગ બનનાર સગીરાની મુલાકાત ઇન્સ્ટાગ્રામ દ્વારા કલોલની એક 14 વર્ષની એક સગીરા સાથે થઈ હતી. એક વર્ષ સતત સોશિયલ મીડિયા પર વાતચીત કર્યા બાદ બંને સગીરાઓ વચ્ચે મિત્રતાના સંબંધ કેળવાયા હતા.
માઉન્ટ આબુ જવાનો પ્લાન
જે બાદ ગત 30 ડિસેમ્બર 2025ના રોજ, આ બહેનપણીએ સગીરાને નવા વર્ષની ઉજવણી કરવા માટે માઉન્ટ આબુના પ્રવાસનું આમંત્રણ આપ્યું હતું. સગીરા તેના ઘરેથી નીકળીને અમદાવાદના ઝુંડાલ સર્કલ પાસે તેની સગીર બહેનપણી અને એક અન્ય 22 વર્ષીય યુવકને મળી હતી, જ્યાંથી તેઓ ટ્રેન દ્વારા માઉન્ટ આબુ જવા રવાના થયા હતા.
સોફ્ટ ડ્રિંક પીધા બાદ સગીરા સાથે દુષ્કર્મ
31 ડિસેમ્બરના રોજ માઉન્ટ આબુ પહોંચ્યા બાદ તમામ મિત્રોએ એક હોટલમાં રોકાણ કર્યું હતું. બપોરના સમયે બંને આરોપીઓ સગીરાને એક અલગ રૂમમાં લઈ ગયા હતા, જ્યાં તેઓ દારૂનું સેવન કરી રહ્યા હતા. સગીરાનો આરોપ છે કે તેને સોફ્ટ ડ્રિંક પીવા આપવામાં આવ્યું હતું, જેના કારણે તે ચક્કર ખાઈને બેભાન થઈ ગઈ હતી. જ્યારે પીડિત સગીરા ભાનમાં આવી ત્યારે તેને શારીરિક છેડછાડ(દુષ્કર્મ) થઈ હોવાની શંકા ગઈ હતી, પરંતુ તે સમયે કોઈ સ્પષ્ટ જવાબ ન મળતા તે નારાજ થઈ એકલી અમદાવાદ પરત ફરી હતી.
વીડિયો વાઈરલ થયા બાદ નોંધાઈ ફરિયાદ
આ ગંભીર ઘટનાનો ખુલાસો ત્યારે થયો જ્યારે 11 માર્ચના રોજ સગીરાના એક પરિચિતે તેને ઇન્સ્ટાગ્રામ પર જાણ કરી કે તેનો એક અશ્લીલ વીડિયો સોશિયલ મીડિયા પર વાઈરલ થયો છે. વીડિયો જોતા જાણવા મળ્યું કે જ્યારે સગીરા બેભાન હતી, ત્યારે આરોપી યુવકે તેની સાથે દુષ્કર્મ આચર્યું હતું અને તેની બહેનપણીએ આ કૃત્યનો વીડિયો ઉતારી લીધો હતો, આ ઉપરાંત 14 વર્ષીય સગીરાએ સાથી પીડિતાના અંગત ભાગો પર હાથ ફેરવતી હોવાનો પણ વીડિયો બનાવ્યો હતો. જે બાદ તેને વાઈરલ કર્યો હતો.
આ પણ વાંચો: ધનાસુથારની પોળમાં સ્થાનિક લોકોએ કંટાળીને દારૂ પીતા લોકોને પકડયા
યુવકની ધરપકડ, આરોપી સગીરા નજરકેદ
આ ફરિયાદને આધારે રાણીપ પોલીસે આરોપીઓ વિરુદ્ધ ભારતીય ન્યાય સંહિતા (BNS), POCSO એક્ટ અને IT એક્ટની વિવિધ કલમો હેઠળ ગુનો દાખલ કર્યો છે. આ કેસમાં કલોલમાં રહેતા દિવ્યેશ પારેખની ધરપકડ કરવામાં આવી છે. જ્યારે 14 વર્ષની સગીરાને નજરકેદ કરવામાં આવી છે. પોલીસે આ મામલે કડક તપાસ શરૂ કરી છે.
