રિમાન્ડ નહીં માગતા જેલ હવાલે : ઠગાઈના કરોડો રૂપિયા ક્યાં રોકવામાં આવ્યા તે હજુ સુધી પોલીસ જાણી શકી નહીં
ગાંધીનગર: ગાંધીનગર શહેરના સેક્ટર ૨૩માં રહેતા દંપતી દ્વારા ટેન્ડરના નામે વેપારીઓ પાસેથી કરોડો રૂપિયા ઉઘરાવી લેવામાં આવ્યા હતા ત્યારે આ કૌભાંડમાં આખરે ઠગ નિરવ દવેની પત્નીની ધરપકડ કરીને જેલમાં મોકલી આપવામાં આવી છે. જોકે કરોડોના કૌભાંડમાં રૂપિયા ક્યાં ગયા તે હજી સુધી પોલીસ જાણી શકી નથી.
ગાંધીનગરના સેક્ટર ૨૩માં પ્રાણકુંજ સોસાયટીમાં રહેતા અને ઓમ એન્ટરપ્રાઇઝ ચલાવતા નિવૃત નાયબ સચિવના પુત્ર નીરવ દવે અને તેની પત્ની મીરા દવેએ ગુજરાત ટુરિઝમ અને સુરત મ્યુનિસિપલ કોર્પોરેશનના કરોડો રૂપિયાના ટેન્ડર લાગ્યા હોવાના નકલી દસ્તાવેજ બનાવીને ગાંધીનગર ઉપરાંત રાજ્યના અલગ અલગ વિસ્તારના વેપારીઓ સાથે કરોડો રૂપિયાની છેતરપિંડી આચરી હતી. આ ઠગ દંપતીએ વડનગર, પાટણ, દ્વારકા, સુરત અને અમરેલીમાં ગુજરાત ટુરિઝમ અને સુરત મ્યુનિસિપલ કોર્પોરેશનના નામના સરકારી ટેન્ડર બતાવી કરોડોનું ફુલેકું ફેરવામાં આવતા અલગ અલગ ત્રણ ગુના ઇન્ફોસિટી પોલીસમા દાખલ થયા હતા અને તેના આધારે નિરવ દવેને પોલીસે ઝડપી લીધો હતો. તપાસ દરમિયાન પોલીસને જાણવા મળ્યું હતું કે, નીરવ દવેનો પુત્ર યજત દવે પણ કૌભાંડમાં સામેલ હતો તે ઓરિજિનલ ડોક્યુમેન્ટના આધારે ટેન્ડરના નકલી ડોક્યુમેન્ટ તૈયાર કરી આપતો હતો જ્યારે તેના પિતા મહેન્દ્ર દવે પણ સરકારમાંથી નાયબ સચિવ તરીકે નિવૃત્ત થયા હોવાથી ભોગ બનનારને કામ થઈ જશે તેવું આશ્વાસન આપતા હતા. જેથી તેમની પણ ધરપકડ કરવામાં આવી હતી ત્યારે આ સમગ્ર કૌભાંડમાં છેલ્લા પાંચ મહિનાથી ફરાર રહેલી મીરા દવે પણ ગઈકાલે પોલીસ સમક્ષ હાજર થઈ ગઈ હતી અને પોલીસે તેના રિમાન્ડ નહિ માગતા જ્યુડિશિયલ કસ્ટડીમાં મોકલી આપવામાં આવી છે રૂપિયા ક્યાં છે તે હજી સુધી શોધી શકી નથી.
