Kutch Crime: કચ્છના અંજાર તાલુકાના ચંદિયા ગામે પ્રેમ પ્રકરણનો કરુણ અને પથ્થર દિલ માનવીની ક્રૂરતા દર્શાવતો કિસ્સો સામે આવ્યો છે. લગ્ન કરવા માટે દબાણ કરતી ગર્ભવતી પ્રેમિકાની પ્રેમીએ તેના મિત્ર સાથે મળીને ગળેટૂંપો આપી હત્યા કરી નાખી હતી અને પુરાવાનો નાશ કરવા મૃતદેહને પથ્થર બાંધી કૂવામાં ફેંકી દીધો હતો. જોકે, પોલીસે આ હત્યાકાંડનો પર્દાફાશ કરી આરોપીની ધરપકડ કરી છે.
જાણો શું છે મામલો
મળતી માહિતી અનુસાર, ચંદિયા ગામની મૃતક 18 વર્ષીય રાધા સથવારા અને મિંદીયાળા ગામના આરોપી રાજેશ રબારી વચ્ચે લાંબા સમયથી પ્રેમ સંબંધ હતો. આ દરમિયાન રાધા ગર્ભવતી થતા તેણે રાજેશ પર લગ્ન કરવા માટે દબાણ શરૂ કર્યું હતું. જો કે, રાજેશ તેને પત્ની તરીકે સ્વીકારવા તૈયાર નહોતો અને તેણે રાધાને રસ્તામાંથી હટાવવાનું ક્રૂર કાવતરું ઘડ્યું હતું.
મિત્ર સાથે મળીને કરી હત્યા
બે-ત્રણ દિવસ અગાઉ રાજેશ રાધાને લગ્ન કરવાના બહાને ઘરેથી ભગાડીને ગામના સીમાડે લઈ આવ્યો હતો. અહીં પૂર્વનિયોજિત કાવતરા મુજબ,તેણે મિત્ર રાહુલ રબારીની મદદથી રાધાને ગળેટૂંપો આપી મોતને ઘાટ ઉતારી હતી. હત્યા કર્યા બાદ પાપ છુપાવવા માટે રાધાના મૃતદેહને વજનદાર પથ્થર સાથે બાંધ્યો હતો. પથ્થર બાંધેલી હાલતમાં લાશને સીમાડે આવેલા ઊંડા કૂવામાં ફેંકી દીધી હતી જેથી લાશ ઉપર ન આવે.
આ પણ વાંચો: અમદાવાદ શહેરમાં એક કિલોમીટરનો રોડ બનાવવાનો ખર્ચ 4 કરોડથી 24 કરોડ! પ્રજાના પૈસાનો ધૂમાડો
પોલીસની સતર્કતાથી ખુલ્યું રહસ્ય
દીકરી ગુમ થતાં ચિંતિત પરિવારજનોએ અંજાર પોલીસ મથકે ફરિયાદ નોંધાવી હતી. અંજાર પીઆઈ એ.આર. ગોહિલ અને તેમની ટીમે ટેકનિકલ સર્વેલન્સ અને હ્યુમન ઇન્ટેલિજન્સના આધારે શંકાસ્પદ રાજેશ રબારીની અટકાયત કરી હતી. પોલીસની કડક પૂછપરછમાં આરોપી રાજેશ ભાંગી પડ્યો હતો અને મિત્ર રાહુલ સાથે મળીને કરેલા હત્યાકાંડની કબૂલાત કરી હતી.
ભુજ ફાયર બ્રિગેડની મદદથી લાશ બહાર કઢાઈ
આરોપીની કબૂલાત બાદ પોલીસે ઘટનાસ્થળે પહોંચી તપાસ હાથ ધરી હતી. કૂવો પાણીથી ભરેલો અને ઊંડો હોવાથી ભુજ ફાયર બ્રિગેડની મદદ લેવામાં આવી હતી. ભારે જહેમત બાદ રાધાનો મૃતદેહ બહાર કાઢી પોસ્ટમોર્ટમ માટે ખસેડવામાં આવ્યો છે.
હાલ અંજાર પોલીસે મુખ્ય આરોપી રાજેશ અને તેના સાગરીત રાહુલ વિરુદ્ધ હત્યા (IPC 302/BNS હેઠળ), પુરાવાનો નાશ કરવો અને અન્ય ગંભીર કલમો હેઠળ ગુનો દાખલ કરવાની તજવીજ હાથ ધરી છે. આ ઘટનાથી સમગ્ર પંથકમાં ચકચાર મચી ગઈ છે.
