આ પણ વાંચો ટ્રેન્ડિંગ સમાચાર
મુંબઈ : દેશમાં ૨૧, નવેમ્બર ૨૦૨૫થી નવા શ્રમ સંહિતા-લેબર કોડ લાગુ થવાથી, કંપનીઓને નાણાકીય વર્ષ ૨૦૨૬ના ત્રીજા ત્રિમાસિકમાં કર્મચારીઓના સામાજિક સુરક્ષા લાભો માટે જાળવવામાં આવેલા અનામતમાં વધારો કરવા માટે તેમના ખાતામાં મોટા, વન ટાઈમ એડજ્સમેન્ટ કરવાની જરૂર પડી છે. નાણા વર્ષ ૨૦૨૬ના ત્રીજા ત્રિમાસિક માટે નિફટી ૫૦ ઈન્ડેક્સમાં કંપનીઓના સ્ટેન્ડ-એલોન પરિણામોનું વિશ્લેષણ દર્શાવે છે કે, સુધારેલા નિયમોને કારણે આ કંપનીઓએ રૂ.૧૩,૧૬૧ કરોડનો વધારો ખર્ચ કર્યો છે.
આ એડજસ્ટમેન્ટ જરૂરી છે, કારણ કે નવા શ્રમ સંહિતામાં એવું નક્કી કરવામાં આવ્યું છે કે, મૂળ પગાર કુલ પગારના ઓછામાં ઓછા ૫૦ ટકા હોવો જોઈએ. આ ભવિષ્ય નિધિ અને અન્ય કાનૂની લાભોને અસર કરે છે. બીજો મહત્વપૂર્ણ ફેરફાર એ છે કે, તમામ ફિક્સ્ડ-ટર્મ કર્મચારીઓને એક વર્ષની સતત સેવા પછી ગ્રેચ્યુઈટી ચૂકવવણી આવશ્યક છે, જે પાંચ વર્ષ પહેલાની સરખામણીમાં ઓછી છે.
ટીસીએસ તેના જંગી કર્મચારીબળના કારણે આ અસરકર્તા કંપનીઓની યાદીમાં મોખરે છે. ટીસીએસને ગ્રેચ્યુઈટીની ઈન્ક્રીમેન્ટલ-વધારાની અસર રૂ.૧૮૧૬ કરોડ અને લાંબાગાળાની અન્ય જોગવાઈ રૂ.૩૧૨ કરોડ કરાઈ છે. લાર્સન એન્ડ ટુબ્રો તેની કર્મચારીઓની સંખ્યાની રીતે બીજી સૌથી મોટી અસરગ્રસ્ત કંપની તરીકે કર્મચારીઓ માટે રૂ.૧૭૯૧ કરોડ જોગવાઈ કરવી પડી છે. ઈન્ફોસીસે રૂ.૧૧૪૬ કરોડ, એચસીએલ ટેકનોલોજીસ દ્વારા રૂ.૯૪૮ કરોડ અને વિપ્રો દ્વારા રૂ.૩૦૩ કરોડની જોગવાઈ કરાઈ છે. અન્ય કંપનીઓમાં લેબર કોડના કારણે ઊંચી જોગવાઈ કરનારમાં ઈન્ટરગ્લોબ એવીએશને રૂ.૯૬૯ કરોડ, એચડીએફસી બેંક રૂ.૮૦૦ કરોડ, મારૂતી સુઝુકીએ રૂ.૫૯૪ કરોડની જોગવાઈ કરી છે.
આ સિવાય મોટી કંપનીઓના બીજા ગુ્રપમાં રિલાયન્સ ઈન્ડસ્ટ્રીઝ, એસબીઆઈ, પાવર ગ્રીડ કોર્પોરેશન, ઓએનજીસી, એનટીપીસી, કોલ ઈન્ડિયા અને ઈટર્નલનો સમાવેશ છે. એક્સિસ બેંકે રૂ.૨૫ કરોડની વધારાની જોગવાઈ, અને નવા લેબર કોડથી ભાવિ ખર્ચ માટે રૂ.૪૩૪ કરોડની જોગવાઈ કરી છે.
