આ પણ વાંચો ટ્રેન્ડિંગ સમાચાર
ભારત સરકારના કેન્દ્રીય મંત્રી અને પોરબંદરના સાંસદ શ્રી ડૉ. મનસુખભાઈ માંડવિયાએ સમસ્ત ગુજરાત અને દેશ-વિદેશમાં વસતા તમામ શ્રદ્ધાળુ ભાઈ-બહેનોને સૌરાષ્ટ્રની પાવન ધરા પર પ્રગટેલા અનંત ઊર્જાના સ્ત્રોત, ભક્તિ અને સેવાના પર્યાય સમાન સંત શિરોમણી પૂજ્ય જલારામ બાપાની ૨૨૭મી જન્મ જયંતીના પાવન અવસરે હૃદયપૂર્વકની અને ભક્તિભાવ સભર શુભેચ્છાઓ પાઠવી છે.
આ દિવ્ય અવસરે પોતાના અંતરના ભાવો વ્યક્ત કરતા મંત્રીશ્રીએ જણાવ્યું હતું કે, આપણી સનાતન ભારતીય સંસ્કૃતિ અને તેમાં પણ વિશેષ કરીને ગુજરાત અને સૌરાષ્ટ્રની સંત અને શૂરવીરની ધરા અગણિત મહાપુરુષોના તપ, બલિદાન અને સેવાથી પવિત્ર થયેલી છે, જેમાં વીરપુર મુકામે જન્મેલા પૂજ્ય જલારામ બાપાનું નામ સેવા, સમર્પણ અને ‘અન્નદાન એ જ મહાદાન’ના પરમ આદર્શ તરીકે ઇતિહાસના પાનાઓ પર સુવર્ણ અક્ષરે અંકિત થયેલું છે.
“દેને કો ટુકડા ભલો, લેને કો હરિ નામ” ના ભક્તિમય અને સેવામય મંત્રને પોતાના જીવનનો શ્વાસ બનાવીને, ભૂખ્યાને ભોજન અને નિરાધારને આધાર આપવાની જે દિવ્ય જ્યોત પૂજ્ય બાપાએ વીરપુરની પવિત્ર ભૂમિ પર પ્રગટાવી હતી, તે આજે સદીઓ વીતી જવા છતાં અને તેમની ૨૨૭મી જન્મ જયંતીની ઉજવણીના આજના આ ઐતિહાસિક મુકામે પણ અખંડ સદાવ્રત રૂપે સંપૂર્ણ તેજથી પ્રજ્વલિત છે જે સમગ્ર માનવજાત માટે અત્યંત ગૌરવ, આદર અને પ્રેરણાની બાબત છે.
પૂજ્ય બાપાએ પોતાના સંપૂર્ણ જીવનકાળ દરમિયાન કોઈપણ જાતના નાત-જાત, ઊંચ-નીચ કે અમીર-ગરીબના ભેદભાવ વિના માત્ર અને માત્ર ‘દરિદ્ર નારાયણ’ની સેવામાં જ ઈશ્વરનો સાક્ષાત્કાર કર્યો હતો અને તેમની એ નિઃસ્વાર્થ માનવસેવાની તથા પ્રભુ શ્રી રામ પ્રત્યેની અતૂટ શ્રદ્ધાની સુવાસ આજે માત્ર ગુજરાત પૂરતી સીમિત ન રહેતા સમગ્ર વિશ્વમાં જ્યાં જ્યાં ગુજરાતીઓ વસે છે ત્યાં એક દિવ્ય ચેતના સ્વરૂપે વ્યાપેલી છે.
