આ પણ વાંચો ટ્રેન્ડિંગ સમાચાર
Shirtless Protest at AI Impact Summit: દિલ્હીમાં આયોજિત ‘AI ઈમ્પેક્ટ સમિટ’ દરમિયાન યુથ કોંગ્રેસના કાર્યકરો દ્વારા કરવામાં આવેલા અર્ધનગ્ન પ્રદર્શનના વિરોધમાં આજે નિવારે મધ્યપ્રદેશના ઈન્દોરમાં ભાજપ અને કોંગ્રેસના કાર્યકરો સામસામે આવી ગયા હતા. ભારતીય જનતા યુવા મોરચા (BJYM)ના કાર્યકર્તાઓએ કોંગ્રેસ કાર્યાલયનો ઘેરાવો કરવા માટે કૂચ કરી હતી, જેના કારણે બંને પાર્ટીના કાર્યકરો વચ્ચે ભારે ઘર્ષણ સર્જાયું હતું.
પથ્થરમારા બાદ સ્થિતિ કાબૂમાં, તપાસ શરૂ
આ વિરોધ પ્રદર્શન દરમિયાન ભાજપ કોંગ્રેસના જૂથો વચ્ચે ઉગ્ર પથ્થરમારો થયો હતો, જેમાં બે પત્રકારો સહિત અનેક લોકો ઘાયલ થયા હોવાના સમાચાર છે. ઘટનાની ગંભીરતાને જોતા પોલીસે બેરિકેડિંગ કરીને બંને પાર્ટીના કાર્યકરોને રોકવાનો પ્રયાસ કર્યો હતો અને પરિસ્થિતિને કાબૂમાં લેવા માટે વોટર કેનન(પાણીનો મારો)નો પણ ઉપયોગ કર્યો હતો. જે બાદ સ્થિતિ થાળે પડી હતી. ઈન્દોર પોલીસના જણાવ્યા મુજબ, પ્રદર્શન દરમિયાન અચાનક અફવાઓ ફેલાઈ હતી અને ત્યારબાદ પથ્થરમારો શરૂ થયો હતો. હાલ પથ્થરમારો કોણે શરૂ કર્યો તે અંગે તપાસ ચાલી રહી છે.
ચાર કાર્યકરોની ધરપકડ
ઉલ્લેખનીય છે કે, ગઈકાલ શુક્રવારે દિલ્હીમાં ‘AI ઈમ્પેક્ટ સમિટ’માં ભારત-અમેરિકા સાથેની વેપાર ડીલના વિરોધમાં કોંગ્રેસે પ્રદર્શન કર્યું હતું, જે પછી યુથ કોંગ્રેસના ચાર કાર્યકરોની ધરપકડ કરી પાંચ દિવસના પોલીસ રિમાન્ડ પર મોકલવામાં આવ્યા છે.
પ્રદર્શન મામલે ભાજપ-કોંગ્રેસ સામસામે
આ ઘટના બાદ ભાજપ અને કોંગ્રેસ વચ્ચે તીખું રાજકીય યુદ્ધ છેડાયું છે. કેન્દ્રીય મંત્રી પીયૂષ ગોયલ અને ભૂપેન્દ્ર યાદવ સહિત અનેક ભાજપના નેતાઓએ યુથ કોંગ્રેસના આ કૃત્યને ‘રાષ્ટ્રવિરોધી’ ગણાવ્યું હતું અને આંતરરાષ્ટ્રીય મહેમાનો સામે ભારતની છબી ખરાબ કરવાનો આરોપ લગાવ્યો હતો. ભાજપની યુવા પાંખ BJYM એ નવી દિલ્હીમાં કોંગ્રેસ મુખ્યાલય પાસે વિરોધ પ્રદર્શન કર્યું હતું અને ભિવંડીમાં રાહુલ ગાંધીને કાળા વાવટા બતાવ્યા હતા. બીજી તરફ, કોંગ્રેસે આ પ્રદર્શનને લોકશાહી અધિકાર ગણાવીને યુથ કોંગ્રેસના કાર્યકરોનો બચાવ કર્યો હતો.
દિલ્હી પોલીસ કરશે તલસ્પર્શી તપાસ
દિલ્હી પોલીસના જણાવ્યા અનુસાર, આ પ્રદર્શન પાછળ મોટું ષડયંત્ર હોઈ શકે છે. અદાલતમાં પોલીસે દલીલ કરી હતી કે, આરોપીઓને સામસામે બેસાડીને અને ડિજિટલ પુરાવાઓ સાથે રાખીને પૂછપરછ કરવી જરૂરી છે. સાથે જ એ તપાસ પણ થવી જોઈએ કે આ પ્રદર્શન માટે ફંડિંગ ક્યાંથી આવ્યું અને ટી-શર્ટ છપાવવાનો ખર્ચ કોણે ઉઠાવ્યો. આ ટી-શર્ટ પર ‘PM is Compromised’, ‘India-US Trade Deal’ અને ‘Epstein Files’ જેવા સૂત્રો લખેલા હતા, જેમાં વડાપ્રધાન મોદી અને અમેરિકાના રાષ્ટ્રપતિ ડોનાલ્ડ ટ્રમ્પની તસવીરો પણ હતી.
આ પણ વાંચો: ‘અભિષેકને હટાવી દઉં કે તિલકને?’ દક્ષિણ આફ્રિકા સામેની મેચ પહેલા કેપ્ટન સૂર્યકુમારનું મોટું નિવેદન
કોંગ્રેસે ગણાવ્યું શાંતિપુર્ણ પ્રદર્શન
કોંગ્રેસની વિદ્યાર્થી પાંખ નેશનલ સ્ટુડન્ટ્સ યુનિયન ઓફ ઈન્ડિયા (NSUI) ના લગભગ 10 કાર્યકરો શુક્રવારે ભારત મંડપમમાં પ્રવેશ્યા હતા અને સૂત્રોચ્ચાર કર્યા હતા. દિલ્હી પોલીસે આ મામલે યુથ કોંગ્રેસના ચાર કાર્યકરોની અટકાયત કરી હતી અને શનિવારે સવારે તેમને પટિયાલા હાઉસ કોર્ટમાં રજૂ કરી 5 દિવસના રિમાન્ડની માંગણી કરી હતી. આરોપીઓના વકીલે પોલીસના દાવાઓનો વિરોધ કરતા કહ્યું કે, પ્રદર્શન શાંતિપૂર્ણ હતું અને કોઈના પર હુમલો કરવામાં આવ્યો નહોતો. ઉલટું, પ્રદર્શનકારીઓ સાથે મારપીટ કરવામાં આવી હતી.
