આ પણ વાંચો ટ્રેન્ડિંગ સમાચાર
શહેરના કરચલિયાપરા પ્રેસરોડ આગરિયાવાડના નાકા પાસે
થેલામાં ચા-ખાંડ પેકિંગ કામ કરતા મજૂરોના પગારના રોકડા રૂ.૯૦,૫૦૦ હતા, ગંગાજળિયા પોલીસ મથકમાં ગુનો નોંધાયો
ભાવનગર : શહેરમાં ધોળા દિવસે રોકડ રકમ ભરેલા થેલાની ચીલ ઝડપનો બનાવ બન્યો છે. શહેરના કરચલિયાપરા પ્રેસરોડ આગરિયાવાડના નાકા પાસે એક મહિલા થેલામાં ચા-ખાંડ પેકિંગ કામ કરતા મજૂરોના પગારના રોકડા રૂ.૯૦,૫૦૦ લઈને જઈ રહ્યાં હતા ત્યારે બે અજાણ્યા શખ્સો મહિલા પાસે રહેલા થેલાની ચીલઝડપ કરી નાસી છૂટયા હતા. બનાવ અંગે ગંગાજળિયા પોલીસે ગુનો નોંધ્યો છે.
શહેરના શ્રમજીવી અખાડા ટીવી કેન્દ્ર પાસે રહેતા અને લાલ સાંઈ એસ્ટેટમાં ચા-ખાંડ પેકિંગ કરવાનું મજુરી કામ કરતા શિલ્પાબેન વિજયભાઈ સોલંકી ગતરોજ બપોરે એક વાગ્યાના અરસામાં તેમનું જીજે-૦૪-બીએલ-૮૫૧૭ નંબરનું મોટર સાયકલ લઈને તેમના ઘરે બાળકોને જમાડવા માટે નિકળ્યા હતા અને તે સમયે તેમની સાથે ચેઈનવાળો થેલો હતો. જેમાં તેમના પતિના તથા અન્ય મજુરોના પગારના કુલ રૂ.૯૦,૫૦૦ હતા. આ દરમિયાન તેઓ પ્રેસરોડ કરચલિયાપરા આગરીયાવાડના નાકે પહોંચતા ત્યાં રોડનું કામ શરૂ હોવાથી એક સાઈડનો રોડ શરૂ હોય ત્યાં સામેથી એક ટ્રક આવતો હોવાથી તેમણે તેમનું વાહન સાઈડમાં ઉભુ રાખ્યું હતું અને આ દરમિયાન બે છોકરાંઓ મોઢે રૂમાલ બાંધીને આવી તેમની નજર ચુકવી રોકડા રૂપિયા ભરેલો થેલો લઈને નાસી છૂટયા હતા. બનાવ અંગે શિલ્પાબેન વિજયભાઈ સોલંકીએ ગંગાજળિયા પોલીસ મથકમાં અજાણ્યા વિરૂદ્ધ ફરિયાદ નોંધાવતા પોલીસે ગુનો નોંધી આગળની તપાસ હાથ ધરી છે.
