આ પણ વાંચો ટ્રેન્ડિંગ સમાચાર
Surat Corporation : સુરત મહાનગરપાલિકાના પદાધિકારીઓની નિમણૂક પહેલા ભાજપના કેટલાક દાવેદારોમાં એવો અતિઆત્મવિશ્વાસ છવાઈ ગયો હતો કે જાણે મેયર અને સ્થાયી સમિતિના અધ્યક્ષની ખુરશી તેમના નામે પહેલેથી જ લખાઈ ગઈ હોય. ભલામણો, લોબિંગ, બિલ્ડર-ઉદ્યોગપતિઓના ટેકા અને ગાંધીનગર સુધીની ગોઠવણોના જોરે નામ ફાઈનલ હોવાના દાવા કરતા કેટલાક કોર્પોરેટરો તો પહેલેથી જ પદાધિકારી જેવી સાહેબી કરવા લાગ્યા હતા. કેટલાક દાવેદારો પરિવાર અને ટેકેદારો સાથે ઉજવણીની તૈયારી કરીને પણ પહોંચી ગયા હતા. પરંતુ પ્રદેશના અંતિમ મેન્ડેટ આખું રાજકીય ગણિત પલટી નાખતા ખુરશીના સપનામાં ઉડતા દાવેદારોની હવા એક જ ઝાટકે નીકળી ગઈ હતી.
હાલત એવી બની કે મોટા ભાગના દાવેદારો બીજા દિવસે નવા વરાયેલા પદાધિકારીઓને શુભેચ્છા આપવા પણ પાલિકા કાર્યાલય સુધી આવ્યા નહોતા. છેલ્લા કેટલાક દિવસોથી ભાજપના કેટલાક દાવેદારોમાં એવો અતિઆત્મવિશ્વાસ જોવા મળી રહ્યો હતો કે જાણે મેયર કે સ્થાયી અધ્યક્ષની જાહેરાત માત્ર ઔપચારિકતા જ બાકી હોય. કેટલાક તો પોતાને ફાઈનલ ગણાવી રહ્યા હતા અને નામ જાહેર થાય તે પહેલાં જ પદાધિકારીઓ જેવી વર્તણૂક કરવા લાગ્યા હતા. અગાઉ ભાગ્યે જ પાલિકાના કાર્યક્રમોમાં દેખાતા કેટલાક ચહેરા અચાનક દરેક કાર્યક્રમમાં હાજરી આપવા લાગ્યા હતા અને અધિકારીઓ વચ્ચે પણ પોતાનો રોફ જમાવવાનો પ્રયાસ કરી રહ્યા હતા. ભાજપના અંદરના વર્તુળોમાં એવી ચર્ચા છે કે કેટલાક દાવેદારો પાસે સંગઠનાત્મક કાબેલિયત કે વહીવટી અનુભવ ન હોવા છતાં માત્ર ભલામણ, ગોઠવણો અને પૈસાની તાકાતના આધારે ખુરશી સુધી પહોંચી જવાની ગણતરી ચાલી રહી હતી. કેટલાક દાવેદારોને તો એટલો વિશ્વાસ હતો કે તેઓ નિમણૂંક પહેલા જ પરિવારજનો અને ટેકેદારો સાથે પાલિકા પહોંચી ગયા હતા અને ઉજવણી સુધીની તૈયારી પણ કરી દેવાઈ હતી. પરંતુ પ્રદેશમાંથી નામ જાહેર થતા જ સમગ્ર દ્રશ્ય બદલાઈ ગયું હતું. જે લોકો થોડા કલાકો પહેલા સુધી ભાવિ મેયર અને ભાવિ સ્થાયી અધ્યક્ષની છબી ઉભી કરી રહ્યા હતા તેમના ચહેરા એકાએક ઉતરી ગયા હતા.
આ સમગ્ર ઘટનાક્રમમાં સૌથી વધુ ચર્ચાનો વિષય સ્થાયી સમિતિના એક સભ્યની નારાજગી બની હતી. સ્થાયી અધ્યક્ષ બનવાની આશા રાખતા આ દાવેદારને માત્ર સમિતિમાં સભ્યપદ મળતા જ પાલિકા કાર્યાલય ખાતે શહેર પ્રમુખ સામે બળાપો કાઢ્યો હોવાનું ચર્ચાઈ રહ્યું છે. સ્થાયી અધ્યક્ષ તો બન્યો નહીં, હવે સભ્ય હોવાથી બીજી સમિતિમાં અધ્યક્ષ પણ બની શકીશ નહીં તેવી નારાજગી વ્યક્ત કરી હોવાની પણ અંદરખાને ચર્ચા છે. બીજી તરફ નવા વરાયેલા પદાધિકારીઓને શુભેચ્છા આપવા માટે કોર્પોરેટરો, કાર્યકર્તાઓ અને શુભેચ્છકો પાલિકા કાર્યાલય ખાતે ઉમટી પડ્યા હતા. પરંતુ ખુરશીના સપના જોનારા મોટાભાગના દાવેદારો ગમગીનીમાંથી બહાર ન આવ્યા હોય તેમ આખો દિવસ પાલિકા કેમ્પસમાં પણ જોવા મળ્યા નહોતા.
