આ પણ વાંચો ટ્રેન્ડિંગ સમાચાર
26 ફેબુ્રઆરીથી ધોરણ 10 અને 12ની બોર્ડની પરીક્ષાનો પ્રારંભ
એસએસસીમાં સૌથી વધુ ૨૯,૭૨૪, જ્યારે એચએસસી સામાન્ય પ્રવાહમાં ૧૫,૪૨૦, વિજ્ઞાાન પ્રવાહમાં ૨,૨૬૧ વિદ્યાર્થીઓ નોંધાયા
નડિયાદ: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા આગામી ૨૬ ફેબુ્રઆરીથી લેવાનારી ધોરણ ૧૦ અને ૧૨ની પરીક્ષા માટે ખેડા જિલ્લા વહીવટી તંત્ર સજ્જ બન્યું છે. જિલ્લાના કુલ ૬૯ સેન્ટરો પરથી ૪૭,૪૦૫ પરીક્ષાર્થીઓ શાંતિપૂર્ણ માહોલમાં પરીક્ષા આપી શકે તે માટે ૨,૫૬૧ કર્મચારીઓની નિમણૂક સાથેની તમામ તૈયારીઓ પૂર્ણ કરી લેવામાં આવી છે.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ૨૬ ફેબુ્રઆરીથી રાજ્યવ્યાપી પરીક્ષાઓનો પ્રારંભ થઈ રહ્યો છે. ખેડા જિલ્લામાં આ પરીક્ષાઓ ગેરરીતિ મુક્ત અને શાંતિપૂર્ણ વાતાવરણમાં યોજાય તે માટે જિલ્લા શિક્ષણ વિભાગે એક્શન પ્લાન તૈયાર કર્યોે છે. આ વર્ષે જિલ્લામાં એસએસસી અને એચએસસીના કુલ ૪૭,૪૦૫ વિદ્યાર્થીઓ નોંધાયા છે, જેમના માટે ૬૯ પરીક્ષા કેન્દ્રોના ૧૭૩ મકાનોમાં બેઠક વ્યવસ્થા ગોઠવવામાં આવી છે. પરીક્ષાર્થીઓની વિગતો જોઈએ તો, એસએસસીમાં સૌથી વધુ ૨૯,૭૨૪ વિદ્યાર્થીઓ પરીક્ષા આપશે. જ્યારે એચએસસી સામાન્ય પ્રવાહમાં ૧૫,૪૨૦ અને વિજ્ઞાાન પ્રવાહમાં ૨,૨૬૧ વિદ્યાર્થીઓ નોંધાયા છે. આ તમામ પરીક્ષાર્થીઓ માટે કુલ ૧,૬૨૯ બ્લોકમાં પરીક્ષા લેવામાં આવશે.
પરીક્ષા દરમિયાન કોઈ અનિચ્છનીય ઘટના ન બને અને પારદશતા જળવાઈ રહે તે માટે કુલ ૨,૫૬૧ અધિકારીઓ અને કર્મચારીઓ કાર્યરત રહેશે. જેમાં ૧,૭૩૦ બ્લોક સુપરવાઈઝર, ૧૭૩ સ્થળ સંચાલકો અને તેટલી જ સંખ્યામાં વહીવટી તેમજ વર્ગ-૪ ના કર્મચારીઓનો સમાવેશ થાય છે. આ ઉપરાંત ઝોનલ કચેરી ખાતે ૫૦ કર્મચારીઓ અને ૧૭૩ સરકારી પ્રતિનિધિઓ તૈનાત રહેશે. જિલ્લા સંકલન સમિતિના વર્ગ-૧ અને વર્ગ-૨ના ૬૯ અધિકારીઓ સહિત સ્ક્વોડની ટીમ પણ સતત નિરીક્ષણ કરશે.
