આ પણ વાંચો ટ્રેન્ડિંગ સમાચાર
Rajpipla’s Falak Vasava In Asian Championship: નર્મદાના રાજપીપળાની એક સામાન્ય આદિવાસી વિસ્તારની દીકરી ફલક વસાવાએ પોતાના અસાધારણ સપનાઓને પાંખો આપી આજે સમગ્ર એશિયામાં ભારત અને ગુજરાતનું ગૌરવ વધાર્યું છે. હોંગકોંગ, ચાઈના ખાતે 23 અને 24 મે, 2026 દરમિયાન યોજાયેલી બીજી ટ્રેમ્પોલીન જીન્માસ્ટિક એશિયન ચેમ્પિયનશીપમાં ફલકે જુનિયર એજ ગ્રુપની ઇન્ડિવિઝ્યુઅલ વુમન્સ કેટેગરીમાં ભાગ લઈને સમગ્ર એશિયામાં પાંચમું સ્થાન પ્રાપ્ત કર્યું હતું.
લેવલ-3 જીન્માસ્ટિક ઈન્ટરનેશનલ કોચ. ડૉ.હિમાન્સુ ગૌરી શંકર દવેએ જણાવ્યું હતુ કે, ‘ફલક વસાવાની સફળતા એક દિવસમાં મળી નથી. શરૂઆતમાં સાધનોનો અભાવ હતો, યોગ્ય તાલીમની અછત હતી અને અનેક પડકારો સામે ઊભા રહેવું પડતું હતું. પરંતુ ફલકે મુશ્કેલીઓને પોતાની શક્તિ બનાવી. સવાર-સાંજની કઠોર મહેનત, ભણતર સાથે સતત પ્રેક્ટિસ અને કંઈક મોટું કરવાની જિદ્દ તેને સતત આગળ ધપાવતી રહી.’
ફલકે જીન્માસ્ટિક ચેમ્પિયનશીપમાં સમગ્ર એશિયામાં પાંચમું સ્થાન મેળવ્યું
તેમણે વધુમાં જણાવ્યું કે, વર્ષ 2024માં એશિયન ચેમ્પિયનશીપમાં છઠ્ઠું સ્થાન મેળવનાર ફલકે વધારે મહેનત કરી પરિણામે માત્ર બે વર્ષમાં તેણે પોતાનું પ્રદર્શન વધુ સુધારી એશિયામાં પાંચમું સ્થાન હાસલ કર્યું છે.
ફલકની સફળતા પાછળ પરિવારનું અસાધારણ યોગદાન
ફલકની સફળતા પાછળ તેના પરિવારનું અસાધારણ યોગદાન પણ છે. તેના પિતા ચંદ્રકાન્ત વસાવાની કાબિલિયત જોઈને ‘જીન્માસ્ટિક ફેડરેશન ઓફ ઇન્ડિયા’ એ તેમને એશિયન ચેમ્પિયનશીપમાં ભારતીય ટીમના સત્તાવાર કોચ તરીકે નિયુક્ત કરતાં ભારતીય ટીમના કોચ તરીકે તેઓ ફરજ બજાવી રહ્યા હતા, જ્યારે તેમના પરિવારમાંથી મિકેતાબહેન વસાવાએ સપ્ટેમ્બર 2025માં ટ્રેમ્પોલીન ઇન્ટરનેશનલ જજીંગ કોર્સની કપરી પરીક્ષા પાસ કરીને નવો રેકોર્ડ બનાવ્યો હતો. સમગ્ર ભારતમાંથી આ પરીક્ષા પાસ કરનાર તેઓ એકમાત્ર મહિલા બન્યા હતા. એશિયન ટુર્નામેન્ટમાં જીન્માસ્ટિક ફેડરેશન ઓફ ઇન્ડિયા તરફથી તેઓ ઇન્ટરનેશનલ જજ તરીકે હોંગકોંગ ગયા હતા. આ પરિવારની રમત પ્રત્યેની સમર્પણ ભાવના દરેક માટે પ્રેરણારૂપ છે.
ફલકે શું કહ્યું?
ફલક વસાવાએ જણાવ્યું હતું કે, ‘માતા-પિતા, કોચ અને અન્ય માર્ગદર્શકોના સતત સહયોગથી જ હુ આ મુકામ સુધી પહોંચી છું. હવે મારું આગામી લક્ષ્ય 2030માં ભારતમાં યોજાનારી કોમનવેલ્થ ગેમ્સમાં દેશ માટે મેડલ જીતવાનું છે.’
આ પણ વાંચો: VIDEO| અમદાવાદ પ્લેન ક્રેશ: ‘વળતરના 1.25 કરોડ મળતા જ જમાઈએ 6 મહિનામાં બીજા લગ્ન કરી લીધા’, દીકરી ગુમાવનાર માતાનું આક્રંદ
ટ્રેમ્પોલીન જીન્માસ્ટિક: આકાશમાં કરતબો બતાવતી ઓલિમ્પિક રમત
ટ્રેમ્પોલીન ‘જીન્માસ્ટિક એ સામાન્ય જીન્માસ્ટિક કરતાં સાવ અલગ, અત્યંત રોમાંચક અને ઓલિમ્પિક સ્તરની ઓફિશિયલ રમત છે. આ રમતમાં ખેલાડીએ સ્પ્રિંગવાળા અને મજબૂત જાળીદાર બેડ (જેને ટ્રેમ્પોલીન કહેવાય છે) પર સતત ઊંચા કુદકા મારવાના હોય છે. ખેલાડી આ ટ્રેમ્પોલીનની મદદથી હવામાં ઊંચાઈ પર પહોંચે છે, હવામાં અધ્ધર હોય તે સેકન્ડો દરમિયાન ખેલાડીએ પોતાની ક્ષમતા, સંતુલન અને ચપળતાનો ઉપયોગ કરીને હવામાં જ પલટીઓ મારવી, શરીરને અલગ-અલગ એંગલ પર વાળવું અને અદભુત કરતબો બતાવવાના હોય છે. આંતરરાષ્ટ્રીય સ્તરે જજ દ્વારા ખેલાડીના કુદકાની ઊંચાઈ, હવામાં કરાતા કરતબો અને લેન્ડિંગની ચોકસાઈ જોઈને ગુણ આપવામાં આવે છે.
