આ પણ વાંચો ટ્રેન્ડિંગ સમાચાર
વાંકાનેરના સતાપર ગામથી અદેપર જતા રસ્તે દરોડો : 1 શખ્સ પકડાયો, વધુ 11 નામો ખૂલતાં કુલ 12 સામે કાર્યવાહી, રૂ. 1 લાખના સ્ટિક મળી કુલ રૂ. 3.18 લાખનો મુદ્દામાલ કબજે
મોરબી, : વાંકાનેરના સતાપરથી અદેપર જવાના રોડ પરથી પોલીસે 475 ઘાતક એક્સપ્લોઝિવ જીલેટીન સ્ટિકના જથ્થા સાથે એક શખ્સને ઝડપી લઈ વાહન સહીત 3.18 લાખનો મુદામાલ કબજે લીધો છે. આ પ્રકરણમાં અન્ય 11 ઇસમોના નામ ખુલતા પોલીસે વધુ તપાસ ચલાવી ધરપકડ કરવા ચક્રો ગતિમાન કર્યા છે.
મોરબી SOGના કર્મચારી મુકેશભાઈ જોગરાજીયાએ રમેશ ગોરધન ખોજીરજી (રહે રાજકોટ), ચોથાભાઇ વાલાભાઈ ગોરિયા અને સામાભાઈ (રહે બંને સતાપર,તા. વાંકાનેર) શોર્ટ ફાયર, અજાણ્યો માણસ, બોલેરોનો ડ્રાઈવર અને 7 અજાણ્યા ઈસમો મળી કુલ 12 આરોપીઓ વિરૂદ્ધ ફરિયાદ નોંધાવી જણાવ્યું હતું કે સતાપરથી અદેપર જતા રોડ પર વોકળા પાસે રૂ . 1,05,450ના 475 એક્સપ્લોઝિવ જીલેટીન સ્ટીક કબજામાં રાખી સરકારી જમીનમાં 98 જેટલા બોર કર્યા હતા. એ પૈકી 23 બોરમાં 255 કિલોગ્રામ જેટલો એક્સપ્લોઝીવ પદાર્થ ફોડવા માટે ગોઠવ્યો હતો. જેના કારણે પ્રચંડ વિસ્ફોટ થવાની શક્યતા હતી. આ સ્ટિક જથ્થાથી ખનીજ ચોરી કરવાના આશયથી સરકારી ખરાબામાં બ્લાસ્ટ કરવાની તૈયારી કરતા હતા.
સ્થળ પરથી પોલીસે જીલેટીન સ્ટીક વાહન તેમજ બ્લાસ્ટ કરવા માટેના વાયર સહિતનો કુલ રૂા. 3,18,750નો મુદામાલ જપ્ત કરી આરોપી રમેશ ગોરધનદાસ ખોજીરજીને ઝડપી લીધો છે, અન્ય આરોપીને ઝડપી લેવા તપાસ ચાલુ છે.
