આ પણ વાંચો ટ્રેન્ડિંગ સમાચાર
Surat News: સુરત મહાનગરપાલિકાની ચૂંટણીના પડઘમ વાગી રહ્યા છે, ત્યારે શાસક પક્ષ ભાજપ માટે એન્ટી ઇન્કમ્બન્સી ચિંતાનો વિષય બની રહી છે. કતારગામ અને અડાજણ બાદ હવે ઉધના વિસ્તારમાં પણ ભાજપના ઉમેદવારો સામે જનતાનો ભારે આક્રોશ જોવા મળ્યો છે. વોર્ડ નંબર 28 માં પ્રચાર કરવા નીકળેલા પૂર્વ કોર્પોરેટર વિનોદ પટેલ અને કાર્યકરો સાથે સ્થાનિકોની ઉગ્ર ઝપાઝપી થઈ હોવાની ઘટના સામે આવી છે.
આ ચોર નેતાઓ આવી ગયા, કૈલાસ નગરમાં હોબાળો
ઘટનાની વિગતો મુજબ, વોર્ડ નંબર 28 ના ભાજપના ઉમેદવારો અને પૂર્વ કોર્પોરેટર વિનોદ પટેલ પોતાની ટીમ સાથે ઉધનાના કૈલાસ નગર વિસ્તારમાં પ્રચાર માટે પહોંચ્યા હતા. આ દરમિયાન એક સ્થાનિક વ્યક્તિએ વીડિયો બનાવવાનું શરૂ કરી દીધું હતું અને જાહેરમાં આક્ષેપ કર્યો હતો કે, આ ચોર લોકો ફરીથી વોટની ભીખ માંગવા આવી ગયા છે. આ શબ્દો સાંભળતા જ પ્રચાર કરી રહેલા કાર્યકરો અને તે વ્યક્તિ વચ્ચે બોલાચાલી શરૂ થઈ હતી.
પાણી ભરાવાની સમસ્યા અને જૂની ફરિયાદો
સ્થાનિક રહેવાસીનો આક્ષેપ હતો કે, વિનોદ પટેલ જ્યારે કોર્પોરેટર હતા ત્યારે આ વિસ્તારની મુલાકાત લેતા નહોતા. વિસ્તારમાં લાંબા સમયથી પાણી ભરાવાની ગંભીર સમસ્યા છે. જે અંગે અનેકવાર રજૂઆતો કરવા છતાં કોઈ ઉકેલ આવ્યો નથી. જ્યારે ભાજપના કાર્યકરોએ બચાવમાં એવું કહ્યું કે, અહીં થઈ રહેલા ગેરકાયદે બાંધકામોને કારણે પાણી ભરાય છે, ત્યારે મામલો વધુ બિચક્યો હતો.
આ પણ વાંચો: યુરેનિયમ આપવાનો સવાલ જ નથી: સીઝફાયર વચ્ચે ઈરાનનો અમેરિકાને ફરી જડબાતોડ જવાબ
ઝપાઝપી અને ગાળાગાળીના દ્રશ્યો
બંને પક્ષો વચ્ચેની ચર્ચાઓ ઉગ્ર બોલાચાલી અને ગાળાગાળીમાં ફેરવાઈ હતી. આરોપ છે કે વાત વધી જતાં ભાજપના કાર્યકરો અને સ્થાનિક વ્યક્તિ વચ્ચે ઝપાઝપી થઈ હતી. હુમલાના આક્ષેપો બાદ વાતાવરણ તંગ બની જતાં અંતે પૂર્વ કોર્પોરેટર અને તેમની ટીમે ત્યાંથી રવાના થઈ જવું પડ્યું હતું. આ સમગ્ર ઘટનાનો વીડિયો સોશિયલ મીડિયામાં વાયરલ થતા રાજકીય આલમમાં ચર્ચા જાગી છે.
ભાજપનો અનેક સ્થળોએ વિરોધ
કતારગામ બાદ હવે ઉધનામાં પણ ભાજપના ઉમેદવારોનો વિરોધ થવો એ સૂચવે છે કે આગામી ચૂંટણીમાં વિકાસના કામો અને સ્થાનિક પ્રશ્નો મુદ્દે જનતા કોઈ બાંધછોડ કરવાના મૂડમાં નથી. હાલમાં સ્થિતિ એવી છે કે, ભાજપના ઉમેદવારો અનેક સ્થળો પર ગ્રાઉન્ડ પર ઉતરી શકે તેવી સ્થિતિ જ નથી. અનેક સોસાયટીઓમાં બોર્ડ લગાવી દેવાયા છે. અનેક જગ્યાએ વિરોધો થઇ રહ્યા છે.
