આ પણ વાંચો ટ્રેન્ડિંગ સમાચાર
Jamnagar Accident : જામનગર શહેરના સમર્પણ સર્કલ નજીક હિટ એન્ડ રનનો બનાવ સામે આવ્યો છે. અજાણ્યા ફોરવીલ વાહનના ચાલકે એક્ટિવા ચાલક કિશોરને ઠોકર મારી ફરાર થઈ જતા સમગ્ર મામલે સીટી ‘સી’ ડિવિઝન પોલીસ સ્ટેશનમાં ગુનો નોંધવામાં આવ્યો છે.
પ્રાપ્ત વિગતો મુજબ, શંકર ટેકરી સિદ્ધાર્થ કોલોની શેરી નં.4 માં રહેતા સુભમ દિનેશભાઈ ઝાલા (ઉ.વ.17) તા.24મે ના રોજ સાંજે આશરે 5.30 વાગ્યે પોતાનું એક્ટિવા લઈને ઘરે જઈ રહ્યા હતા. તે દરમિયાન સમર્પણ સર્કલ પાસે પહોંચતા કોઈ અજાણ્યા ફોરવીલ વાહનના ચાલકે બેદરકારીપૂર્વક વાહન હંકારી એક્ટિવાને ઠોકર મારી હતી.
અકસ્માતના કારણે સુભમ એક્ટિવા સાથે રોડ પર પટકાયા હતા અને તેમને મોઢાના દાઢી પાસે ટાંકા લેવા પડ્યા હતા તેમજ ગાલ અને માથાના ભાગે ઇજાઓ પહોંચી હોવાનું જાણવા મળ્યું છે. ઇજાગ્રસ્તને સારવાર માટે જી.જી. હોસ્પિટલમાં ખસેડવામાં આવ્યા હતા.
બનાવ બાદ અજાણ્યો વાહન ચાલક સ્થળ પરથી ફરાર થઈ ગયો હતો. સમગ્ર મામલે સુભમની માતા ખીમીબેન દિનેશભાઈ ઝાલાની ફરિયાદના આધારે સીટી ‘સી’ ડિવિઝન પોલીસે ભારતીય ન્યાય સંહિતા 2023 ની કલમ 12 (એ), 1(બી), 281 તેમજ 134 મોટર વ્હીકલ એક્ટની કલમ 177 હેઠળ ગુનો નોંધી આગળની તપાસ હાથ ધરી છે.
