આ પણ વાંચો ટ્રેન્ડિંગ સમાચાર
વડોદરા, તા.23 વડોદરા જિલ્લામાં કોટંબી ખાતે સ્ટેડિયમમાં રમાતી વિમેન્સ પ્રિમિયર લીગની મેચમાં સ્ટેડિયમમાં બેસી ક્રિકેટ સટ્ટો રમતા પાંચ પરપ્રાંતિય શખ્સોને જિલ્લા પોલીસે ઝડપી પાડયા હતાં.
પ્રાપ્ત માહિતી મુજબ વિમેન્સ પ્રિમિયર લીગ-૨૦૨૬ની ક્રિકેટ મેચ દરમિયાન ઓનલાઇન સટ્ટા બેટિંગની પ્રવૃત્તિ પણ ચાલે છે તેવી માહિતીના આધારે જિલ્લા એલસીબીની ટીમે તપાસ હાથ ધરી હતી. દરમિયાન ગઇકાલે રમાયેલી ગુજરાત જાયન્ટ તેમજ યુપી વોરિયર્સની મેચ પર સ્ટેડિયમના પૂર્વ તથા પશ્ચિમ વિંગના પ્રથમ માળે કેટલાંક યુવાનો પોતાના મોબાઇલમાં ઓનલાઇન ક્રિકેટ સટ્ટો રમે છે તેવી બાતમીના આધારે સ્ટેડિયમની વિંગમાં તપાસ હાથ ધરી હતી.
તપાસમાં પાંચ યુવાનો પોતાના મોબાઇલમાં આઇડી રાખી લાઇવ ક્રિકેટ મેચ પર ઓનલાઇન સટ્ટો રમતા હોવાનું જણાયું હતું. પોલીસે અનિલ ગણેશપ્રસાદ સોની (રહે.ગાંધીચોક, ઇતવારી ટોટી, તા.જી. સાગર, મધ્યપ્રદેશ), સચિતાનંદકુમાર સુરેન્દ્રસિંગ યાદવ (રહે.ગૌતમબુધ્ધનગર, ગોનારોડ, તા.આરા, જિલ્લો ભોજપુર, બિહાર), ઇમરાન ઇકબાલ સૈયદ (રહે.પાંડળકૌડા, ઇન્દિરાનગર, તા.કેલાપુર, જિલ્લો યવતમાલ, મહારાષ્ટ્ર), નિતેશ પાલેરામ સુનાર (રહે.બવેલસૈની મહોલ્લા, તા.જી. પાનીપત, હરિયાણા) અને મોહિત ઉર્ફે અનુજ રામવિલાસ ચૌધરી (રહે.પાણીની ટાંકી પાસે, રુપનગર, તા.કિસનગઢ, જિલ્લો અજમેર, રાજસ્થાન)ને ઝડપી પાડયા હતાં.
પોલીસે જણાવ્યું હતું કે ગુગલ ક્રોમના સર્ચ એન્જિનની અંદર અલગ અલગ સાઇટ મારફતે રન ફેર સેશનના સોદાઓ કરી ઓનલાઇન ક્રિકેટ મેચનો સટ્ટો રમતા હતાં. પાંચેય શખ્સો પાસેથી આઠ મોબાઇલ અને રોકડ મળી કુલ રૃા.૨.૨૮ લાખનો મુદ્દામાલ પોલીસે કબજે કર્યો હતો.
