આ પણ વાંચો ટ્રેન્ડિંગ સમાચાર
PM Modi Assam Visit : વડાપ્રધાન નરેન્દ્ર મોદી શનિવારે આસામના પ્રવાસે છે. પીએમ ચાબુઆ એરફિલ્ડ પહોંચ્યા, ત્યારબાદ તેઓ વાયુસેનાના C-130 એરક્રાફ્ટ દ્વારા ડિબ્રુગઢના મોરાન બાયપાસ પર ઇમરજન્સી લેન્ડિંગ ફેસિલિટી (ELF) માટે રવાના થયા હતા. પીએમનું પ્લેન ડિબ્રુગઢ પાસે મોરાન બાયપાસ પર બનેલી ELF પર ઉતર્યું હતું. આ એરસ્ટ્રિપ સૈન્ય વ્યૂહરચના માટે અત્યંત મહત્વની છે, કારણ કે આ વિસ્તાર ચીન સરહદથી માત્ર 300 કિમી દૂર છે.
ભારતનાં તમામ પ્લેન લેન્ડિંગ ફેસિલીટી પર ઉતર્યા
પૂર્વોત્તર ભારતમાં કટોકટીના સમયે મિલિટરી અને સિવિલ એરક્રાફ્ટના લેન્ડિંગ અને ટેક-ઓફમાં મદદ કરવા માટે વાયુસેનાએ ખાસ ELF બનાવી છે. આ સુવિધાથી પૂર્વોત્તરમાં કુદરતી આફતો કે યુદ્ધ જેવી સ્થિતિમાં બચાવ અને રાહત કામગીરીમાં વેગ આવશે. પીએમની હાજરીમાં ELF પર રાફેલ અને સુખોઈ સહિત 16 લડાયક વિમાનો એરિયલ શો કરી રહ્યા છે. આ દરમિયાન વિમાનો હાઈવે પરથી જ લેન્ડિંગ અને ટેક-ઓફ કરીને નિદર્શન કરી રહ્યા છે. આ ડેમો અંદાજે 30-40 મિનિટનો રહેશે.
પીએમ મોદીએ હેલિકોપ્ટરનું એરિયલ ડિસ્પ્લે પણ નિહાળ્યું
મોદી ફાઈટર, ટ્રાન્સપોર્ટ એરક્રાફ્ટ અને હેલિકોપ્ટરનું 40 મિનિટનું એરિયલ ડિસ્પ્લે પણ નિહાળશે. ત્યારબાદ તેઓ ELF થી C-130 માં સવાર થઈને પોતાના પ્રવાસના બીજા ભાગ માટે ગુવાહાટી રવાના થશે. પીએમ આસામ માટે ₹5,450 કરોડના પ્રોજેક્ટ્સનું ઉદ્ઘાટન પણ કરશે. છેલ્લા ત્રણ મહિનામાં પીએમ મોદીનો આ ત્રીજો આસામ પ્રવાસ છે. આસામમાં આ વર્ષે વિધાનસભાની ચૂંટણી યોજાવાની છે. રાજ્યમાં 2016 થી સતત બે વાર NDA ની સરકાર બની છે, જેની પહેલા 2001-2016 સુધી કોંગ્રેસની સરકાર હતી.
આસામમાં બનેલી પૂર્વોત્તરની પ્રથમ ઇમરજન્સી લેન્ડિંગ ફેસિલિટી
મોરાન એરસ્ટ્રિપ NH-127 ના 4.4 કિલોમીટર લાંબા હિસ્સા પર બનાવવામાં આવી છે. આ ભારતની એવી પ્રથમ ઇમરજન્સી લેન્ડિંગ ફેસિલિટી (ELF) છે, જેનો ઉપયોગ સેના અને સિવિલ વિમાનો બંને માટે કરી શકાશે.
ELF નો અર્થ એ છે કે યુદ્ધ અને કટોકટી જેવી સ્થિતિમાં વિમાનોને હાઈવે પર જ ઉતારી શકાય અને ત્યાંથી જ ઉડાન ભરી શકાય તેવી વ્યવસ્થા હોય. આનાથી રસ્તાનો બેવડો ફાયદો થાય છે – રોજિંદા ટ્રાફિક માટે અને સૈન્ય જરૂરિયાતો માટે.
‘ડ્યુઅલ-યુઝ ઇન્ફ્રાસ્ટ્રક્ચર’ ના કોન્સેપ્ટ પર તૈયાર કરાયેલી આ ELF 40 ટન સુધીના ફાઈટર એરક્રાફ્ટ અને 74 ટન સુધીના મહત્તમ વજન ધરાવતા ટ્રાન્સપોર્ટ એરક્રાફ્ટને હેન્ડલ કરવામાં સક્ષમ છે.
અત્યારે કેટલી જગ્યાએ છે આ સુવિધા?
રાજસ્થાન: બાડમેર (NH-925A)
ઉત્તર પ્રદેશ: આગ્રા-લખનૌ એક્સપ્રેસ-વે
ઉત્તર પ્રદેશ: પૂર્વાંચલ એક્સપ્રેસ-વે
ઓડિશા: બાલાસોર (NH-16)
આંધ્રપ્રદેશ: નેલ્લોર (NH-16)
ભારતીય વાયુસેના અને NHAI એ મળીને દેશમાં કુલ 28 સ્થળોએ આવી સુવિધા વિકસાવવાની યોજના બનાવી છે. આસામમાં હાઈવે આધારિત આ ઇમરજન્સી લેન્ડિંગ ફેસિલિટીની એક મોટી ખાસિયત એ પણ છે કે તે ચીન સરહદની ખૂબ જ નજીક આવેલી છે.
