આ પણ વાંચો ટ્રેન્ડિંગ સમાચાર
– નવા નાણાકીય વર્ષમાં પ્રજાના ખિસ્સામાં કાણાં!
– કોમર્શિયલ એલપીજી રૂ. 195 મોંઘો થયો, ભાવ રૂપિયા બે હજારને પાર, હોટેલ-રેસ્ટોરાંમાં ભોજનનું બિલ વધી શકે છે
નવી દિલ્હી : પશ્ચિમ એશિયામાં યુદ્ધની સ્થિતિ વચ્ચે ભારતમાં મોંઘવારીનો માર વધવા લાગ્યો છે. ઇરાન સામે ઇઝરાયેલ અને અમેરિકાના યુદ્ધને પગલે ક્રૂડ ઓઇલનો ભાવ વૈશ્વિક સ્તરે પ્રતિ બેરલ ૧૦૦ ડોલરને પાર પહોંચી ગયો છે. જેની સીધી અસર ભારત જોવા મળી છે. ૧ એપ્રીલથી દેશમાં નવુ નાણાકીય વર્ષ શરૂ થઇ ગયું છે જે સાથે જ મોંઘવારીની ગતિ પણ વધી છે. ૧ એપ્રીલથી શેલ ઇન્ડિયા કંપનીએ પોતાના પંપો પર પેટ્રોલ અને ડીઝલના ભાવમાં મોટો વધારો કર્યો છે. આ પહેલા નાયરા એનર્જી કંપની પણ ભાવ વધારી ચુકી છે.
પેટ્રોલ-ડીઝલ : બેંગલુરુમાં શેલના પંપો પર પેટ્રોલનો ભાવ પ્રતિ લિટર ૭.૪૧ રૂપિયા વધ્યો છે તેથી એક લિટરનો ભાવ રૂ. ૧૧૯.૮૫ થઇ ગયો છે, જ્યારે પ્રીમિયમ પેટ્રોલ તો ૧૨૯.૮૫ રૂપિયાએ પહોંચી ગયું છે. તેવી જ રીતે ડીઝલના ભાવમાં લિટરે રૂ. ૨૫નો ધરખમ વધારો કર્યો છે તેથી ડીઝલ તો પેટ્રોલ કરતા પણ મોંઘુ થઇ ગયું છે, બેંગલુરુમાં શેલના પંપો પર ડીઝલનો ભાવ એક લિટરે ૧૨૩.૫૨ નોંધાયો છે જ્યારે પ્રીમિયમ ડીઝલ ૧૩૩.૫૨ રૂપિયાએ પહોંચ્યું છે.
એલપીજી : હાલમાં દેશમાં એલપીજી સિલિન્ડરો માટેની લાંબી લાઇનો જોવા મળી રહી છે, એવામાં સરકારી કંપનીઓએ બુધવારે કોમર્શિયલ એલપીજી સિલિન્ડરનો ભાવ વધાર્યો છે. પાંચ કિલોના મિનિ સિલિન્ડરના ભાવમાં ૫૧ રૂપિયાનો વધારો કર્યો છે જ્યારે ૧૯ કિલોના મોટા સિલિન્ડરનો ભાવ ૧૯૫થી ૨૧૮ રૂપિયા વધ્યો છે. આ વધારાની સાથે જ ૧૯ કિલોનો એલપીજી સિલિન્ડર બે હજાર રૂપિયાને પાર જતો રહ્યો છે. દિલ્હીમાં ભાવ ૨૦૭૮ જ્યારે મુંબઇમાં ૨૦૩૧ રૂપિયા છે. બન્ને મુખ્ય શહેરોમાં ભાવમાં ૧૯૫.૫ રૂપિયા વધ્યા છે તેવી જ રીતે કોલકાતામાં ૨૧૮ જ્યારે ચેન્નાઇમાં ૨૦૩ રૂપિયાનો વધારો નોંધાયો છે, તેથી આ બન્ને શહેરોમાં ભાવ ૨૨૦૮થી ૨૨૪૬ રૂપિયા પહોંચી ગયો છે. જેને પગલે અન્ય વસ્તુઓ મોંઘી થઇ શકે છે.
