આ પણ વાંચો ટ્રેન્ડિંગ સમાચાર
અમદાવાદ : બેંકોએ ભારતીય રિઝર્વ બેંકને નેટ ઓપન ફોરેન એક્સચેન્જ (ફોરેક્સ) પર ૧૦૦ મિલિયન ડોલરની મર્યાદા નક્કી કરવાના તેના નિર્ણય પર પુનર્વિચાર કરવા વિનંતી કરી છે. સૂત્રો કહે છે કે બેંકોએ ચેતવણી આપી છે કે આ પગલાથી નોંધપાત્ર માર્ક-ટુ-માર્કેટ (MTM) નુકસાન થઈ શકે છે અને વેપારના ફરજિયાત સમાધાનની ફરજ પડી શકે છે.
જારી કરાયેલ આ માર્ગદર્શિકાનું પાલન ૧૦ એપ્રિલ સુધીમાં સુનિશ્ચિત કરવું આવશ્યક છે. આ નિર્દેશ એવા સમયે આવ્યો છે જ્યારે લાંબા ગાળાની ડોલર ખરીદીમાં વધારો થયો છે. બજારના અંદાજો સૂચવે છે કે ૪૦ ડોલર બિલિયન મૂલ્યની મોટી લાંબી ડોલર પોઝિશન નજીકના ભવિષ્યમાં બંધ થઈ જશે. બેંકોને આ પોઝિશન ઘટાડવા દબાણ કરીને, કેન્દ્રીય બેંક સ્થાનિક બજારમાં ડોલરના પુરવઠાને અસરકારક રીતે નિયંત્રિત કરી રહી છે.
ફેબુ્રઆરીના અંતમાં પશ્ચિમ એશિયાઈ કટોકટીની શરૂઆતથી રૂપિયો ૪ ટકાથી વધુ નબળો પડયો છે, જે આ કેલેન્ડર વર્ષમાં સૌથી ખરાબ પ્રદર્શન કરનાર એશિયન ચલણ બન્યું છે. નાણાકીય વર્ષ ૨૦૧૪ પછી તે તેના સૌથી તીવ્ર ઘટાડા તરફ આગળ વધી રહ્યું છે.
બેંકોએ પ્રસ્તાવ મૂક્યો છે કે સુધારેલી મર્યાદા ફક્ત વધેલા પોઝિશનના કિસ્સામાં જ લાગુ થવી જોઈએ, જે હાલના એક્સપોઝરને સુરક્ષિત કરશે અને બેલેન્સ શીટ પર ટૂંકા ગાળાના દબાણને સરભર કરશે. બજારના સહભાગીઓ પણ સંક્રમણ સમયગાળાની માંગ કરી રહ્યા છે.
નવી મર્યાદામાં પોઝિશનને સમાયોજિત કરવા માટે ત્રણ મહિનાનો સમયગાળો યોગ્ય માનવામાં આવે છે. જો કે, કેટલાક સહભાગીઓએ કહ્યું કે રિઝર્વ બેંકનું અચાનક પગલું લક્ષિત અને સંભવત: કામચલાઉ હસ્તક્ષેપ સૂચવે છે, જેના કારણે નજીકના ભવિષ્યમાં કોઈ પણ પ્રકારની રાહત થવાની શક્યતા ઓછી છે.
