આ પણ વાંચો ટ્રેન્ડિંગ સમાચાર
રાજકોટ નજીકના ફાળદંગ ગામ નજીક
અકસ્માત સર્જયા બાદ ચાલક ફરાર, કારમાંથી રૂા.1.50 લાખનો દારૂનો જથ્થો કબજે
રાજકોટ: રાજકોટ નજીકના ફાળદંગ ગામ નજીક આજે વહેલી સવારે દારૂ ભરેલી સ્વિફટ કારે ઈકો કારને હડફેટે લેતાં એક જ પરિવારના ત્રણ સભ્યો ઘવાયા હતા. સ્વિફટ કારમાંથી પોલીસે રૂા.૧.પ૮ લાખનો દારૂ કબજે કર્યો હતો. અકસ્માત સર્જયા બાદ તેનો ચાલક ભાગી જતાં પોલીસે કાર નંબરના આધારે તેની શોધખોળ શરૂ કરી છે.
કુવાડવા ગામની શિવધારા રેસિડેન્સીમાં રહેતાં સુરેશભાઈ જાદવ (ઉ.વ.પ૩) પેપર કપ અને પેપર ડીશની ગામમાં ફેરી કરે છે. ગઈકાલે પત્ની રમીલાબેન (ઉ.વ.૪૯) અને પુત્રી ક્રિષ્ના (ઉ.વ.ર૭)ને ઈકો કારમાં બેસાડી સાવરકુંડલાથી ઘર તરફ આવતા હતા ત્યારે ફાળદંગ ગામ પાસે સામેથી રોંગ સાઈડમાંથી ઘસી આવેલી સ્વિફટ કારે હડફેટે લેતાં તમામને ઈજા થઈ હતી. જેમાં સુરેશભાઈ અને તેના પુત્રીને ઓપીડી સારવાર આપવામાં આવી હતી. જયારે તેના પત્નીને ડાબા પગના પંજામાં ફેકચર થતાં દાખલ કરવામાં આવ્યા હતા.
અકસ્માત સર્જયા બાદ સ્વિફટ કારનો ચાલક ભાગી ગયો હતો. કારણ કે તેમાં દારૂનો જથ્થો ભરેલો હતો. જેમાંથી અમુક બોટલો નીચે પડી જતાં તૂટી ગઈ હતી. સ્થળ પર પહોંચેલી પોલીસે તપાસ કરતાં કારમાંથી જુદી-જુદી બ્રાન્ડની અંગ્રેજી દારૂની ૩૯૬ બોટલ મળી આવી હતી. જેની કિંમત પોલીસે રૂા.૧.પ૮ લાખ ગણી હતી. મોબાઈલ ફોન, કાર અને દારૂનો જથ્થો કબજે કરી તેના ચાલક સામે પ્રોહિબિશનનો ઉપરાંત અકસ્માત સર્જવાનો એમ બે ગુના દાખલ કર્યા હતા.
રાજકોટ પાસિંગની સ્વિફટ કારના ચાલકની આજી ડેમ પોલીસે શોધખોળ શરૂ કરી છે. આ બનાવ સાથે જ એવુ તારણ નીકળ્યું છે કે બુટલેગરો વહેલી સવારે જયારે પોલીસનું પેટ્રોલિંગ મંદ હોય ત્યારે દારૂની હેરાફેરી કરી રહ્યા છે.
