આ પણ વાંચો ટ્રેન્ડિંગ સમાચાર
Cash Theft In Manek Chowk Ahmedabad: અમદાવાદના માણેકચોક વિસ્તારમાં ધોળા દિવસે ચોરીની ઘટના સામે આવી છે. સોનાના બિસ્કિટ ખરીદવા જઈ રહેલા એક ઝવેરી પેઢીના કર્મચારીની બેગમાંથી એક ગઠિયો ભરબજારમાં 5 લાખ રૂપિયાથી વધુની રોકડ રકમ સેરવીને રફુચક્કર થઈ ગયો હતો. આ સમગ્ર ઘટના નજીકની દુકાનના સીસીટીવી (CCTV) કેમેરામાં કેદ થઈ ગઈ છે, જેના આધારે ખાડિયા પોલીસે ગુનો નોંધી આરોપીની શોધખોળ આદરી છે.
સોનાના બિસ્કિટ ખરીદવા 45 લાખ રૂપિયા રોકડા લઈને નીકળ્યો હતો કર્મચારી
મળતી માહિતી અનુસાર, મોટેરા વિસ્તારમાં રહેતા અને માણેકચોકની એક જ્વેલર્સ શોપમાં નોકરી કરતા અજયસિંહ રાજપૂતે આ મામલે ખાડિયા પોલીસ સ્ટેશનમાં ફરિયાદ નોંધાવી છે. ગઈકાલે (29મી મે) બપોરે પેઢીના માલિકે અજયસિંહને સોનાના બિસ્કિટ ખરીદવા માટે 45 લાખ રૂપિયાની રોકડ ભરેલી બેગ આપીને નજીકમાં આવેલી એક બુલિયન ઑફિસે મોકલ્યા હતા. અજયસિંહ આ મોટી રકમ ભરેલી બેગ લઈને ચાલતા બુલિયન ઑફિસે પહોંચ્યા હતા. ત્યાં વેપારીએ જ્યારે નાણાંની ગણતરી શરૂ કરી ત્યારે કુલ રકમમાંથી 5.50 લાખ રૂપિયા ઓછા હોવાનું સામે આવ્યું હતું.
સીસીટીવી ફૂટેજ તપાસતા ચોરીનો ભાંડો ફૂટ્યો
નાણાં ઓછા હોવાની જાણ થતાં જ કર્મચારી અજયસિંહે તુરંત શેઠને ફોન કરીને આ અંગે તાણ કરી હતી. ત્યારબાદ વેપારી અને કર્મચારી બંનેએ માણેકચોકના રસ્તા પર આવેલી જુદી-જુદી દુકાનોના સીસીટીવી ફૂટેજ ચેક કર્યા હતા.
આ તપાસ દરમિયાન એક દુકાનના ફૂટેજમાં ચોંકાવનારા દૃશ્યો સામે આવ્યા હતા. સીસીટીવીમાં સ્પષ્ટ દેખાયું હતું કે, જ્યારે અજયસિંહ રોકડ ભરેલી બેગ ભરાવીને રસ્તા પરથી પસાર થઈ રહ્યા હતા અને મોબાઇલમાં વ્યસ્ત હતા, ત્યારે પાછળથી આવેલા એક ગઠિયાએ તેની નજર ચૂકવીને બેગની ચેઇન ખોલી નાખી હતી. ગઠિયો ચપળતાપૂર્વક એક પછી એક એમ નોટોના બંડલ કાઢી લીધા હતા અને 5.50 લાખ રૂપિયાની ચોરી કરીને ભાગી ગયો હતો.
ખાડિયા પોલીસે તપાસના ચક્રો ગતિમાન કર્યા
ભરબજારમાં બનેલી આ ઘટનાને પગલે વેપારી આલમમાં પણ ચિંતા વ્યાપી ગઈ છે. હાલમાં ખાડિયા પોલીસે સીસીટીવી ફૂટેજના આધારે આરોપીની ઓળખ મેળવવા અને તેને ઝડપી પાડવા માટે અલગ-અલગ ટીમો બનાવીને વિવિધ દિશામાં ચક્રો ગતિમાન કર્યા છે.
