આ પણ વાંચો ટ્રેન્ડિંગ સમાચાર
અમદાવાદ : વર્તમાન નાણાંકીય વર્ષમાં અત્યાર સુધીમાં સરકારી ઈ-માર્કેટપ્લેસ (જેમ) દ્વારા માલ અને સેવાઓની ખરીદી રૂ. ૪ લાખ કરોડને વટાવી ગઈ છે. વિવિધ મંત્રાલયો અને વિભાગો દ્વારા ૫૦ લાખથી વધુ ખરીદી અને વેચાણના ઓર્ડર આપવામાં આવ્યા છે.
જાણકારોએ જણાવ્યું હતું કે લગભગ ૪૫ ટકા જાહેર ખરીદીના ઓર્ડર સૂક્ષ્મ, નાના અને મધ્યમ ઉદ્યોગો (એમએસએમઈ)ને આપવામાં આવ્યા છે, જે ૨૫ ટકાની ફરજિયાત જરૂરિયાત કરતાં વધુ છે.
કેન્દ્રીય મંત્રાલયો અને વિભાગો દ્વારા માલ અને સેવાઓની ઓનલાઈન ખરીદી માટે સરકારી ઈ-માર્કેટપ્લેસ પોર્ટલ ૯ ઓગસ્ટ, ૨૦૧૬ના રોજ શરૂ કરવામાં આવ્યું હતું. શરૂઆતથી અત્યાર સુધીની વાત કરીએ તો આ પોર્ટલ દ્વારા રૂ. ૧૭.૩૩ લાખ કરોડની સરકારી ખરીદી કરવામાં આવી છે.
નાણાકીય વર્ષ ૨૦૨૫-૨૬માં અત્યાર સુધીમાં જેમ પોર્ટલ પર ૪ લાખ કરોડ રૂપિયાના ૫૦ લાખથી વધુ ખરીદીના ઓર્ડર પ્રાપ્ત થયા છે. અપેક્ષા છે કે આ ખરીદી ગત વર્ષના સ્તરને વટાવી જશે. નાણાકીય વર્ષ ૨૦૨૪-૨૫માં પોર્ટલ પર ૭૨ લાખ ઓર્ડર આપવામાં આવ્યા હતા, જેની કિંમત ૫.૪૩ લાખ કરોડ રૂપિયા હતી.
ગવર્મેન્ટ ઈ-માર્કેટપ્લેસ પાસે હાલમાં ૧.૫ લાખથી વધુ સરકારી ખરીદદારો અને ૬૨ લાખથી વધુ વિક્રેતાઓ અને સેવા પ્રદાતાઓ છે, જે વિવિધ ઉત્પાદનો અને સેવાઓ પ્રદાન કરે છે. હાલમાં, સરકારી વિભાગો, મંત્રાલયો, જાહેર ક્ષેત્રના એકમો, રાજ્ય સરકારો અને કેન્દ્રીય સશસ્ત્ર પોલીસ દળો આ પોર્ટલ દ્વારા વ્યવહાર કરી શકે છે.