વિમાન ઇંધણ : પેટ્રોલ, એલપીજી ઉપરાંત વિમાનમાં ઉપયોગી ઇંધણ એવિએશન ટર્બાઇન ફ્યૂઅલ એટીએફના ભાવમાં તોતિંગ વધારો કરાયો છે. ડોમેસ્ટિક એરલાઇન્સ માટે ભાવ પ્રતિ કિલોલિટરે રૂ. ૮૨૮૯.૦૪ વધારવામાં આવ્યો છે, એટલે કે ભાવમાં ૮.૫૬ ટકાનો વધારો નોંધાયો છે. આ સાથે જ પ્રતિ કિલોલિટરનો કુલ ભાવ રૂ. ૯૬,૬૩૮.૧૪થી વધારીને રૂ. ૧,૧૦,૭૦૩.૦૮ કરવામાં આવ્યો છે. એટલે કે એટીએફનો કુલ ભાવ પ્રતિ કિલોલિટર એક લાખ રૂપિયાનો પાર પહોંચી ગયો છે. જેને પગલે એરલાઇન્સ કંપનીઓ વિમાનના ભાડામાં પણ વધારો કરવાની તૈયારીમાં હોવાના અહેવાલો છે. નોંધનીય છે કે ૧ એપ્રીલથી નવા નાણાકીય વર્ષ ૨૦૨૬-૨૭ની શરૂઆત થઇ છે, જે સાથે જ પ્રજાને મોંઘવારીનો માર પડયો છે.
લિવર, કિડની, શુગર-બીપી, તાવ સહિત 900થી વધુ દવાઓ મોંઘી
નવી દિલ્હી : ઇંધણ તો મોંઘા થઇ જ રહ્યા છે સાથે સાથે હવે દવાઓ પણ મોંઘી થઇ રહી છે, જરૂરી દવાઓનો ભાવ ૧ એપ્રીલથી વધી ગયો છે. એનપીપીએના આદેશ અંતર્ગત ૯૦૦થી વધુ દવાઓના ભાવમાં ફેરફાર કરાયા છે. જેમાં તાવ, દુખાવો, સંક્રમણ, એનીમિયા અને પોષણ માટેની જરૂરી દવાઓનો સમાવેશ થાય છે. જીએસટી કાપ બાદ એક એપ્રીલથી દર્દીઓએ ૧૦ ટકા વધુ મોંઘા ભાવે દવાઓ ખરીદવી પડશે. ૬૦ ટકા ફાર્મા કંપનીઓએ જાન્યુઆરીમાં જ નવા ઉત્પાદન પર ભાવ વધારી દીધો હતો, જેને પગલે બજારમાં જાન્યુઆરી ૨૦૨૬થી આવનારી દવાઓ પર નવી એમઆરપી હશે. કેટલીક દવાઓમાં જેની કિંમત ૮૦ રૂપિયા હતી તે હવે ૯૦થી ૯૫ રૂપિયા થઇ ગઇ છે. આ દવાઓમાં શુગર-બીપી, કિડની, લિવર, તાવ વગેરેની સારવારની દવાઓનો પણ સમાવેશ થાય છે.
એડહોક, ચાર્ટર, નોન શિડયુલ ફ્લાઈટોનું એટીએફ 100 ટકા વધીને રૂ. બે લાખ થયા !
નવી દિલ્હી : ૧ એપ્રીલથી લાગુ એટીએફના નવા ભાવ મુજબ દિલ્હીમાં જેટ ફ્યુઅલનો ભાવ પ્રતિ કિલોલિટરે વધીને રેકોર્ડ બે લાખને પાર પહોંચી ગયો છે, આ બમણો ભાવ વધારો આંતરરાષ્ટ્રીય ફ્લાઇટ્સ ઉપરાંત એડ હોક, ચાર્ટર, નોન શિડ્યુલ વગેરેને લાગુ પડશે. આ ઉડાનો માટે પ્રતિ કિલોલિટરે ભાવ ૧૧૪ ટકા વધી ગયો છે. અગાઉ ભાવ રૂ. ૧,૧૦,૭૦૩ હતો તે હવે વધીને રૂ. ૨,૦૭,૩૪૧ને પાર પહોંચી ગયો છે. જેને પગલે આંતરરાષ્ટ્રીય મુસાફરી પણ મોંઘી પડી શકે છે.
