આ પણ વાંચો ટ્રેન્ડિંગ સમાચાર
મ્યુનિ. કોર્પોરેશનના વર્તમાન બોર્ડની નિમણૂક બાદ કામકાજ અને નીતિગત નિર્ણયોને લઈને પ્રથમ સામાન્ય સભા આગામી ૨૦ જૂને યોજાશે. અગાઉ યોજાયેલી બેઠકમાં માત્ર પદાધિકારીઓની વરણી કરાઈ હતી, જ્યારે હવે વિવિધ વિકાસલક્ષી અને વહીવટી દરખાસ્તો પર ચર્ચા કરી અંતિમ નિર્ણય કરાશે.
વર્ગ-૩ની ટેકનિકલ અને નોન-ટેકનિકલ જગ્યાઓની સીધી ભરતી ગુજરાત ગૌણ સેવા પસંદગી મંડળ મારફતે કરાવવા મ્યુનિ. કમિશ્નરને અધિકૃત કરવાની દરખાસ્ત તેમજ વર્ગ-૧ અને વર્ગ-૨ની જગ્યાઓની સીધી ભરતી ગુજરાત જાહેર સેવા આયોગ મારફતે કરાવવા અંગે પણ કમિશનરને સત્તા સોંપવાનો નિર્ણય લેવાશે.
આગામી અઢી વર્ષના કાર્યકાળ માટે નવ ખાસ સમિતિઓની રચના, તેમના કાર્યક્ષેત્ર, અધિકારો અને સભ્ય સંખ્યા નક્કી કરવાની દરખાસ્ત પણ એજન્ડામાં સામેલ છે. ફાયર વિભાગના અધિકારીઓ તથા કર્મચારીઓને નેશનલ ફાયર સર્વિસ કોલેજ, નાગપુર ખાતે શરૂ થનારા છ માસના કોર્ષમાં સ્વખર્ચે મોકલવા અંગે પણ નિર્ણય કરાશે. ઉપરાંત, વર્ગ-૧માં ટ્રાન્સપોર્ટ મેનેજર (વાહન વ્યવહાર મેનેજર)ની એક નવી જગ્યા મંજૂર કરવાની દરખાસ્ત રજૂ થશે. શહેરની ખાનગી સોસાયટીઓમાં ‘ગ્રાઉન્ડ વોટર રિચાર્જ યોજના’ અમલમાં મૂકવા અંગે નિર્ણય લેવાશે.
ઈ-હબ અને ઇલેક્ટ્રિક સિટી બસ પ્રોજેક્ટના સંચાલન, જાળવણી અને વિવિધ નીતિઓના અમલીકરણ માટે સ્પેશિયલ પર્પઝ વ્હીકલ (એસપીવી) રચી તેને કંપની તરીકે રજિસ્ટર્ડ કરવાની દરખાસ્ત રજૂ થશે. સાથે એના બોર્ડનું પુનઃગઠન અને ઈ બસમાં મહિલાઓ માટે ચાર, વરિષ્ઠ નાગરિકો માટે બે અને દિવ્યાંગજનો માટે એક બેઠક અનામત રાખવા બાબત નિર્ણય અંગેની દરખાસ્ત મંજૂરી માટે રજૂ કરાશે. એડવાન્સ વેરા પ્રોત્સાહક રિબેટ યોજના અમલમાં મૂકવાની દરખાસ્તને પણ મંજૂરી આપવામાં આવશે.
