આ પણ વાંચો ટ્રેન્ડિંગ સમાચાર
Vadodara Road Accident: વડોદરાના ફાજલપુર ગામ નજીક નેશનલ હાઈવે નંબર 48 પર ગમખ્વાર અકસ્માત સર્જાયો હતો. પૂરપાટ ઝડપે આવતા એક ટ્રકચાલકે બાઈકને પાછળથી જોરદાર ટક્કર મારતા બાઈક પર સવાર ત્રણ પૈકી બે લોકોના ઘટના સ્થળે જ કમકમાટીભર્યા મોત નીપજ્યાં છે. અકસ્માત એટલો ભયાનક હતો કે મૃતકોના શરીરના અંગો હાઈવે પર વિખેરાઈ ગયા હતા.
ત્રણ સવારી બાઈકને ટ્રકે લીધું અડફેટે
મળતી માહિતી અનુસાર, અમદાવાદ-મુંબઈ નેશનલ હાઈવે પર ફાજલપુર ગામ પાસેથી એક બાઈક પર ત્રણ લોકો પસાર થઈ રહ્યા હતા. આ દરમિયાન પાછળથી બેફામ ગતિએ આવતા ટ્રકે બાઈકને જોરદાર ટક્કર મારી હતી. ટક્કર વાગતા જ બાઈક સવાર ત્રણેય રોડ પર પટકાયા હતા. જેમાં બે વ્યક્તિના શરીર પર ટ્રકના ટાયર ફરી વળતા તેમનું સ્થળ પર જ મોત થયું હતું, જ્યારે ત્રીજી વ્યક્તિના પગમાં ગંભીર ઈજાઓ પહોંચતા તે લોહીલુહાણ હાલતમાં કણસવા લાગ્યો હતો.
આ દુર્ઘટના બાદ હાઈવે પર લોકોના ટોળેટોળા એકત્ર થઈ ગયા હતા. સ્થળ પર હાજર એક મહિલાના હૈયાફાટ રુદનથી વાતાવરણ ગમગીન બની ગયું હતું. ઘટનાસ્થળ પર હાજર લોકોએ તાત્કાલિક એમ્બ્યુલન્સ અને નંદેસરી પોલીસને જાણ કરતા કાફલો ઘટનાસ્થળે દોડી આવ્યો હતો. ઈજાગ્રસ્ત યુવકને સારવાર અર્થે હોસ્પિટલ ખસેડવામાં આવ્યો છે, જ્યારે મૃતદેહોને પોસ્ટમોર્ટમ માટે મોકલી આપવામાં આવ્યા છે.
આ પણ વાંચો: વડોદરાના છાણી વિસ્તારમાં પૂરપાટ ઝડપે આવતી કારે બાઈક સવારને હવામાં ફંગોળ્યો, ઘટનાના CCTV વાઈરલ
નંદેસરી પોલીસે હાથ ધરી તપાસ
અકસ્માત સર્જીને ફરાર થયેલા ટ્રકચાલક વિરુદ્ધ નંદેસરી પોલીસે ગુનો નોંધી વધુ તપાસ હાથ ધરી છે. હાઈવે પર સર્જાયેલા આ અકસ્માતને કારણે થોડો સમય ટ્રાફિક જામના દ્રશ્યો પણ સર્જાયા હતા.
