– ઘરે આવી ભત્રીજાએ કાકાને મારી નાખવાની ધમકી આપી
– કાકાએ જમીન અને વ્યવસાયની પાવર ઓફ એટર્ની ભત્રીજાને આપી હતી
ભાવનગર : બોટાદના પાળીયાદ રોડ પર આવેલા કરીમનગરમાં રહેતા કાકાને ભત્રીજાએ રિવોલ્વર બતાવી ધમકી અને ગાળો આપી રૂ.૭ કરોડની ખંડણી માગી હોવાની ફરિયાદ બોટાદ પોલીસ મથકમાં નોંધાઈ છે.
બોટાદના પાળીયાદ રોડ પર આવેલા કરીમનગર પાસેના એપાર્ટમેનમાં રહેતા અને કન્સ્ટ્રક્શનનો વ્યવસાય કરતા મન્સૂરીઅલી પ્યારઅલી હમીદને વર્ષ-૨૦૨૦ની જાન્યુઆરી માસમાં હાર્ટએટેક આવ્યો હતો અને બીમારીમાં સપડાઈ જતા મન્સૂરીઅલીએ એવુ નક્કી કર્યું હતું કે, બોટાદમાં આવેલી મન્સૂરીઅલીની જમીનો તથા અન્ય મીલકતનો વહીવટ અને ડેવલપ કરી વેચાણે આપવા અને તેમાંથી જે નફો થાય તેના ૨૦ ટકા હિસ્સો આપવા ભત્રીજા દિલાવર મદદઅલી હમીદને પાવર ઓફ એટર્ની કરી બોટાદ, જસદણ તથા તાજપરની જમીનો હતી તે તેને સુપ્રત કરી તેના હવાલે કરી આપી હતી અને ભત્રીજા દિલાવરે કન્સ્ટ્રક્શનનું કામ ચાલુ રાખવા તથા અન્ય માલ સામાનની ચુકવણી કરવા ટુકડે-ટુકડે રૂ.૪ કરોડ કાકા મન્સૂરીઅલી પાસેથી રોકડા લીધા હતા. દરમિયાનમાં ભત્રીજાએ કાકાને રકમનો એલફેલ અને ઉડાઉ ખોટો હિસાબ આપ્યા હતા અને ભત્રીજા દિલાવરની નિયત ખરાબ થતા મન્સૂરીઅલી પાસે નાણાકીય તોડ કરવા સારૂ અવાર-નવાર મોટી રકમની માંગણી અને બાંધકામ શરૂ રાખવા ખંડણીની માંગણી કરી હતી. મન્સૂરીઅલીએ તેને કોઇ રકમ નહી આપતા પરીવારજનોને અવાર-નવાર ધાક ધમકી તથા બીભત્સ ગાળો આપતો હતો. તેવામાં તા.૧૩ ફેબુ્રઆરી ૨૦૨૬ની રાત્રીના ત્રણ કલાકે ભત્રીજો દિલાવર રિવોલ્વર સાથે મન્સૂરીઅલીના ઘરે ધસી આવી ઘરના દરવાજાને પાટા મારી અને રીવોલ્વર પછાડીને કહેલ કે, બહાર નીકળ આજ તો તને પતાવી જ દેવો છે. આજે તારૂ પુરૂ કરી નાખવુ છે તેમ કહી રૂ.૦૭ કરોડની ખંડણી માગી ગાળો આપી નાસી છૂટયો હતો. આ બનાવ સંદર્ભે મન્સૂરીઅલીએ ભત્રીજા વિરૂધ્ધ બોટાદ ટાઉન પોલીસ મથકમાં ફરિયાદ નોંધાવી છે.
