આ પણ વાંચો ટ્રેન્ડિંગ સમાચાર
– સ્વચ્છતાના સૂત્રો માત્ર દીવાલો પર, જમીન પર શૂન્ય કામગીરી
– પાલિકાની બેદરકારીના કારણે એક હજારથી વધુ વિદ્યાર્થીઓના આરોગ્ય સામે ખતરો : વાલીઓમાં રોષ
લીંબડી : લીંબડી શહેરના બાહેલાપરા વિસ્તારમાં આવેલી એન.એમ. હાઈસ્કૂલ અને એચ.કે. કુમાર શાળા પાસે છેલ્લા એક અઠવાડિયાથી સફાઈના અભાવે ગંદકીનું સામ્રાજ્ય ફેલાયું છે. શાળાના મુખ્ય માર્ગ પર જ કચરાના ઢગલા ખડકાયા હોવા છતાં પાલિકા તંત્ર દ્વારા કોઈ કામગીરી કરવામાં આવતી નથી.
આ ગંદકીના કારણે મચ્છરોનો ઉપદ્રવ વધ્યો છે, જેને પગલે શાળામાં અભ્યાસ કરતા ૧,૦૦૦થી વધુ વિદ્યાર્થીઓમાં રોગચાળો ફાટી નીકળવાની દહેશત સેવાઈ રહી છે. વાલીઓ અને સ્થાનિક રહીશોમાં આ મામલે ભારે રોષ જોવા મળી રહ્યો છે. સ્થાનિકોનો આક્ષેપ છે કે પાલિકા તંત્ર દ્વારા સફાઈના નામે લાખો રૂપિયાનો ખર્ચ કરવામાં આવે છે, પરંતુ વાસ્તવિકતા કંઈક અલગ જ છે. શહેરમાં અનેક જગ્યાએ સ્વચ્છતાના સૂત્રો લખવામાં આવ્યા છે, પરંતુ કમનસીબી એ છે કે જ્યાં સૂત્રો લખાયા છે તેની નીચે જ સફાઈ કર્મચારીઓ કચરો ફેંકી રહ્યા છે. પાલિકાની આ ‘ઝીરો’ કામગીરીને કારણે ભ્રષ્ટાચારની ગંધ આવી રહી હોવાની ચર્ચાઓ પણ જોર પકડયું છે. વાલીઓની માંગ છે કે તંત્ર વહેલી તકે સફાઈ હાથ ધરે.
