આ પણ વાંચો ટ્રેન્ડિંગ સમાચાર
Vadodara News: કરજણ કોર્ટના સૌથી જૂના કેસમાં સંડોવાયેલો આરોપી છેલ્લા 20 વર્ષથી મુદતે હાજર રહેતો ન હોવાથી, અદાલતે તેને ફરાર જાહેર કરવાનો આદેશ કર્યો હતો. ન્યાયાધીશે નોંધ્યું હતું કે લંડનમાં રહેતો આ આરોપી કોર્ટમાં મુદતે હાજર રહેતો ન હોવાથી, તેની ગેરહાજરીમાં જ પુરાવા નોંધવાનો અને તેની મિલકત જપ્તીની કાર્યવાહી કરવાનો પણ આદેશ કર્યો છે.
કેસની વિગત એવી છે કે વર્ષ 2006માં કરજણ પોલીસ સ્ટેશનમાં હરીશભાઈ પટેલ નામના શખ્સ સામે જાતિવિષયક અપમાનિત કરવા, મારપીટ કરવા તેમજ જાનથી મારી નાખવાની ધમકી આપવા સહિતની કલમો હેઠળ ફરિયાદ નોંધાઈ હતી. ત્યાર બાદથી જ આરોપી કાયદાના સકંજામાંથી બચવા માટે સતત નાસતો ફરતો રહ્યો હતો. કોર્ટની કાર્યવાહી દરમિયાન એવી વિગતો સપાટી પર આવી હતી કે, હરીશ પટેલ ધરપકડથી બચવા માટે વર્ષોથી લંડનમાં રહે છે.
આરોપીના સગાએ પણ પોતાના નિવેદનમાં હરીશ પટેલ લંડનમાં રહેતો હોવાની વિગત જણાવી હતી. અદાલત દ્વારા અગાઉ ઇસ્યુ કરવામાં આવેલા ધરપકડના અનેક નોન-બેલેબલ વોરંટની બજવણી લંડન રહેતા આ આરોપી સુધી ન થઈ શકતાં, આ કેસ છેલ્લા 20 વર્ષ જેટલા લાંબા સમયથી અટકેલો પડ્યો હતો. કેસની સુનાવણીમાં સરકારી વકીલ જે.એમ. કંસારાએ રાજ્ય સરકાર વતી દલીલો કરી હતી.
સરકારી વકીલની રજૂઆત બાદ કોર્ટે નોંધ્યું હતું કે, કેસનો રેકોર્ડ જોતાં સ્પષ્ટ જણાય છે કે આરોપી જાણીજોઈને કોર્ટ ટ્રાયલમાંથી ભાગી રહ્યો છે. પરિણામે, કોર્ટે આરોપી હરીશભાઈ પટેલને કાયદાકીય રીતે ફરાર જાહેર કરવા (સી.આર.પી.સી. કલમ 82 મુજબ) અને જો તે સમયસર હાજર ન થાય તો તેની મિલકત જપ્ત કરવાની કડક કાર્યવાહી (કલમ 83 મુજબ) કરવાનો કરજણ પોલીસને હુકમ કર્યો હતો. ન્યાયાધીશે ફરિયાદી અને અન્ય મહત્વના સાક્ષીઓને સમન્સ જારી કરીને કોર્ટમાં બોલાવ્યા છે, જેથી આરોપી ગમે ત્યાં છુપાયેલો રહે તો પણ તેની ગેરહાજરીમાં કેસ આગળ ચાલશે.
