આ પણ વાંચો ટ્રેન્ડિંગ સમાચાર
પૂર્વ કચ્છમાં સંગઠિત ગુનાખોરી પર ગુજસીટોકનો ઘા
સમાજમાં ભય ફેલાવનાર અને કાયદાની અવગણના કરનાર શખ્સો વિરુદ્ધ હજુ પણ આવી જ કાર્યવાહી થશે
ગાંધીધામ: સંગઠિત ગુનાખોરીને મૂળમાંથી નાબૂદ કરવા માટે પૂર્વ કચ્છ પોલીસે ગુજરાત કન્ટ્રોલ ઓફ ટેરરિઝમ એન્ડ ઓર્ગેનાઇઝ્ડ ક્રાઇમ એક્ટ-૨૦૨૫ હેઠળ મહત્વપૂર્ણ અને કડક કાર્યવાહી હાથ ધરી છે. જેમાં ટોળકી બનાવી ગુનાખોરી કરતા અંજારનાં ત્રણ માથાભારે ઈસમો સામે અંજાર પોલીસે ગુજસીટોકની ભારે ભરખમ કલમો હેઠળ કાર્યવાહી કરી તેમની અટક કરી છે.
આ બાબતે મળતી વિગતો પ્રમાણે પૂર્વ કચ્છમાં લાંબા સમયથી ગંભીર અને પુનરાવતત ગુનાઓમાં સંડોવાયેલા તથા સમાજમાં ભયનું વાતાવરણ ઉભું કરતા આરોપીઓ ૩૨ વર્ષીય ખુશાલ રમેશગર ગોસ્વામી (રહે. મેઘપર બોરીચી અંજાર), ૨૭ વર્ષીય દેવાંગ દિલીપભાઈ ચાવડા (રહે. અંજાર) અને કિશોર ઉર્ફે રામ નાનુગર બાવા (રહે. વિજયનગર, અંજાર) સામે લૂંટ, દારૂ, મારામારી, ધમકી, ગેરકાયદેસર વસુલાત અને એટ્રોસિટી એક્ટ સહિતના વિવિધ ગુનાઓ નોંધાયેલા હોવાનું તપાસ દરમિયાન ખુલ્યું છે. ત્રણેય આરોપીઓ સંગઠિત ગુનાખોરીના નેટવર્ક સાથે સંકળાયેલા રહી કાયદો-વ્યવસ્થાને પડકાર આપતા હોવાનું સામે આવતા અંજાર પોલીસ દ્વારા ત્રણેય આરોપી સામે ગુજસીટોકની કલમો હેઠળ કાર્યવાહી કરવામાં આવી હતી. ત્રણેય આરોપીઓ વિરુદ્ધ પોલીસે પુરાવા આધારિત તપાસ બાદ ગુજસીટોક એક્ટની કલમો હેઠળ કાર્યવાહી હાથ ધરી છે. પોલીસ તંત્ર દ્વારા કરવામાં આવેલી આ કાર્યવાહીથી ગુનાખોરી સાથે સંકળાયેલા તત્વોમાં હડકંપ મચ્યો છે. પોલીસે સ્પષ્ટ સંદેશ આપ્યો છે કે સમાજમાં ભય ફેલાવનાર, સંગઠિત ગુનાખોરી ચલાવનાર અને કાયદાની અવગણના કરનાર તત્વો સામે આવનારા દિવસોમાં પણ આવી જ કડક કાર્યવાહી ચાલુ રહેશે. આરોપી ખુશાલ સામે ૭, દેવાંગ સામે ૪ અને કિશોર ઉર્ફે રામ સામે કુલ ત્રણ ગંભીર ગુનાઓ નોંધાયેલા છે.
– ગુજસીટોક કાર્યવાહીમાં અંજાર પોલીસ સરહદી રેન્જમાં મોખરે
સંગઠિત ગુનાખોરી સામે ગુજરાત કન્ટ્રોલ ઓફ ટેરરિઝમ એન્ડ ઓર્ગેનાઇઝ્ડ ક્રાઇમ એક્ટ૨૦૨૫ હેઠળ કાર્યવાહી કરવામાં પૂર્વ કચ્છની અંજાર પોલીસ સમગ્ર સરહદી રેન્જમાં મોખરે રહી છે. ગંભીર અને પુનરાવતત ગુનાઓમાં સંડોવાયેલા કુખ્યાત આરોપીઓ સામે પુરાવા આધારિત, કાયદેસર અને અસરકારક કાર્યવાહી કરીને અંજાર પોલીસે રેન્જમાં નોંધપાત્ર સિદ્ધિ હાંસલ કરી છે. પોલીસ સૂત્રના જણાવ્યા મુજબ અત્યાર સુધી સરહદી રેન્જમાં બનાસકાંઠામાં ૧, પાટણમાં ૧, ભુજમાં ૧ અને એકલા પૂર્વ કચ્છમાં કુલ ૬ ગુજસીટોક હેઠળની કાર્યવાહી કરવામાં આવી છે. જેમાં પૂર્વ કચ્છમાં પણ ગાંધીધામ એ-ડિવિઝન પોલીસે એક , બી-ડિવિઝન પોલીસે બે અને અંજાર પોલીસે ગુજસીટોક હેઠળ કુલ ૩ ગુના દાખલ કરી સમગ્ર રેન્જમાં મોખરે રહી છે.
