આ પણ વાંચો ટ્રેન્ડિંગ સમાચાર
Mundra Jewelry Shop Loot Attempt Case : કચ્છના મુન્દ્રામાં 9 ફેબ્રુઆરી, 2026ના રોજ બારોઇ રોડ પર આવેલા ‘રૂદ્રાક્ષ જ્વેલર્સ’માં બંદૂકધારી શખસોએ લૂંટનો પ્રયાસ કર્યો હતો. સોનાના દાગીના લૂંટ કરતાં વેપારીએ હિંમત દાખવીને એક શખસને દબોચ્યો હતો અને પોલીસને હવાલો કર્યો હતો. પોલીસે આરોપીની રિમાન્ડ મેળવી પૂછપરછ કરતાં અનેક ખુલાસા થયા હતા. સમગ્ર કેસમાં મૂળ રાજસ્થાનના અને ભુજમાં રહેતા ગુનાના માસ્ટર માઈન્ડની ધરપકડ કરી લીધી છે.
મુન્દ્રાના જ્વેલર્સમાં લૂંટના પ્રયાસના ગુનાનો ભેદ ઉકેલાયો
પોલીસ તપાસ અનુસાર, મુન્દ્રામાં જ્વેલર્સની દુકાનમાં લૂંટ કરવા આવેલા ચાર શખસોમાંથી મૂળ મધ્યપ્રદેશના પંકજ શર્મા ઉર્ફે ધોલુ પંડિતની પોલીસ ધરપકડ કરી હતી. પોલીસે પંકજની 10 દિવસના રિમાન્ડ મેળવી સઘન પૂછપરછ કરતાં કેસનો ભેદ ઉકેલાયો છે. જેમાં ભુજના જીઆઈડીસી હંગામી આવાસમાં રહેતા ગીતમસિંહ હિરાસિંહ ઠાકુર (ઉં.વ.41)ની સંડોવણી હોવાનું બહાર આવતા પોલીસે ગીતમની ધરપકડ કરી હતી.
જેલમાં મિત્રતા બાદ બંને આરોપી એકબીજાના સંપર્કમાં આવ્યા હતા
ગીતમસિંહ મૂળ રાજસ્થાનના ધોલપુરનો વતની છે. થોડા વર્ષો પહેલો રાજસ્થાનમાં કૌટુંબિક તકરારમાં હત્યાના પ્રયાસ અને રાયોટિંગના ગુનામાં પોલીસે ગીતમની ધપકડ કરીને જેલ હવાલે કર્યો હતો. આ દરમિયાન ધોલપુર જેલમાં આરોપી પંકજ શર્મા સાથે તેની મિત્રતા થઈ હતી.
મુખ્ય આરોપી ગીતમે લૂંટનો પ્લાન કર્યો
ભુજમાં આશરે વીસેક વર્ષથી સ્થાયી ગીતમ કેટરિંગ કોન્ટ્રાક્ટરનું કામ કરતો હતો. જેલમાં પંકજ સાથે મુલાકાત બાદ તેઓ એકબીજાના સંપર્કમાં હતા. આમ, બંનેએ સાથે મળીને મુન્દ્રામાં જ્વેલર્સ લૂંટવાનો પ્લાન કર્યો હતો. આ પછી પંકજે લૂંટ માટે દેશી તમંચા-પિસ્તોલની વ્યવસ્થા કરી અને તેના સાગરિત સતીષ સિકલવાર ઉપરાંત અન્ય બે સાગરિત મોન્ટુ પટેલ અને શિવો ઉર્ફે બચ્ચાં સાથે મળીને આખો પ્લાન બનાવ્યો હતો.
લૂંટનું પરફેક્ટ આયોજન હતું, પરંતુ બાજી પલટાઈ
ત્રણ મહિનાના લૂંટના આયોજન બાદ, ઘટનાના દિવસે ગીતમ ભુજથી તેની રિક્ષામાં અને બાકીના ચાર સાગરિતો બે બાઈક મારફતે મુન્દ્રા પહોંચ્યા હતા. લૂંટના પ્લાન પ્રમાણે ગીતમ ભોરારા પાટિયા પાસે રિક્ષા રાખીને ઉભો હતો અને અન્ય ચાર સભ્યો લૂંટ કરીને આવે એટલે ત્યાંથી નાસી છૂટવાનું હતું. પરંતુ સોની પિતા પુત્રએ પ્રતિકાર કરતાં આખી બાજી પલટાઈ ગઈ હતી.
જેમાં આરોપી પંકજ સોનીની પકડમાં આવી ગયો અને અન્ય ત્રણ આરોપી બાઈકમાં ભાગી ગયા હતા. જોકે, ભોરારા પાટિયા પાસે રાહ જોતો ગીતમ કોઈ ન આવતા ત્યાંથી ભુજ જતો રહ્યો હતો.
આ પણ વાંચો: અમદાવાદના ચાણક્યપુરીમાં પ્રેમ પ્રકરણમાં બે રાઉન્ડ ફાયરિંગ, યુવક ઈજાગ્રસ્ત
પોલીસે શું કહ્યું?
પોલીસ અધિકારીએ જણાવ્યું હતું કે, આરોપી પંકજ પર અન્ય રાજ્યોમાં સશસ્ત્ર લૂંટના છથી સાત ગંભીર ગુના નોંધાયેલા છે. ઘટનાને અંજામ આપતા પહેલા આરોપીએ મુન્દ્રા જવા માટે ગીતમની મદદથી માધાપર જૂનાવાસની સનરાઈઝ સિટી સોસાયટીમાંથી એકસાથે બે બાઈક ચોરી કર્યા હતા. લૂંટમાં ઉપયોગમાં લેવાયેલા અધિકારી ફરાર આરોપી પાસે છે. પોલીસ ફરાર આરોપીને ઝડપી પાડવા તપાસ તેજ કરી છે. જ્યારે લૂંટના પ્રયાસમાં ઉપયોગમાં લેવાયેલા વાહનો પણ કબજે કરવામાં આવ્યા છે.
