આ પણ વાંચો ટ્રેન્ડિંગ સમાચાર
મુંબઈ : ઈરાન-અમેરિકા વચ્ચેના યુદ્વનો ટૂંક સમયમાં જ અંત આવવાના ગઈકાલ સુધીના બન્ને પક્ષોના આશ્વાસનભર્યા નિવેદનો અને તુરંત જ અમેરિકા પોતાની શરતો પર ઈરાનને ઝુંકાવવા માંગતું હોવાને લઈ ઈરાને યુ-ટર્ન લેતાં અને અમેરિકાની પણ ઈરાનને ધમકીને લઈ મામલો બિચકતા ફરી વૈશ્વિક બજારોમાં ઉછાળે સાવચેતીમાં નરમાઈ જોવાઈ હતી. હોર્મુઝ માર્ગે જહાજોના મુક્ત વહનની અપેક્ષાએ અને બીજી તરફ અમેરિકા દ્વારા ઈરાન સાથે સમજૂતી અને યુ.એ.ઈ.ને ભીંસમાં મૂકી રહ્યાના અને યુ.એ.ઈ. દ્વારા તેમની એરસ્પેસનો અમેરિકાને ઉપયોગ કરવા દેવા પર મનાઈના અહેવાલોની નેગેટીવ અસર બજારો પર જોવાઈ હતી. અલબત ક્રુડ ઓઈલના આંતરરાષ્ટ્રીય ભાવ વધુ ત્રણ ડોલર જેટલા ઘટી આવતાં અને અમેરિકી ડોલર સામે રૂપિયો મજબૂત બન્યાની પોઝિટીવ અસર આજે જોવાઈ નહોતી. ઓટોમોબાઈલ, કેપિટલ ગુડઝ-પાવર, હેલ્થકેર-ફાર્મા, મેટલ-માઈનીંગ શેરોમાં તેજી સામે એફએમસીજી, આઈટી-સોફ્ટવેર સર્વિસિઝ, કન્ઝયુમર ડયુરેબલ્સ શેરોમાં વેચવાલી રહી હતી. સેન્સેક્સ ૭૭૭૧૩થી ૭૮૩૮૫ વચ્ચે ફંગોળાઈ અંતે ૧૧૪ પોઈન્ટ ઘટીને ૭૭૮૪૪.૫૨ અને નિફટી ૫૦ સ્પોટ ઈન્ડેક્સ ૨૪૪૮૩થી ૨૪૨૮૪ વચ્ચે અથડાઈ અંતે ૪.૩૦ પોઈન્ટ ઘટીને ૨૪૩૨૬.૬૫ બંધ રહ્યો હતો.
ઓટો શેરો વધ્યા
ઓટોમોબાઈલ શેરોમાં આજે સારા પરિણામો અને ક્રુડ ઓઈલના ભાવમાં કડાકાની પોઝિટીવ અસરે હવે પેટ્રોલ, ડિઝલના ભાવમાં હાલ તુરત વધારો નહીં થવાની અટકળોએ ફંડો મોટાપાયે ખરીદદાર રહ્યા હતા. હીરો મોટોકોર્પ રૂ.૧૭૨.૨૫ વધીને રૂ.૫૩૪૧.૯૫, બજાજ ઓટો રૂ.૨૯૨.૧૫ વધીને રૂ.૧૦૬૦૭, મધરસન સુમી રૂ.૩.૫૦ વધીને રૂ.૧૩૦.૫૦, ટીવીએસ મોટર રૂ.૮૯ વધીને રૂ.૩૭૦૬.૮૫, મહિન્દ્રા એન્ડ મહિન્દ્રા રૂ.૭૦.૫૦ વધીને રૂ.૩૩૭૦.૫૦ રહ્યા હતા. બીએસઈ ઓટો ઈન્ડેક્સ ૧૦૬૯.૬૫ પોઈન્ટ વધીને ૬૦૧૩૧.૫૮ બંધ રહ્યો હતો.
