– વિશ્વની ટોચની 100 બ્રાન્ડોની નવી વૈશ્વિક રેન્કિંગમાં નોંધપાત્ર ફેરફારો જોવા મળ્યા છે
– વિશ્વની ટોચની 100 બ્રાન્ડનું કુલ મૂલ્ય 13 ટ્રિલયન ડોલર(રૂ.1244 લાખ કરોડ)ને વટાવી ગયું છે. વાર્ષિક દ્રષ્ટિએ 22 ટકાનો નોંધપાત્ર વધારો થયો છે
અમદાવાદ : વિશ્વની ટોચની ૧૦૦ બ્રાન્ડોની નવી વૈશ્વિક રેન્કિંગમાં નોંધપાત્ર ફેરફારો જોવા મળ્યા છે. વિશ્વની ટોચની ૧૦૦ બ્રાન્ડોમાં ત્રણ ભારતીય કંપનીઓએ સ્થાન મેળવ્યું છે. એપલને પછાડીને ગૂગલ વિશ્વની સૌથી મૂલ્યવાન બ્રાન્ડ બનીને ઉભરી છે. નોંધનીય છે કે છેલ્લા ચાર વર્ષથી એપલ પ્રથમ ક્રમાંકે હતી. આર્ટિફિશિયલ ઇન્ટેલિજન્સ (એઆઈ) ટેકનોલોજીના ઝડપી અડોપ્શનને કારણે ગૂગલનું બ્રાન્ડ મૂલ્ય રેકોર્ડબ્રેક ૫૭ ટકા વધીને આશરે ૧૪૨ લાખ કરોડ રૂપિયા સુધી પહોંચ્યું છે.
બીજી તરફ, એપલનું બ્રાન્ડ મૂલ્ય ફક્ત ૬ ટકા જ વધ્યું છે, જેના કારણે તેનું કુલ મૂલ્ય આશરે ૧૩૨ લાખ કરોડ થયું છે. આ યાદીમાં માઇક્રોસોફ્ટ ત્રીજા ક્રમે છે અને એમેઝોન ચોથા ક્રમે છે. ચિપમેકર નીવિદા ૬૦ ટકાના ઉછાળે પાંચમા સ્થાને પહોંચી ગઈ છે.
ઈતિહાસમાં પ્રથમ વખત ચાર બ્રાન્ડનું મૂલ્ય એકસાથે ૧ ટ્રિલિયનને પાર કરી ગયું છે. ચાઈનીઝ કંપનીઓએ પણ અપવાદરૂપે સારું પ્રદર્શન કર્યું છે. અલીબાબા ગુ્રપના બ્રાન્ડ મૂલ્યમાં ૫૧ ટકાનો વધારો થયો છે, જ્યારે એગ્રીકલ્ચરલ બેંક ઓફ ચાઇનાના મૂલ્યમાં ૫૪ ટકાનો વધારો થયો છે. શાઓમીના બ્રાન્ડ મૂલ્યમાં પણ ૪૮ ટકાનો વધારો થયો છે.ઓપનએઆઈના ચેટજીપીટીએ એઆઈ ક્રાંતિ દરમિયાન સૌથી ઝડપી વૃદ્ધિ નોંધાવી છે. માત્ર એક વર્ષમાં, તેનું બ્રાન્ડ મૂલ્ય ૨૮૫ ટકા વધીને આશરે ૧૬ લાખ કરોડ રૂપિયા થયું છે, જે વિશ્વની કોઈપણ બ્રાન્ડની સૌથી ઝડપી વૃદ્ધિ છે. બીજી બાજુ, લક્ઝરી બ્રાન્ડ્સ તેમની ચમક ગુમાવી રહી છે. લુઇસ વીટનનું મૂલ્ય ૨૨ ટકા % ઘટીને ૩૨મા સ્થાને પહોંચી ગયું, જ્યારે ચેનલનું બ્રાન્ડ મૂલ્ય ૧૫ ટકા ઘટયું છે. બ્રાન્ડ માર્કેટ માટે ૨૦૨૬ ઐતિહાસિક વર્ષ રહ્યું છે.વિશ્વની ટોચની ૧૦૦ બ્રાન્ડનું કુલ મૂલ્ય ૧૩ ટ્રિલયન ડોલર(રૂ.૧૨૪૪ લાખ કરોડ)ને વટાવી ગયું છે. વાર્ષિક દ્રષ્ટિએ ૨૨ ટકાનો નોંધપાત્ર વધારો થયો છે. પરતું વૃધ્ધિ એકસમાન નહોતી.
TCSની બ્રાન્ડ વેલ્યુ 43% ઘટી
ટોચના ૧૦૦ બ્રાન્ડ્સમાં ત્રણ ભારતીય કંપનીઓની મજબૂત હાજરી છે. ભારતી એરટેલે સૌથી વધુ પ્રદર્શન કર્યું છે. ચાર સ્થાનના કૂદકા સાથે ૬૨મા ક્રમે પહોંચી છે. કંપનીનું બ્રાન્ડ મૂલ્ય ૨૮ ટકા વધીને રૂ. ૪.૫૬.૫૬ લાખ કરોડ થયું છે.
બેંકિંગ ક્ષેત્રમાંથી એચડીએફસી બેંક ૬૩મા ક્રમે છે, તેની બ્રાન્ડ મૂલ્ય ૬ ટકા વધીને રૂ. ૪.૫૫ લાખ કરોડ થયું છે. ટાટા કન્સલ્ટન્સી સર્વિસીસ ૭૬મા ક્રમે છે, જોકે તેની બ્રાન્ડ મૂલ્યમાં ૪૩ ટકાનો ઘટાડો થયો છે.
