આ પણ વાંચો ટ્રેન્ડિંગ સમાચાર
Unseasonal Rain In Panchmahal: રાજ્યમાં ગરમીની શરૂઆત થઈ રહી છે ત્યારે પંચમહાલ જિલ્લામાં શુક્રવારે (20મી ફેબ્રુઆરી) વહેલી સવારે વાતાવરણમાં એકાએક પલટો જોવા મળ્યો હતો. ગોધરા શહેર સહિત આસપાસના ગ્રામ્ય વિસ્તારોમાં અચાનક કમોસમી વરસાદ ખાબક્યો હતો. અચાનક થયેલા આ વરસાદને કારણે વાતાવરણમાં ઠંડક તો પ્રસરી છે, પરંતુ ખેડૂતોના જીવ અધ્ધર થઈ ગયા છે. જોકે સુરત અને વડોદરામાં પણ કમોસમી વરસાદે ધબધબાટી બોલાવતા ઠેર ઠેર પાણી ભરાયા હોય તેવા દૃશ્યો સર્જાયા હતા.
ડબલ ઋતુનો અનુભવ
છેલ્લા થોડા દિવસોથી જિલ્લામાં વિચિત્ર હવામાન જોવા મળી રહ્યું છે. અત્યારે પંચમહાલમાં જિલ્લામાં શિયાળો અને ઉનાળો એમ બંને ઋતુનો એકસાથે અનુભવ કરી રહ્યા છે. વહેલી સવારે ઠંડો પવન અને વરસાદને કારણે વાતાવરણ ખુશનુમા અને ઠંડું બન્યું છે. જ્યારે બપોરના સમયે પારો ઊંચકાતા અસહ્ય ગરમીનો અનુભવ થઈ રહ્યો છે.
આ પણ વાંચો: કલિનિકલ રીસર્ચ કૌભાંડ ફરી જાગ્યું, VS હોસ્પિટલના ૧૮ કરોડના કોભાંડ મામલે ઉગ્ર રજૂઆત કરાઈ
રવી પાકને નુકસાનની ભીતિ
કમોસમી વરસાદને કારણે જિલ્લાના ખેડૂતોમાં ચિંતાનું મોજું ફરી વળ્યું છે. ખાસ કરીને રવી પાક લણણીના આરે છે ત્યારે આ વરસાદ તેને નુકસાન પહોંચાડી શકે છે. ખેતરોમાં તૈયાર થયેલા ઘઉં અને ચણાના પાકને વરસાદના કારણે નુકસાન થવાની ભીતિ સેવાઈ રહી છે. વાતાવરણમાં આવેલા આ અચાનક બદલાવને કારણે ખેતીના પાકમાં જીવાત પડવાની તેમજ લોકોમાં શરદી-ઉધરસ જેવો વાયરલ ઈન્ફેક્શન વધવાની શક્યતા પણ વધી ગઈ છે.
ગ્રામ્ય વિસ્તારોમાં માવઠું
માત્ર ગોધરા જ નહીં પરંતુ ગ્રામ્ય પંથકોમાં પણ હળવા ઝાપટાં પડ્યા હોવાના અહેવાલ છે. વાદળછાયા વાતાવરણને કારણે સૂર્યપ્રકાશ ઓછો જોવા મળ્યો હતો, જેના લીધે સવારે તાપમાનમાં ઘટાડો નોંધાયો હતો.
સુરતમાં વહેલી સવારે વાતાવરણમાં પલટો
સુરતમાં વહેલી સવારે વાતાવરણમાં પલટો આવ્યો છે. ઝાપટાં પડ્યા બાદ ધોધમાર વરસાદ શરૂ થયો હતો. સુરત શહેર અને જિલ્લામાં વહેલી સવારથી જ વરસાદી માહોલ જામ્યો હતો. વરસાદી ઝાપટાંને કારણે વહેલી સવારે વાતાવરણમાં ઠંડક પ્રસરી ગઈ છે, જેનાથી ઠંડીનું જોર પણ વધ્યું છે.
વડોદરામાં પણ કમોસમી વરસાદ
જ્યારે વડોદરા જિલ્લામાં પણ કમોસમી વરસાદ નોંધાતા અનેક વિસ્તારો ભીંજાયા હતા. ખેડૂતોની ચિંતા વધી ગઇ હતી. ઠેર ઠેર પાણી ભરાયાના દૃશ્યો સર્જાયા હતા. વહેલી સવારથી અહીં પણ અચાનક જ વાતાવરણમાં પલટો જોવા મળ્યો હતો.
હવામાન વિભાગની વિભાગની આગાહી
હવામાન વિભાગ અનુસાર, રાજ્યમાં વેસ્ટર્ન ડિસ્ટરબન્સ, સાયક્લોનિક સર્ક્યુલેશન અને ટ્રફ એમ ત્રણ સિસ્ટમ સક્રિય હોવાથી કેટલાક વિસ્તારોમાં વરસાદ તો કેટલાક વિસ્તારોમાં વાદળછાયું વાતાવરણ રહેશે. આગામી કેટલાક દિવસોમાં આશરે 30થી 40 કિમી પ્રતિકલાકની ઝડપે પવન ફૂંકાઈ શકે છે. ઉત્તર પશ્ચિમના પવનોની ગતિ પણ સામાન્ય કરતાં વધુ રહેવાની શક્યતા છે. 24 ફેબ્રુઆરી દરમિયાન રાજ્યમાં હવામાન મુખ્યત્વે સૂકું રહેવાની સંભાવના છે.
