આ પણ વાંચો ટ્રેન્ડિંગ સમાચાર
અમદાવાદ : ભારત વિશ્વની સૌથી ઝડપથી વૃદ્ધિ પામતી અર્થવ્યવસ્થા છે પરંતુ ભારતનું અર્થતંત્ર હજી પણ સર્વિસ સેક્ટર ઓરિયન્ટેડ ગણાય છે, ભારતનું મેન્યુફેકચરિંગ હજી પણ અન્ય દેશોની સરખામણીએ પાછળ છે. તાજેતરમાં જારી કરાયેલ એશિયા મેન્યુફેક્ચરિંગ ઇન્ડેક્સ (એએમઆઈ) ૨૦૨૬ મુજબ ભારત ૧૧ એશિયન દેશોમાં છઠ્ઠા સ્થાને પહોંચ્યું છે. આ સૂચકાંક દર્શાવે છે કે મજબૂત આર્થિક મૂળભૂત બાબતો હોવા છતાં, ભારત હજુ પણ ઘણા મોરચે તેના મુખ્ય એશિયન સ્પર્ધકોથી ઘણું પાછળ છે અર્થાત ભારતે એશિયન મેન્યુફેક્ચરિંગ રેસમાં તેની ગતિ ઝડપી બનાવવાની જરૃર પડશે.
હોંગકોંગ સ્થિત કન્સલ્ટિંગ ફર્મ ડેઝાન શિરા એન્ડ એસોસિએટ્સ દ્વારા સતત ત્રીજા વર્ષે બહાર પાડવામાં આવેલી આ યાદીમાં ચીને ફરી એકવાર ટોચનું સ્થાન જાળવી રાખ્યું છે. મલેશિયાએ મોટો અપસેટ સર્જ્યો છે અને તે વિયેતનામને પાછળ છોડીને બીજા સ્થાને આવી ગયું છે, જ્યારે વિયેતનામ ત્રીજા સ્થાને સરકી ગયું છે.
વિકસિત અર્થતંત્રોમાં, સિંગાપોર એક સ્થાન કૂદકો મારીને દક્ષિણ કોરિયાને પાછળ છોડીને ચોથા સ્થાને પહોંચી ગયું છે અને દક્ષિણ કોરિયા હવે પાંચમા ક્રમે છે. રિપોર્ટ અનુસાર, આ ફેરફારો એશિયન ક્ષેત્રમાં વધતી જતી ઉત્પાદન સ્પર્ધાત્મકતાને પ્રતિબિંબિત કરે છે.
ઇન્ડોનેશિયા ભારત પછી યાદીમાં સાતમા ક્રમે છે. થાઇલેન્ડ બે સ્થાન કૂદકો મારીને આઠમા સ્થાને પહોંચ્યું છે. જાપાન નવમા ક્રમે છે અને ફિલિપાઇન્સ દસમા ક્રમે છે, જ્યારે બાંગ્લાદેશ ૧૧ દેશોની યાદીમાં છેલ્લા ક્રમે છે.
એશિયા મેન્યુફેક્ચરિંગ ઇન્ડેક્સ ૪૩ પેટા-માપદંડો અને ૮ મુખ્ય સ્તંભો પર દેશોનું મૂલ્યાંકન કરે છેઃ અર્થતંત્ર, રાજકીય જોખમ, વ્યવસાયિક વાતાવરણ, આંતરરાષ્ટ્રીય વેપાર, ટેક્સ નીતિ, માળખાગત સુવિધા, કાર્યબળ અને ઈનોવેસન.
ટેક્સ પોલિસી, આંતરરાષ્ટ્રીય વેપાર અને રાજકીય જોખમની દ્રષ્ટિએ ભારત નવમા ક્રમે છે. ટેક્સ દરોની દ્રષ્ટિએ ભારત સૌથી નીચો સ્કોર ધરાવે છે. ટેક્સ પ્રોત્સાહનોમાં ભારત ચીન, ઇન્ડોનેશિયા, મલેશિયા, વિયેતનામ અને થાઇલેન્ડથી પણ પાછળ છે.
