આ પણ વાંચો ટ્રેન્ડિંગ સમાચાર
વડોદરા,શુક્રવારની મોડીરાતે બહેનપણીઓ સાથે થાર જીપ લઇને લગ્નમાંથી પરત આવતી ૧૯ વર્ષની વિદ્યાર્થિનીએ સનફાર્મારોડ પર એક મોપેડ સવાર યુવકને ટક્કર મારીહતી. યુવકને ગંભીર ઇજા થતા ઘટના સ્થળે જ તેનું મોત થયું હતું. અટલાદરા પોલીસે ગુનો દાખલ કરી કારચાલક યુવતીની ધરપકડ કરી છે.
અટલાદરા શિવાજીપુરી વુડાના મકાનમાં રહેતો અભિષેક વાસુદેવભાઇ મોરે, ઉં.વ.૨૫ કુરિયરનું કામ કરતો હતો. ગઇકાલે રાત્રે તે મોપેડ લઇને કામ પર નીકળ્યો હતો. રાત્રે દોઢ વાગ્યે તે મોપેડ લઇને સનફાર્મા રોડ ભીમ તળાવના નાકા પાસેથી જતો હતો. તે દરમિયાન પૂરઝડપે આવતી એક થાર જીપના ચાલકે મોપેડને ટક્કર મારતા અભિષેક રોડ પર ફંગોળાઇને પટકાયો હતો. તેને માથાના ભાગે ગંભીર ઇજા થઇ હતી. તે ઉપરાંત હાથ અને ખભા પર પણ તેનેે ઇજાઓ પહોંચી હતી. ગંભીર ઇજાઓ થતા અભિષેકનું ઘટના સ્થળે જ મોત થયું હતું. બનાવના પગલે આજુબાજુથી લોકો દોડી આવ્યા હતા. પોલીસને કોલ કરતા પોલીસની ગાડી પણ આવી ગઇ હતી. અટલાદરા પોલીસ કાર ચલાવતી યુવતી ઋષિકા મનોજભાઇ સદનાની, ઉં.વ.૧૯ (રહે.ગૌતમનગર સોસાયટી,જી.ઇ.બી. સર્કલ પાસે, અલકાપુરી) ને કાર સાથે પોલીસ સ્ટેશન લઇ ગઇ હતી. પોલીસે ગુનો દાખલ કરી યુવતીની ધરપકડ કરી છે.પોલીસનું જણાવવું છે કે, ઋષિકાના પિતાની અલકાપુરીમાં ઠાકુર સાડી નામની દુકાન છે. યુવતી તેની બહેનપણીઓ સાથે મોડીરાતે લગ્નમાંથી પરત આવતી હતી. તે સમયે અકસ્માત થયો હતો.યુવતી નવરચના યુનિવર્સિટીમાં એફ.વાય.બી.એ.માં અભ્યાસ કરે છે.
નશો કર્યો હોવાના આક્ષેપ થતા પોલીસે બ્લેડ સેમ્પલ લેવડાવ્યા
વડોદરા,
અકસ્માત પછી ઋષિકા અને તેની બહેનપણીઓ ઊભા રહી ગયા હતા. લોકોએ એવો આક્ષેપ કર્યો હતો કે, કાર ચલાવતી યુવતીએ નશો કર્યો હતો. જેથી, પોલીસે કાર ચાલક યુવતીના બ્લડ સેમ્પલ ટેસ્ટિંગ માટે લેવડાવ્યા છે. જોકે, પોલીસનું જણાવવું છે કે, ડોક્ટરના પ્રાથમિક અભિપ્રાય મુજબ, તેઓએ નશો કર્યો નહતો. તેમછતાંય અમે ફાઇનલ રિપોર્ટની રાહ જોઇ રહ્યા છે.
જીપની સ્પીડ જાણવા એકસ્પર્ટની મદદ લેવાશે
વડોદરા,
અકસ્માતમાં જીવ ગુમાવનાર અભિષેક મોરે ડિવાઇડરના કટ પરથી ટર્ન લેતો હતો. તે સમયે જ થાર જીપે તેને ટક્કર મારી હતી. થાર જીપની ટક્કર વાગતા અભિષેક ઉછળીને રોડ પર પટકાયો હતો. જ્યારે તેનું મોપેડ અંદાજે ૧૫ ફૂટ સુધી ઢસડાયું હતું. જીપની સ્પીડ અકસ્માત સમયે કેટલી હતી ? તે જાણવા માટે પોલીસ દ્વારા એક્સપર્ટની મદદ લેવામાં આવશે.
બંને બહેનપણીઓને કેસમાં સાક્ષી તરીકે લેવાશે
વડોદરા,
દુમાડ ચોકડી નજીક આવેલા બનિયન પેરેડાઇઝ રિસોર્ટમાં ઋષિકા તેના પિતાની જીપ લઇને બહેનપણીઓ તનિષા અને વિસ્મયી સાથે ગઇ હતી. લગ્ન પ્રસંગમાંથી તેઓ પરત આવતા હતા. વિસ્મયી સનફાર્મા રોડ પર રહેતી હોઇ તેને ડ્રોપ કરવા તેઓ જઇ રહ્યા હતા. તે દરમિયાન અકસ્માત થયો હતો. અકસ્માતના આ કેસમાં પોલીસ દ્વારા ઋષિકાની બંને બહેનપણીઓને સાક્ષી તરીકે લેવામાં આવશે.
રોષે ભરાયેલા લોકોએ યુવતીને પોલીસ વાનમાંથી બહાર ખેંચવાનો પ્રયાસ કર્યો
વડોદરા,
અકસ્માતની ઘટના પછી પોલીસે ગુનો દાખલ કરી ઋષિકાની ધરપકડ કરી હતી. આજે બપોરે પોલીસ ઋષિકાને લઇને ઘટના સ્થળે પંચનામુ કરવા ગઇ હતી. તે દરમિયાન મૃતકના પરિવાર અને સગાઓને જાણ થતા તેઓ પણ ઘટના સ્થળે દોડી ગયા હતા. રોષે ભરાયેલા લોકોએ ઋષિકાને પોતાની તરફ ખેંચવાનો પ્રયાસ કર્યો હતો. પોલીસે ઋષિકાને બચાવી પીસીઆર વાનમાં બેસાડી દીધી હતી. ઉશ્કેરાયેલા લોકોએ યુવતીને વાનમાંથી બહાર ખેંચવાનો પ્રયાસ કરતા પોલીસ સાથે ઝપાઝપી પણ થઇ હતી. છેવટે પોલીસે તને બચાવીને લઇ ગઇ હતી.
દિવાળીમાં અવધૂત ફાટક પાસે ફૂટપાથ પર યુવકે કાર ચઢાવી દીધી હતી
(૧) તા. ૭-૧૧- ૨૦૨૫ ઃ દિવાળી ટાણે શહેરના અવધૂત ફાટક પાસે કારચાલકે ફૂટપાથ પર સૂઇ રહેલા શ્રમજીવી પરિવાર પર કાર ચઢાવી દેતા ૪ વર્ષના બાળકનું મોત થયું હતું. લોકોએ કારચાલકે નશો કર્યો હોવાના આક્ષેપ સાથે પોલીસને સોંપી દીધો હતો.
(૨) ગયા વર્ષે ધૂળેટીની પૂર્વ રાત્રે કારેલીબાગ મુક્તાનંદ નજીક રક્ષિત ચોરસીયાએ નશાની હાલતમાં ત્રણ વાહનોને ટક્કર મારતા એક મહિલાનું મોત થયું હતું.
