આ પણ વાંચો ટ્રેન્ડિંગ સમાચાર
Ahmedabad Underpass Flooding: ચોમાસા દરમિયાન અમદાવાદમાં આવેલા તમામ 25 અંડરબ્રિજમાં પાણી ભરાશે અને ત્યાંથી પસાર થતાં કોઈ નાગરિક અકસ્માતનો ભોગ બનશે તો તેની સંપૂર્ણ જવાબદારી અમદાવાદ મ્યુનિસિપલ કોર્પોરેશનની નહીં પણ નાગરિકની પોતાની રહેશે તેવું અમદાવાદ મ્યુનિસિપલ કોર્પોરેશન દ્વારા જાહેર કરાયું છે.
અકસ્માત કે જાનહાનિ પર AMCના હાથ ઊંચા
ચોમાસા દરમિયાન 1-2 ઇંચ જેટલો સામાન્ય વરસાદ પડે તો પણ અનેક અંડરપાસ પાણીમાં ગરકાવ થઈ જાય છે. હવે અમદાવાદ મ્યુનિસિપલ કમિશનર દ્વારા એવા 25 અંડરપાસની યાદી જાહેર કરવામાં આવી છે, જે ચોમાસા દરમિયાન પાણી ભરાવવાથી મોતનો કૂવો સમાન બની શકે છે. આ સાથે તેમણે ઉમેર્યું છે કે અંદરના કાદવ-કિચડની સફાઈ બાકી હોય તે દરમિયાન, ગેટ બંધ હોય ત્યારે આ અંડરપાસનો ઉપયોગ કરવો નહીં તેવી કડક ચેતવણી આપવામાં આવે છે.
ચેતવણી અવગણશો તો જોખમ તમારું
આ ચેતવણી છતાં વાહનચાલક, રાહદારી અંડરપાસનો ઉપયોગ કરશે અને જેના કારણે જો કોઈ અકસ્માત સર્જાશે કે જાનહાનિ થશે તો તેના માટે અમદાવાદ મ્યુનિસિપલ કોર્પોરેશનની કોઈપણ પ્રકારની જવાબદારી રહેશે નહીં. આવી પરિસ્થિતિમાં અંડરપાસના રસ્તાને બદલે તેની આજુબાજુમાં આવેલા વૈકલ્પિક રસ્તાનો ઉપયોગ કરવામાં આવે.
ખરાબ રસ્તા અને ખાડાઓની ચિંતા
અમદાવાદ હવે કોમનવેલ્થ ગેમ્સની યજમાની કરવા જઈ રહ્યું છે ત્યારે પાણી ભરાય નહીં, રસ્તામાં ખાડા પડે નહીં તેની તકેદારી વધારે રાખવી જોઈએ. જેના સ્થાને કોર્પોરેશન પોતાના પર દોષનો ટોપલો ઢોળાય તો છટકબારી કેવી રીતે શોધવી તેની મથામણમાં અત્યારથી જ છે.
આ પણ વાંચો: નલ સે જલ કૌભાંડ: લુણાવાડા પાલિકાના પૂર્વ પ્રમુખ અને ભાજપ નેતા મનહર પટેલની ધરપકડ
ચોમાસા દરમિયાન કયા અંડરપાસ જોખમી પુરવાર થઈ શકે છે?
સ્ટેડિયમ અંડરપાસ, ઉસ્માનપુરા અંડરપાસ, અખબારનગર અંડરપાસ, નિર્ણયનગર અંડરપાસ, મણિનગર (દક્ષિણી) અંડરપાસ, પરિમલ અંડરપાસ, કુબેરનગર અંડરપાસ, મીઠાખળી અંડરપાસ, જી.એસ.ટી. અંડરપાસ, કાળીગામ ડેમુ અંડરપાસ, આર.વી.એન.એલ. -રેલવે દ્વારા અમદાવાદ-બોટાદ તથા ખોડિયાર રેલવે લાઇન પર તૈયાર કરાયેલા અંડરપાસ, લેવલ ક્રોસિંગ-1સી અંડરપાસ (સિલ્વર સ્ટાર ચાર રસ્તા પાસે), લેવલ ક્રોસિંગ-02 અંડરપાસ (ચેનપુર લેક પાસે), લેવલ ક્રોસિંગ-03 અંડરપાસ (ચાંદલોડિયા લેક પાસે), લેવલ ક્રોસિંગ-06 અંડરપાસ (અગિયારસી માતા મંદિર પાસે, વાડજ), લેવલ ક્રોસિંગ-20 અંડરપાસ (મકરબા ક્રોસિંગ પાસે), લેવલ ક્રોસિંગ-26 અંડરપાસ (ગીન્ની લેક, મકરબા), એલ.સી. 241 અંડરપાસ (ઉમા ભવાની), લેવલ ક્રોસિંગ-242 અંડરપાસ (આઇ.ઓ.સી. રોડ, ચાંદખેડા), કાળીગામ ગરનાળા, લેવલ ક્રોસિંગ-243 (સાબરમતી ડી કેબિન), જલારામ અંડરપાસ (પાલડી).