કેન્દ્રીય મંત્રીશ્રીએ વધુમાં ઉમેર્યું હતું કે, આદરણીય પ્રધાનમંત્રી શ્રી નરેન્દ્રભાઈ મોદીના સક્ષમ અને દ્રષ્ટિવંત નેતૃત્વમાં જ્યારે કેન્દ્ર સરકાર “સબકા સાથ, સબકા વિકાસ, સબકા વિશ્વાસ અને સબકા પ્રયાસ” ના મૂળભૂત મંત્ર સાથે સમાજના છેવાડાના માનવીના ઉત્કર્ષ અને ગરીબ કલ્યાણ માટે અવિરતપણે કાર્યરત છે, ત્યારે સરકારની આ તમામ જનકલ્યાણકારી નીતિઓ અને અંત્યોદયના પ્રકલ્પોના મૂળમાં પણ પૂજ્ય જલારામ બાપા જેવા જ મહાન સંતોએ ચીંધેલો ‘સેવા પરમો ધર્મ:’ નો ઉચ્ચ આદર્શ અને ગરીબોના આંસુ લૂછવાની ઉદાત્ત ભાવના જ રહેલી છે. પૂજ્ય જલારામ બાપાનું જીવન એ માત્ર એક સંતનું જીવન નથી પરંતુ તે માનવતા, કરુણા, દયા, બંધુત્વ અને સદભાવનાનું એક એવું જીવંત અને શાશ્વત મહાકાવ્ય છે જે આવનારી અનેક પેઢીઓ સુધી સમગ્ર સમાજને નિસ્વાર્થ કર્મનો અને માનવ સેવા નો સચોટ માર્ગ બતાવતું રહેશે.
આજે જ્યારે સમગ્ર ગુજરાત અને વિશ્વભરના શ્રદ્ધાળુઓ બાપાની ૨૨૭મી જન્મ જયંતી અત્યંત હર્ષોલ્લાસ અને ભક્તિભાવથી ઉજવી રહ્યા છીએ, ત્યારે આપણે માત્ર તેમની આરતી કે પૂજા-અર્ચના પૂરતા સીમિત ન રહેતા, તેમના દ્વારા સ્થાપિત કરાયેલા સેવાના અને સદાવ્રતના મૂલ્યોને આપણા દૈનિક જીવનમાં ઊંડાણપૂર્વક ઉતારીને, આપણી આસપાસ રહેલા જરૂરિયાતમંદ અને પીડિત લોકોની યથાશક્તિ મદદ કરવા માટે સાચા અર્થમાં સંકલ્પબદ્ધ થઈએ એ જ પૂજ્ય બાપાના ચરણોમાં સાચી શ્રદ્ધાંજલિ અને વંદના ગણાશે. હું પૂજ્ય જલારામ બાપાના દિવ્ય અને જ્યોતિર્મય ચરણોમાં ભાવપૂર્વક શિશ ઝુકાવીને કોટિ કોટિ વંદન કરું છું અને બાપાના આશીર્વાદ સમગ્ર દેશવાસીઓ અને ગુજરાતની જનતા પર સદાય અવિરત વરસતા રહે, સૌના જીવનમાં સુખ, શાંતિ, સમૃદ્ધિ અને ઉત્તમ સ્વાસ્થ્ય બની રહે તેમજ રાષ્ટ્ર નિર્માણના આ મહાન અને પવિત્ર કાર્યમાં સૌ નાગરિકોને એક થઈને પૂરી નિષ્ઠાથી આગળ વધવાની નૈતિક અને આધ્યાત્મિક શક્તિ પ્રાપ્ત થાય તેવી પ્રભુ શ્રી રામ અને પૂજ્ય જલારામ બાપાના ચરણોમાં અંતઃકરણપૂર્વકની પ્રાર્થના કરું છું અને અંતમાં ફરી એકવાર, સમસ્ત ગુજરાતની ધર્મપ્રેમી જનતા અને દેશ-વિદેશના તમામ ભક્તજનોને હૃદયના ઊંડાણથી ‘જય જલારામ’ના નાદ સાથે બાપાની ૨૨૭મી જન્મ જયંતીની અનંત મંગળકામનાઓ અને ખૂબ ખૂબ શુભકામનાઓ અર્પણ કરું છું.
