આ પણ વાંચો ટ્રેન્ડિંગ સમાચાર
અમદાવાદ : દેશમાં ગરમીના તીવ્ર મોજા વચ્ચે, ટોચની વીજ માંગ ૨૫૫.૮૫ ગીગાવોટની રેકોર્ડ ઊંચી સપાટીએ પહોંચી ગઈ છે. આ અગાઉનો પણ ઐતિહાસિક વીજ ડિમાન્ડનો રેકોર્ડ ૨૫૫.૮૫ ગીગાવોટ જ હતો.
એર કન્ડીશનર અને કુલર જેવા ઠંડક આપતા ઉપકરણોના વધતા ઉપયોગથી માંગમાં વધારો થયો છે. ઉત્તર, મધ્ય અને પશ્ચિમ ભારતમાં તીવ્ર ગરમી વચ્ચે લોકોએ ગરમીથી રાહત મેળવવા માટે ઠંડક આપતા ઉપકરણોનો વધુને વધુ ઉપયોગ કરતા વીજળીના વપરાશમાં નોંધપાત્ર વધારો જોવા મળ્યો છે.
ઊર્જા મંત્રાલયના ડેટા અનુસાર સોમવાર, ૨૭ એપ્રિલ, ૨૦૨૬ના રોજ પીક ઈલેક્ટ્રિસિટી ડિમાન્ડ ૨૫૫.૮૫ ગીગાવોટ (આશરે ૨૫૬ ગીગાવોટ)એ પહોંચી હતી. મહિનાના બીજા ભાગમાં માંગ ઝડપથી વધવા લાગી હતી, ૨૪ એપ્રિલ (શુક્રવાર)ના રોજ ૨૫૨.૦૭ ગીગાવોટ પર અને ૨૫ એપ્રિલ (શનિવાર)ના રોજ તે ૨૫૬.૧૧ ગીગાવોટને વટાવી ગઈ. જોકે ૨૬ એપ્રિલના રોજ રવિવારે રજાના દિવસે મોટાભાગના કોમર્શિયલ અને ઈન્ડસ્ટ્રીયલ એકમો બંધ રહેતા માંગ ઘટીને ૨૩૮.૧૫ ગીગાવોટ થઈ છે.
અત્રે નોંધનીય છે કે ગત વર્ષે જૂન ૨૦૨૫માં ઉનાળામાં વીજળીની માંગ ૨૪૨.૭૭ ગીગાવોટ હતી, જે સરકારના ૨૭૭ ગીગાવોટના અંદાજ કરતાં ઓછી હતી. ૨૦૨૪માં મે મહિનામાં રેકોર્ડ ૨૫૦ ગીગાવોટ નોંધાઈ હતી અને ૨૦૨૩માં સપ્ટેમ્બરમાં માંગ ૨૪૩.૨૭ ગીગાવોટ નોંધાઈ હતી. ભારતીય હવામાન વિભાગે આ વર્ષે ગરમીના તીવ્ર પ્રકોપની આગાહી કરી છે.
વીજ મંત્રાલયે આ વર્ષે ઉનાળા દરમિયાન વીજળીની માંગ ૨૭૦ ગીગાવોટ પહોંચવાનો અંદાજ લગાવ્યો છે. જોકે આ મહિનાના પ્રથમ પખવાડિયામાં, ઈલેક્ટ્રિસિટી ડિમાન્ડ એપ્રિલ ૨૦૨૫ના એવરેજ ૨૩૫.૩૨ ગીગાવોટના સ્તર કરતા ઓછી હતી.