કેપિટલ ગુડઝ શેરો ઉછળ્યા
કેપિટલ ગુડઝ-પાવર શેરોમાં ફંડોએ આજે ફરી આક્રમક ખરીદી કરી હતી. પોલીકેબ રૂ.૫૮૫.૩૦ વધીને રૂ.૯૦૦૩.૦૫, ભેલ રૂ.૨૦.૩૦ વધીને રૂ.૪૦૬.૩૦, ભારત ડાયનામિક્સ રૂ.૬૫.૬૦ વધીને રૂ.૧૪૬૬, હિન્દુસ્તાન એરોનોટિક્સ રૂ.૧૫૫.૯૫ વધીને રૂ.૪૭૮૩.૮૦ રહ્યા હતા. બીએસઈ કેપિટલ ગુડઝ ઈન્ડેક્સ ૧૬૧૪.૮૯ પોઈન્ટ વધીને ૮૦૩૨૦.૯૨ બંધ રહ્યો હતો.
મેટલ-માઈનીંગ શેરોમાં ફંડો લેવાલ
મેટલ-માઈનીંગ શેરોમાં આજે સતત ફંડોની પસંદગીની ખરીદી રહી હતી. એનએમડીસી રૂ.૧ વધીને રૂ.૯૦.૨૦, હિન્દાલ્કો રૂ.૯.૨૦ વધીને રૂ.૧૦૫૫.૫૫, જેએસડબલ્યુ સ્ટીલ રૂ.૧૦.૧૦ વધીને રૂ.૧૨૮૩.૩૦, સેઈલ રૂ.૧.૪૦ વધીને રૂ.૧૮૭.૩૫, ટાટા સ્ટીલ રૂ.૧.૫૦ વધીને રૂ.૨૧૭.૦૫ રહ્યા હતા.બીએસઈ મેટલ ઈન્ડેક્સ ૧૯૭.૯૬ પોઈન્ટ વધીને ૪૩૧૧૮.૪૪ બંધ રહ્યો હતો.
આઈટી શેરોમાં વેચવાલી
આઈટી-સોફ્ટવેર સર્વિસિઝ, ટેકનોલોજી શેરોમાં ફંડોનું વેચવાલીનું દબાણ વધતું જોવાયું હતું. સિએન્ટ રૂ.૫.૯૫ ઘટીને રૂ.૮૯૪.૮૦,પર્સિસ્ટન્ટ રૂ.૩૨.૪૫ ઘટીને રૂ.૪૯૮૩.૩૦, એચસીએલ ટેકનોલોજી રૂ.૫.૪૫ ઘટીને રૂ.૧૧૮૩.૪૫ રહ્યા હતા. બીએસઈ આઈટી ઈન્ડેક્સ ૧૫૯.૭૭ પોઈન્ટ ઘટીને ૨૮૨૪૬.૯૧ બંધ રહ્યો હતો.
DIIની રૂ.૪૪૧ કરોડની ખરીદી
ફોરેન પોર્ટફોલિયો ઈન્વેસ્ટરો-એફપીઆઈઝ, એફઆઈઆઈઝની આજે-ગુરૂવારે કેશ સેગ્મેન્ટમાં રૂ.૩૪૦.૮૯ કરોડના શેરોની ચોખ્ખી વેચવાલી કરી હતી. જ્યારે સ્થાનિક સંસ્થાકીય રોકાણકારો-ડીઆઈઆઈની આજે રૂ.૪૪૧.૦૭ કરોડના શેરોની ચોખ્ખી ખરીદી રહી હતી.
રોકાણકારોની સંપતિવધી
સેન્સેક્સ, નિફટીમાં અફડાતફડીના અંતે નરમાઈ સામે સ્મોલ, મિડ કેપ, એ ગુ્રપના ઘણા શેરોમાં આકર્ષણે આજે રોકાણકારોની સંપતિ એટલે કે બીએસઈમાં લિસ્ટેડ કંપનીઓનું એક્ત્રિત માર્કેટ કેપિટલાઈઝેશન આજે એક દિવસમાં મર્યાદિત રૂ.૨.૧૭ લાખ કરોડ વધીને રૂ.૪૭૪.૯૭ લાખ કરોડ રહ્યું હતું.
