આ પણ વાંચો ટ્રેન્ડિંગ સમાચાર
વડોદરાઃ બરોડા ડેરીની ચૂંટણીના મુદ્દે હાઇકોર્ટનું કડક વલણ જોતાં વહીવટીતંત્ર દ્વારા કોર્ટમાં વધુ કાર્યવાહી ચાલે તે પહેલાં જ તા.૧૮ મી માર્ચે ચૂંટણી યોજવાનો કાર્યક્રમ રજૂ કરવામાં આવ્યો હતો.
વડોદરા જિલ્લા દૂધ ઉત્પાદક સંઘ લિ.(બરોડા ડેરી)ના વર્તમાન બોર્ડ ઓફ ડિરેક્ટર્સની ગઇ તા.૨૮મી ડિસેમ્બરે મુદત પુરી થતાં કલેક્ટરે પ્રાંત અધિકારીની ચૂંટણી અધિકારી તરીકે નિમણૂક કરી હતી.પરંતુ ત્યારબાદ કોઇને કોઇ કારણસર ચૂંટણી પાછી ઠેલવામાં આવતી હતી.
બોર્ડ ઓફ ડિરેક્ટર્સની ૧૩ બેઠકો માટે ચૂંટણી યોજવા અને સહકારી સંસ્થાની ચૂંટણી માટે હાઇકોર્ટના ડાયરેક્શનના ભંગ બદલ બરોડા ડેરીએ હાઇકોર્ટમાં દાદ માંગી હતી. જેમાં કોર્ટનું કડક વલણ જોતાં ચૂંટણી અધિકારી અને વડોદરા કલેક્ટર ઘૂંટણિયે પડી ગયા હતા અને કોર્ટ સમક્ષ આજે ચૂંટણીનો કાર્યક્રમ રજૂ કર્યો હતો.
જે કાર્યક્રમ મુજબ બરોડા ડેરીના ચૂંટણી તા.૧૮મી માર્ચે જાહેર કરવામાં આવી છે અને તે જ દિવસે સાંજે ૪ વાગ્યા બાદ મતગણતરી કરવામાં આવનાર છે.ત્યાર પહેલાં તા.૨૧ થી ૨૬ ફેબુ્રઆરી સુધી ઉમેદવારી પત્રો ભરવામાં આવનાર છે.
તા.૨૮મી ફેબુ્રઆરીએ ઉમેદવારી પત્રોની ચકાસણી કરવામાં આવશે અને ત્યાર બાદ તા.૩થી ૭ માર્ચ સુધી ફોર્મ પરત ખેંચવામાં આવશે.જ્યારે,તા.૯મી માર્ચે આખરી મતદાર યાદી પ્રસિધ્ધ કરવામાં આવનાર છે.
બરોડા ડેરીની ચૂંટણીનો કાર્યક્રમ
– તા.૭-૨-૨૦૨૬ઃ કામચલાઉ મતદાર યાદીની પ્રસિધ્ધિ
– તા.૧૩-૨-૨૦૨૬ સુધી મતદાર યાદી સામે વાંધા-સૂચનો
– તા.૧૭-૨-૨૦૨૬ઃ વાંધાઓનો નિકાલ
– તા.૧૯-૨-૨૦૨૬ઃ આખરી મતદાર યાદી પ્રસિધ્ધ
– તા.૨૧-૨ થી ૨૬-૨ઃ ઉમેદવારી પત્રો મેળવવા-ભરવા
– તા.૨૮-૨-૨૦૨૬ઃ ઉમેદવારી પત્રોની ચકાસણી
– તા.૨-૩-૨૦૨૬ઃ માન્ય ઉમેદવારોની યાદી પ્રસિધ્ધિ
– તા.૩-૩-થી ૭-૩ઃ ઉમેદવારી પત્રો પાછા ખેંચવા
– તા.૯-૩-૨૦૨૬ઃ હરીફ ઉમેદવારોની આખરી યાદી પ્રસિધ્ધિ
– તા.૧૮-૩-૨૦૨૬ઃ સવારે ૯થી ૩ સુધી મતદાન અને બપોરે ૪ પછી મતગણતરી
બરોડા સેન્ટ્રલ બેન્ક અને જિલ્લાની પાંચ એપીએમસીની ચૂંટણીઓ ક્યારે થશે
વડોદરા જિલ્લા સહકારી સંઘના પ્રમુખ- ઉપપ્રમુખની ચૂંટણી પણ હજી થઇ નથી
બરોડા ડેરીએ હાઇકોર્ટમાં દાદ માગતા તેની ચૂંટણી જાહેર કરી દેવામાં આવી છે.પરંતુ વડોદરા જિલ્લાની બીજી સહકારી સંસ્થાઓની ચૂંટણીઓનું કોકડું હજી યથાવત્ રહ્યું છે અને તેઓ પણ કોર્ટમાં જવાની તૈયારી કરી રહ્યા છે.
વડોદરા જિલ્લા સહકારી સંઘની તાજેતરમાં ચૂંટણી થતાં ભાજપને બહુમતી મળી છે.પરંતુ તેના ચેરમેનની ચૂંટણી ઘોંચમાં પડી છે.આવી જ રીતે વડોદરા જિલ્લાની સૌથી જૂની અને મોટી સહકારી સંસ્થા બરોડા સેન્ટ્રલ બેન્કની પણ ટર્મ પુરી થઇ ગઇ છે પણ તેની પણ ચૂંટણી જાહેર કરવામાં આવી નથી.
તો વડોદરા જિલ્લાની ડભોઇ અને કરજણ એપીએમસીની ચૂંટણીઓમાં નવું બોર્ડ બની ગયું છે.પણ તેના ચેરમેનની ચૂંટણી જાહેર કરવામાં આવતી નથી.જ્યારે,શિનોર, સાવલી અને કરજણ એપીએમસીની પણ અઢી વર્ષની બીજી ટર્મ માટેના ચેરમેનની ચૂંટણીની લાંબા સમયથી રાહ જોવાઇ રહી છે.
