આ પણ વાંચો ટ્રેન્ડિંગ સમાચાર
– ચૂંટણી પૂર્વે પોલીસની મોટી કાર્યવાહી
– દારૂની 6,660 બોટલ સહિત રૂ. 93.31 લાખનો મુદ્દામાલ જપ્ત : અન્ય 4 શખ્સની શોધખોળ
બગોદરા : અમદાવાદ ગ્રામ્ય પોલીસની ટીમે બગોદરા ટોલટેક્સ પાસે વાહન ચેકિંગ દરમિયાન કન્ટેનરમાં છુપાવેલો લાખોનો વિદેશી દારૂ ઝડપી પાડયો છે. ચૂંટણી લક્ષી સઘન ચેકિંગ દરમિયાન પોલીસને આ મોટી સફળતા મળી છે.
આગામી જિલ્લા અને તાલુકા પંચાયતની ચૂંટણીઓને અનુલક્ષીને બગોદરા પોલીસ દ્વારા ચેકિંગ હાથ ધરવામાં આવ્યું હતું. આ દરમિયાન ટોલટેક્સ પાસે એક શંકાસ્પદ કન્ટેનર (એચઆર-૫૫-વાય-૦૫૪૩)ને રોકીને તપાસ કરતા તેમાંથી ભારતીય બનાવટનો વિદેશી દારૂ મળી આવ્યો હતો.
પોલીસે તપાસ દરમિયાન ૫૫૫ પેટીઓમાં ભરેલી કુલ ૬,૬૬૦ બોટલ જપ્ત કરી છે, જેની બજાર કિંમત રૂ.૭૩.૨૬ લાખ થાય છે. આ ઉપરાંત રૂ.૨૦ લાખનું કન્ટેનર અને મોબાઈલ મળી કુલ રૂ.૯૩,૩૧,૦૦૦નો મુદ્દામાલ કબજે કરાયો છે. આ મામલે રાજસ્થાનના બાડમેરના ગણપતલાલ બિશ્નોઇની ધરપકડ કરવામાં આવી છે. જોકે, આ જથ્થો મોકલનાર સુરેન્દર અને કાળુ બિશ્નોઇ સહિત દારૂ મંગાવનાર અન્ય ચાર શખ્સો હજુ પોલીસ પકડથી દૂર છે, જેમને ઝડપવા તપાસના ચક્રો ગતિમાન કરાયા છે.
