આ પણ વાંચો ટ્રેન્ડિંગ સમાચાર
Vadodara Congress Corporator Liquor Case: વડોદરા જિલ્લાના રાજકારણમાં ડભોઈના ભાજપ ધારાસભ્ય અને એક લિસ્ટેડ બુટલેગર વચ્ચેની સાંઠગાંઠના પુરાવા કોર્ટમાં રજૂ થતાં ભારે ચકચાર મચી ગઈ છે. ડભોઈ નગર પાલિકાની ચૂંટણી દરમિયાન ભાજપ અને કોંગ્રેસના કાર્યકરો વચ્ચે મારામારી થઈ હતી, જેના બીજા દિવસે સાઠોદ ગામમાં ધારાસભ્ય શૈલેષ સોટ્ટાએ પોલીસ કાફલા સાથે શક્તિ પ્રદર્શન કર્યું હતું. આ રેલી દરમિયાન ધારાસભ્ય જ્યારે ઘોડા પર સવાર હતા, ત્યારે તેમના ઘોડાની લગામ પકડીને ચાલતો શખસ બીજો કોઈ નહીં પણ કોંગ્રેસના કોર્પોરેટર આશિષ જોશી સામે દારૂનો કેસ કરનાર બુટલેગર પ્રમોદ પાંડે હોવાનું સામે આવ્યું છે. આ ફોટો કોર્ટમાં રજૂ કરાતા બંને વચ્ચેનું નેક્સસ ખુલ્લું પડી ગયું છે.
શું છે સમગ્ર વિવાદ અને કોર્ટમાં રજૂ થયેલા પુરાવા?
વડોદરા કોર્પોરેશનની ચૂંટણીમાં વોર્ડ નંબર 15ના કોંગ્રેસના કોર્પોરેટર આશિષ જોષી સામે સંખેડા પોલીસ મથકમાં એક બુટલેગરના નિવેદનના આધારે દારૂ મંગાવવાનો કેસ દાખલ કરાયો હતો. આ કેસમાં આશિષ જોશીના બચાવમાં તેમના વકીલ હિતેશ ગુપ્તાએ કોર્ટ સમક્ષ કેટલાક ફોટો રજૂ કર્યા છે. આ ફોટામાં ડભોઈના ધારાસભ્ય શૈલેષ સોટ્ટા શાહી અંદાજમાં ઘોડા પર બેઠેલા જોવા મળે છે, જેની લગામ બુટલેગર પ્રમોદ પાંડેના હાથમાં છે. કોંગ્રેસના નેતાને ખોટા કેસમાં ફસાવવા માટે જ આ આખું ગણિત રચાયું હોવાના આક્ષેપો સાથે આ પુરાવા કોર્ટ સમક્ષ મૂકવામાં આવ્યા છે.
આ પણ વાંચો: વડોદરા મ્યુનિ. કોર્પોરેશનની ચૂંટણી વખતે દારૂના કેસમાં ધરપકડ કરાયેલા કોર્પોરેટર આશિષ જોષીના જામીન મંજૂર
આ વિવાદમાં પોલીસ અને બુટલેગરોની જુગલબંધી પણ ચર્ચાનો વિષય બની છે. સ્ટેટ મોનિટરિંગ સેલ (SMC) દ્વારા ડભોઈમાં જે દારૂનો કેસ કરાયો હતો, તેમાં મુખ્ય આરોપીઓ તરીકે બુટલેગર વિરાજ જયસ્વાલ અને ધવલ જયસ્વાલ સામેલ છે. નવાઈની વાત એ છે કે, સંખેડા પોલીસ ઇન્સ્પેક્ટરે આરોપી પ્રમોદ પાંડેની ધરપકડ કરી, ત્યારે તેની સત્તાવાર જાણ ડભોઈના લિસ્ટેડ બુટલેગર વિરાજ જયસ્વાલને ફોન કરીને આપે છે. નોંધનીય છે કે, ઉત્તર પ્રદેશનો મૂળ વતની આ આરોપી પ્રમોદ પાંડે લાંબા સમયથી ડભોઈમાં જ રહેતો હોવા છતાં, ડભોઈ પોલીસ સ્ટેશનના ચોપડે તેની કોઈ સત્તાવાર નોંધ રાખવામાં આવી નહોતી.
દારૂ મંગાવવાના મુદ્દે અનેક સવાલો અને શંકા
પોલીસનો દાવો છે કે બુટલેગર પ્રદીપ પાંડે અને કોંગ્રેસ નેતા આશિષ જોશી વચ્ચે માત્ર 16 સેકન્ડ સુધી વાતચીત થઈ હતી.
જો કે, ક્વાંટ વિસ્તારમાંથી દારૂ મંગાવવાના આ સમગ્ર મામલામાં અનેક કાયદાકીય શંકાઓ સેવાઈ રહી છે. આ ગુનામાં સંખેડા ગામ ક્યાંય વચ્ચે આવતું જ નથી. બીજી તરફ, બચાવ પક્ષનો દાવો છે કે, સંખેડા પોલીસે આ કેસમાં કૂદી પડીને પ્રદીપ પાંડેની ધરપકડ બતાવીને આશિષ જોશીનું નામ સંડોવ્યું હતું.
