આ પણ વાંચો ટ્રેન્ડિંગ સમાચાર
અમદાવાદ, સંજીવ રાજપૂત, એબીએનએસ:આઝાદીનો અમૃત કાળ અને સ્વાતંત્ર્ય પર્વની ઉજવણી સમગ્ર દેશમાં હર્ષોલ્લાસ સાથે થઈ છે, ત્યારે અમદાવાદના સરખેજ ખાતે એક અત્યંત ગૌરવશાળી અને પવિત્ર પ્રસંગ યોજાઈ ગયો. પ્રખ્યાત ભાગવત કથાકાર જીગ્નેશદાદાએ સરખેજ કેળવણી મંડળ સંચાલિત શ્રી સાર્વજનિક પ્રાથમિક-માધ્યમિક શાળામાં ૮૦મા સ્વાતંત્ર્ય દિવસના શુભ અવસરે ઉપસ્થિત રહીને ધ્વજવંદન કરવાનો પવિત્ર અવસર પ્રાપ્ત કર્યો હતો.
ઈ.સ. ૧૯૪૬માં સ્થાપિત થયેલી આ ઐતિહાસિક શાળા આઝાદી પૂર્વના ભારતથી લઈને આજ સુધીના શિક્ષણ, સંસ્કાર અને દેશના વિકાસની એક મૂક સાક્ષી રહી છે. સ્વતંત્રતા પૂર્વે રચાયેલા આવા પવિત્ર અને ઐતિહાસિક પરિસરમાં જ્યારે રાષ્ટ્રધ્વજ તિરંગો ફરકાવવામાં આવ્યો, ત્યારે સમગ્ર વાતાવરણ રાષ્ટ્રભક્તિના રંગે રંગાઈ ગયું હતું.
તિરંગાને સાદર નમન કર્યા બાદ જીગ્નેશદાદાએ શાળાના વિદ્યાર્થીઓ, શિક્ષકો અને ગ્રામજનોને સંબોધિત કરતા આઝાદીના સાચા અર્થ વિશે ઊંડું ચિંતન રજૂ કર્યું હતું. તેમણે જણાવ્યું હતું કે, “આઝાદી એ માત્ર એક દિવસ ઉજવણી કરવાનો ઉત્સવ નથી, પરંતુ આઝાદી એ દેશ પ્રત્યેની આપણી જવાબદારીઓને નિષ્ઠાપૂર્વક નિભાવવાનો દ્રઢ સંકલ્પ છે.”
તેમણે ઉમેર્યું કે શિક્ષણ સાથે જો સંસ્કાર અને રાષ્ટ્રપ્રેમ ભળે, તો જ સક્ષમ સમાજનું નિર્માણ થઈ શકે છે. ૧૯૪૬થી શિક્ષણની જ્યોત પ્રજ્વલિત રાખનાર આ શાળામાં આયોજિત આ સમારોહ માત્ર ધ્વજવંદન પૂરતો સીમિત ન રહેતા, ઉપસ્થિત સહુ કોઈ માટે રાષ્ટ્ર નિર્માણના કાર્યોમાં પોતાનું યોગદાન આપવાના સંકલ્પનો પાવન અવસર બની રહ્યો હતો.
આ પ્રસંગે શાળા પરિવાર, વિદ્યાર્થીઓ અને સ્થાનિક અગ્રણીઓએ મોટી સંખ્યામાં હાજરી આપીને સ્વાતંત્ર્ય પર્વની ગૌરવપૂર્ણ ઉજવણી કરી હતી.
