આ પણ વાંચો ટ્રેન્ડિંગ સમાચાર
– સાડા 3 માસ ચાલેલી SIRની કામગીરી બાદ આખરી મતદાર યાદી પ્રસિદ્ધ
– SIR રમિયાન મળેલા નાગરિકોના અદ્યતન ફોટોગ્રાફ આગામી મતદાર યાદીમાં પ્રસિદ્ધ કરાશે
ભાવનગર : ચૂંટણી પંચ દ્વારા ભાવનગર અને બોટાદ સહિત રાજ્યભરમાં આખરી મતદાર યાદી પ્રસિદ્ધ કરવામાં આવી છે. આખરી મતદાર યાદી પ્રસિદ્ધિ બાદ ભાવનગર જિલ્લામાં ૨૯,૯૬૪ અને બોટાદ જિલ્લામાં ૧૦,૧૩૬ મતદારોનો વધારો થયો છે.
સાડા ત્રણ માસ સુધી ચાલેલી મતદાર યાદીની ખાસ સઘન સુધારણા ઝુંબેશ (એસઆઈઆર)ના વિવિધ તબક્કાઓની કામગીરી બાદ આજે મંગળવારે આખરી મતદાર યાદી પ્રસિદ્ધ કરાઈ છે. ભાવનગર જિલ્લામાં મુસદ્દા મતદારયાદી પ્રસિદ્ધ થયા પહેલા ૧૬,૩૭,૯૮૧ મતદારો નોંધાયા હતા. જેમાં એસઆઈઆરની કામગીરી દરમિયાન ૪૦,૦૭૪ મતદારોનો ઉમેરો અને ૧૦,૧૧૦ મતદારોના નામ કમી કરવામાં આવતા મુસદ્દા મતદાર યાદીની પ્રસિદ્ધિ બાદ ૨૯,૯૬૪ મતદારોના વધારા સાથે કુલ મતદારોની સંખ્યા ૧૬,૬૭,૯૪૫ થઈ છે.
તેવી જ રીતે બોટાદ જિલ્લામાં મુસદ્દા મતદારયાદી પ્રસિદ્ધ થયા પહેલા ૫,૧૧,૮૪૧ મતદારો હતો. તેમાં ૧૨,૭૬૩નો ઉમેરો અને ૨૬૨૭ મતદારોના નામ કમી બાદ ૧૦,૧૩૬ મતદારોનાવધારા સાથે કુલ ૫,૨૧,૯૭૭ મતદાર થયા છે. આજે જાહેર થયેલી આખરી મતદાર યાદી તમામ મતદાન મથકો, નિર્ધારીત સ્થળો અને ચૂંટણી પંચની વેબસાઈટ પર પ્રસિદ્ધ કરાઈ છે. તેમજ ફોટાવાળી પ્રિન્ટેડ અને ફોટા વિનાની મતદાર યાદીની સોફ્ટ કોપી તમામ માન્ય રાજકીય પક્ષોના પ્રતિનિધિઓને સુપ્રત કરાઈ છે. એસઆઈઆર દરમિયાન મળેલા નાગરિકોના અદ્યતન ફોટોગ્રાફ આગામી મતદાર યાદીમાં પ્રસિદ્ધ કરાશે તેમ જણાવાયું છે.
આખરી મતદાર યાદીમાં નામ ન હોય તો ફોર્મ નં. 6 ભરવું
આખરી મતદારયાદીમાં નામ ન હોય તેવા મતદારોએ નામ દાખલ કરાવવા માટે ફોર્મ નં.૬ ભરીને તેની સાથે ડેક્લેરેશન રજૂ કરી જરૂરી આધારી પુરાવાના દસ્તાવેજ સામેલ રાખી ઓનલાઈન/ઓફલાઈન અરજી કરી શકશે. કોઈ ભૂલ હોય તો ફોર્મ નં.૮ ભરીને જરૂરી આધાર પુરાવાના દસતાવેજ સામેલ રાખી ઓનલાઈન/ઓફલાઈન અરજી કરી શકાય છે. આખરી મતદાર યાદીમાં કોઈપણ પ્રકારનો વાંધો રજૂ કરવા માટે ફોર્મ નં.૭ ભરીને અરજી કરી શકાશે. આ ઉપરાંત તા.૧-૧-૨૦૨૬ની લાયકાતની તારીખે ૧૮ વર્ષ પુરા કરનાર યુવાનો આગામી સમયમાં પણ ફોર્મ નં.૬ ભરીને તેઓનું નામ ભવિષ્યમાં પ્રસિદ્ધ થનારી મતદાર યાદીમાં દાખલ કરાવી શકે છે.
