આ પણ વાંચો ટ્રેન્ડિંગ સમાચાર
– પીએમશ્રી પ્રાથમિક શાળામાં વિદ્યાના ધામને લજવતી ઘટના
– ગ્રામજનોના હોબાળા વચ્ચે પોલીસે આરોપી શિક્ષક અરુણ પટેલની અટકાયત કરી ફરિયાદ નોંધવા તજવીજ હાથ ધરી
નડિયાદ : ખેડા જિલ્લાના માતર તાલુકામાં આવેલી સિંજીવાડા પ્રાથમિક શાળામાં હંગામી ધોરણે ફરજ બજાવતા શિક્ષકે ધોરણ ૫ની વિદ્યાર્થિનીઓની છેડતી કરી હોવાના આક્ષેપની ગંભીર ઘટના પ્રકાશમાં આવતા સમગ્ર પંથકમાં ચકચાર મચી ગઈ છે. શિક્ષક અરૂણ પટેલે ૩થી ૪ બાળકીઓ સાથે અશોભનીય વર્તન કરી બચકાં ભર્યા હોવાના આક્ષેપ સાથે ગ્રામજનો અને વાલીઓએ પોલીસ મથકે હંગામો મચાવ્યો હતો. પોલીસે આ મામલે ત્વરિત કાર્યવાહી હાથ ધરી આરોપી શિક્ષકને રાઉન્ડ અપ કરી કાયદેસરની ફરિયાદ નોંધવાની તજવીજ શરૂ કરી છે.
ખેડા જિલ્લાના માતર તાલુકામાં આવેલી સિંજીવાડા પીએમશ્રી પ્રાથમિક શાળામાં વિદ્યાના ધામને લજવતો કિસ્સો સામે આવ્યો છે. શાળામાં હંગામી શિક્ષક તરીકે કાર્યરત અરૂણ પટેલે ધોરણ ૫માં અભ્યાસ કરતી ૩થી ૪ જેટલી માસૂમ વિદ્યાર્થિનીઓ સાથે છેડછાડ કરી હોવાનો આક્ષેપ ઉઠયો છે. આ બાબતની જાણ બાળકીઓના પરિવારજનોને થતાં જ વાલીઓ તાત્કાલિક શાળાએ દોડી ગયા હતા. ઘટનાને પગલે ગ્રામજનોમાં ભારે આક્રોશ જોવા મળ્યો હતો અને મોટી સંખ્યામાં લોકો શાળા પરિસરમાં એકઠાં થઈને શિક્ષક વિરુદ્ધ સૂત્રોચ્ચાર કરી વિરોધ પ્રદર્શન કર્યું હતું. ભોગ બનનાર એક બાળકીના ભાઈએ આક્ષેપ કરતા જણાવ્યું હતું કે, શિક્ષકે શાળામાં વિદ્યાર્થિનીઓને પકડવાની કોશિશ કરી હતી, જે દરમિયાન અન્ય બાળકીઓ ભાગી છૂટવામાં સફળ રહી હતી, પરંતુ એક બાળકી તેના હાથમાં આવી ગઈ હતી. આરોપી શિક્ષકે આ બાળકીને બચકાં ભર્યા હતા અને તેની છેડતી કરવાનો પ્રયાસ કર્યો હતો.
આ શરમજનક ઘટનાની જાણ વાલીઓને થતા તેઓ ન્યાયની માંગ સાથે માતર પોલીસ સ્ટેશન પહોંચ્યા હતા. ગામના સરપંચે પણ આ મામલે રોષ વ્યક્ત કરતા જણાવ્યું હતું કે, બાળકો શાળામાં સુરક્ષિત અનુભવી શકે તે માટે આ શિક્ષક સામે કડકમાં કડક કાર્યવાહી થવી અનિવાર્ય છે. શાળાના મુખ્ય શિક્ષકે સમગ્ર મામલાની ગંભીરતાને ધ્યાને લઈ પ્રાથમિક તપાસ કરી હતી, જેમાં વિદ્યાર્થિનીઓ સાથે છેડતી થઈ હોવાનું જણાતા તેઓ પોતે વાલીઓ સાથે પોલીસ સ્ટેશનમાં હાજર રહ્યાં હતા. પોલીસ સ્ટેશનની બહાર લોકોના ટોળેટોળાં ઉમટી પડતા પરિસ્થિતિ તંગ બની હતી, જેને પગલે પોલીસે તાત્કાલિક એક્શનમાં આવી આરોપી શિક્ષક અરૂણ પટેલની અટકાયત કરી લીધી હતી. હાલમાં પોલીસ દ્વારા ભોગ બનનાર પરિવારોના નિવેદન લેવાની અને કાયદેસરનો ગુનો દાખલ કરવાની તજવીજ હાથ ધરવામાં આવી છે.
