આ પણ વાંચો ટ્રેન્ડિંગ સમાચાર
Illegal Mining Racket Busted in Surendranagar: સુરેન્દ્રનગર જિલ્લામાં ગેરકાયદે ખનીજ ખનન અને વહન કરતા માફિયાઓ સામે પોલીસે અત્યાર સુધીની સૌથી મોટી અને કડક કાર્યવાહી હાથ ધરી છે. જિલ્લાના સાયલા, મૂળી અને થાનગઢ તાલુકામાંથી પોલીસે વહેલી સવારે દરોડા પાડીને ખનીજ ચોરી સાથે સંકળાયેલા 42થી વધુ લોકોની અટકાયત કરી છે. આ શખસો સોશિયલ મીડિયા પર ડિજિટલ નેટવર્ક બનાવીને સરકારી અધિકારીઓની રેકી કરતા હોવાનો ચોંકાવનારો ઘટસ્ફોટ થયો છે.
10થી વધુ વોટ્સએપ ગ્રુપ દ્વારા અધિકારીઓની થતી હતી રેકી
મળતી માહિતી અનુસાર, ઝડપાયેલા આરોપીઓ સરકારી કર્મચારીઓની ફરજમાં રૂકાવટ ઊભી કરવાનું આંતરરાષ્ટ્રીય સ્તર જેવું નેટવર્ક ચલાવતા હતા. આ માફિયાઓએ 10થી વધુ વોટ્સએપ ગ્રુપ બનાવ્યા હતા, જેમાં પોલીસ, ખાણ-ખનીજ વિભાગ અને અન્ય સરકારી અધિકારીઓની ગાડીઓ કઈ તરફ જઈ રહી છે તેના લાઈવ લોકેશન અને પળેપળની માહિતી શેર કરવામાં આવતી હતી.
અધિકારીઓની હિલચાલ પર નજર રાખવા માટે માત્ર ખનીજ ચોરો જ નહીં, પરંતુ હાઈવે પર આવેલી હોટલ, કરિયાણાની દુકાન અને પાનના ગલ્લાના સંચાલકોને પણ બાતમીદાર તરીકે રોકવામાં આવ્યા હતા, જેઓ પણ આ રેડમાં ઝડપાયા છે.
તમામ આરોપીઓને SP કચેરી ખસેડાયા
વહેલી સવારે પોલીસની અલગ-અલગ ટીમોએ ત્રાટકીને સાયલા, મૂળી અને થાનગઢ પંથકમાંથી આ તમામ શખસોને દબોચી લીધા હતા. અટકાયત કરાયેલા તમામ લોકોને વધુ પૂછપરછ અને કાયદેસરની કાર્યવાહી માટે સુરેન્દ્રનગર એસપી (SP) કચેરી ખાતે લઈ જવામાં આવ્યા છે.
આ મામલે સાયલા પોલીસના જણાવ્યા અનુસાર, હાલ સમગ્ર કૌભાંડને લઈને સઘન તપાસ શરૂ કરી દેવામાં આવી છે. વોટ્સએપ ગ્રુપના એડમિન અને ડેટાની ચકાસણી પૂર્ણ થયા બાદ સત્તાવાર રીતે સાચી અને વિગતવાર માહિતી જાહેર કરવામાં આવશે. પોલીસે આ નેટવર્ક સાથે સંકળાયેલા અન્ય લોકોને પણ કડક શબ્દોમાં ચેતવણી આપી છે.
સીમકાર્ડના કારણે ‘નિર્દોષ’ ફસાયા હોવાની ચર્ચા
આ આખી પોલીસ કાર્યવાહી વચ્ચે સ્થાનિક સ્તરે એવી પણ ચર્ચાઓએ જોર પકડ્યું છે કે કેટલાક કિસ્સાઓમાં સીમકાર્ડ પિતાના નામે હોય અને તેનો ઉપયોગ પુત્ર કરતો હોય, અથવા તો પરિવારના અન્ય સભ્યો ગ્રુપમાં એક્ટિવ હોય તેના કારણે કેટલાક નિર્દોષ લોકો પણ પોલીસ સકંજામાં આવી ગયા છે. જો કે, પોલીસ તમામ મોબાઈલ લોગ્સ અને ચેટ્સની ફોરેન્સિક તપાસ કરીને દૂધનું દૂધ અને પાણીનું પાણી કરવા તજવીજ હાથ ધરી રહી છે.
