Minister Meeting On Fuel Supply: પેટ્રોલ-ડીઝલ, LPG ગેસ સિલિન્ડર પર સરકાર એલર્ટ મોડમાં છે. બુધવાર(27 મે) રક્ષામંત્રી રાજનાથ સિંહ સાથે મોદી સરકારના 10 મંત્રીની હાઈલેવલ બેઠક મળી હતી. દેશમાં સપ્લાઈ ચેઈન અને જરૂરી વસ્તુઓની ક્યાં અછત છે અને કેટલી જરૂરત છે આ મામલે ફરી એક વખત સમીક્ષા કરવામાં આવી છે. બેઠકમાં તમામ મંત્રીઓ પાસેથી ઈનપુટ મેળવવામાં આવ્યા હતા. જેમાં મંત્રીઓએ વિસ્તૃતમાં માહિતી આપી હતી. આ દરમિયાન દેશમાં પેટ્રોલ-ડીઝલ, LPG સિલિન્ડર અંગે સરકારે મોટી જાહેરાત કરતાં કહ્યું કે, ‘સ્ટોક ફૂલ….’
10 મંત્રીની હાઈલેવલ બેઠક બાદ પેટ્રોલ-ડીઝલ, LPG સિલિન્ડર અંગે સરકારની મોટી જાહેરાત
પેટ્રોલ અને ડીઝલના પુરવઠા મામલે સરકારે સ્પષ્ટતા કરી કે, ‘હાલમાં દેશમાં કોઈ અછત નથી.’ પેટ્રોલિયમ મંત્રી હરદીપ સિંહ પુરીએ સંકેત આપ્યો કે, ‘પુરવઠો સંપૂર્ણપણે પૂરતો છે અને ગભરાવાની કોઈ જરૂર નથી.’ ત્યારબાદ રાજનાથ સિંહે જણાવ્યું કે, ‘દેશમાં તમામ આવશ્યક ચીજવસ્તુઓનો પુરવઠો હાલમાં સામાન્ય છે. આમ પેટ્રોલ, ડીઝલ અને LPGની ગભરાટમાં ખરીદી ન કરવી. સરકાર બધી આવશ્યક વસ્તુઓની ઉપલબ્ધતા સુનિશ્ચિત કરવા માટે દરેક શક્ય પગલાં લઈ રહી છે.’
LPG સિલિન્ડર અંગે રાહતનું અપડેટ
LPG ગેસ સિલિન્ડરની પરિસ્થિતિ અંગે સ્પષ્ટતા કરતાં સરકારે જણાવ્યું હતું કે, ઘરગથ્થુ જરૂરિયાતો માટે ગેસનો પુરવઠો સામાન્ય છે. અફવામાં આવીને ગભરાટમાં ન આવવા લોકોને અપીલ કરવામાં આવી છે. સિસ્ટમમાં પૂરતો સ્ટોક ઉપલબ્ધ છે અને સપ્લાય લાઇન મજબૂત રહે છે.
ગભરાશો નહીં, બધુ કન્ટ્રોલમાં છે: સરકાર
10 મંત્રીઓની હાઈલેવલની બેઠક બાદ સરકારે જણાવ્યું કે, ગભરાવાની બિલકુલ જરૂર નથી. દેશભરમાં આવશ્યક ચીજવસ્તુઓની ઉપલબ્ધતા પર સતત નજર રાખવામાં આવી રહી છે. પુરવઠા શૃંખલાની સ્થિતિસ્થાપકતા સુનિશ્ચિત કરવા માટે દરેક જરૂરી પગલાં લેવામાં આવી રહ્યા છે. ભારતની રિફાઇનિંગ ક્ષમતા 258.1 MTPA છે, જ્યારે સ્થાનિક વપરાશ 243.2 મિલિયન ટન આસપાસ રહ્યો છે. બીજા શબ્દોમાં કહીએ તો, ઉત્પાદન ક્ષમતા વપરાશ કરતાં વધુ છે. ઓઇલ માર્કેટિંગ કંપનીઓ(OMCs)એ આંતરરાષ્ટ્રીય ભાવમાં વધઘટનો સંપૂર્ણ બોજ છૂટક ગ્રાહકો પર નાખવાનું ટાળ્યું છે, બજાર સ્થિરતા જાળવવા માટે આશરે રૂ.550 કરોડનો દૈનિક ખર્ચ ઉઠાવવો પડે છે.
ખાતરની સ્થિતિ મજબૂત, 51% થી વધુ સ્ટોક પહેલેથી જ તૈયાર
ફક્ત ઇંધણ ઉપરાંત સરકારે ખાતરના પુરવઠા અંગે અપડેટ પણ આપ્યું હતું. રવિ અને ખરીફ બંને ઋતુઓ માટે પૂરતો સ્ટોક હોવાનું જણાવ્યું હતું. અધિકારીઓએ જણાવ્યું હતું કે, ખેડૂતોને કોઈપણ પ્રકારની અછતનો સામનો કરવા દેવામાં આવશે નહીં અને કૃષિ ઇનપુટ્સ પર સતત નજર રાખવામાં આવી રહી છે. સરકારે અહેવાલ આપ્યો હતો કે, ખરીફ 2026 સિઝન માટે ખાતરની જરૂરિયાત 390.54 LMT હોવાનો અંદાજ છે. જ્યારે આશરે 200.47 LMT અથવા કુલ જરૂરિયાતના 51%થી વધુ પહેલેથી જ ઉપલબ્ધ છે. જે સામાન્ય સ્તર કરતાં પણ સારી સ્થિતિ છે. અગાઉ આ તબક્કે જાળવવામાં આવેલ બફર સ્ટોક સામાન્ય રીતે 33% ની આસપાસ હતો. સરકારે ખાતરી આપી હતી કે ખેડૂતોને કોઈપણ પ્રકારની અછતનો સામનો કરવો પડશે નહીં.
કાળાબજાર સામે કડક કાર્યવાહી
સરકારે સ્વીકાર્યું છે કે, કાળાબજાર અને ઔદ્યોગિક વપરાશકર્તાઓ દ્વારા છૂટક ઇંધણની ખરીદી જેવી અનિયમિતતાઓ ચોક્કસ ક્ષેત્રોમાં સામે આવી છે. આવા કિસ્સાઓ સામે અમલીકરણના પગલાં વધુ તીવ્ર બનાવવામાં આવ્યા છે. સિસ્ટમમાં કોઈ છટકબારી છોડવામાં આવશે નહીં અને દરેક સ્તરે દેખરેખ ચાલુ રહેશે. જ્યારે MSME ક્ષેત્રને રાહત પૂરી પાડવા બદલ ECLGS 5.0 પહેલની પ્રશંસા કરવામાં આવી હતી, જેનાથી વર્કિંગ કેપિટલનું દબાણ ઘટ્યું છે.
