આ પણ વાંચો ટ્રેન્ડિંગ સમાચાર
અમદાવાદ,શનિવાર,21
ફેબ્રુ,2026
૧૮ હજાર કરોડથી વધુનુ અંદાજપત્ર અમદાવાદ મ્યુનિસિપલ
કોર્પોરેશનનુ બહુમતીએ મંજૂર કરવામા આવ્યુ છે. શહેરને કલીનસિટી,
લીવેબલ સિટી બનાવવાના સત્તાધીશો તરફથી દાવા કરવામા આવ્યા છે.બીજી તરફ શહેરના
વિવિધ વોર્ડ વિસ્તારમાં આવેલી ગટર સાફ કરવા એક વર્ષમાં ૭૯૫ મંડળીઓને રુપિયા ૨૬.૯૬
કરોડથી વધુની રકમ ચૂકવાયા પછી પણ મધ્યઝોનમાં કોટ વિસ્તાર ઉપરાંત ઉત્તર ઝોન, પૂર્વઝોન અને
દક્ષિણ ઝોનના વિવિધ વિસ્તારમાં ગટર ઉભરાવાની ફરિયાદોની સંખ્યામા સતત વધારો થતો
જોવા મળી રહ્યો છે.કોર્પોરેશન જે મંડળીઓને ગટર સાફ કરવા દર મહિને મોટી રકમ ચૂકવે
છે તે પૈકી અનેક મંડળીઓ તો માત્ર કાગળ ઉપર જ ચલાવાતી હોવાનો બજેટ બેઠકમાં
વિપક્ષનેતાએ આક્ષેપ કરતા આવી મંડળીઓને બ્લેકલિસ્ટ કરવા રજૂઆત કરી હતી.
વર્ષ-૨૦૨૫ના પહેલા ૧૧ મહિનામાં મ્યુનિસિપલ કોર્પોરેશનને
સી.સી.આર.એસ. ઉપર ૮.૧૦ લાખથી વધુ પ્રાથમિક સુવિધાની ફરિયાદ શહેરના ૪૮ વોર્ડમાંથી
શહેરીજનો તરફથી કરવામા આવી હતી.આ ફરિયાદો પૈકી ૪.૫૭ લાખ એટલે કે ૫૦ ટકાથી વધુ
ફરિયાદ ડ્રેનેજ ઉભરાવાની મળી હતી.મધ્યઝોનમાંથી ઈજનેર વિભાગને લગતી ૧.૩૮ લાખથી વધુ
ફરિયાદ લોકો દ્વારા કરવામા આવી હતી.શહેરના ૪૮ વોર્ડમાં ગટરની સફાઈ કરવા માટે ૭૯૫
મંડળીઓ છે.દરેક સંસ્થાઓને દર મહીને રુપિયા
૫૦ હજાર ચૂકવવામા આવતા હોવાછતાં ગટર ઉભરાવાની ફરિયાદો સતત વધતી જાય છે.કોટ વિસ્તાર
સહીતના મધ્યઝોનમાં ગટર સાફ કરવા ૯૯ મંડળી કાર્યરત છે. નરોડા,કુબેરનગર સહીતના
વિસ્તારમાં ૧૧૨ મંડળીઓ કાર્યરત છે.
ઝોન મુજબ ગટર સાફ
કરવા એક વર્ષમાં કેટલી રકમ ચૂકવાઈ
ઝોન મંડળી ખર્ચ(કરોડમાં)
ઉત્તર ૧૯૫ ૭.૬
પૂર્વ ૧૧૧ ૩.૬૫
દક્ષિણ ૧૬૭ ૩.૮૮
મધ્ય ૧૬૧ ૫.૩૦
પશ્ચિમ ૧૧૪ ૨.૪૫
ઉ.પ. ૩૧ ૩.૦૨
દ.પ. ૧૬ ૧.૫૭
શહેરના કયા વોર્ડમાં સૌથી વધુ મંડળીઓ કાર્યરત
વોર્ડ મંડળીની
સંખ્યા
સરસપુર ૪૦
કુબેરનગર ૨૯
શાહીબાગ ૨૭
દરિયાપુર ૨૭
બાપુનગર ૨૪
લાંભા ૨૩
ભાજપ-કોંગ્રેસના ઘણાં કોર્પોરેટરોની મંડળીઓમાં ભાગીદારીની
ચર્ચા
પાંચ વર્ષ અમદાવાદ મ્યુનિસિપલ કોર્પોરેશનમાં કોર્પોરેટર
રહેલા એવા ભાજપ અને કોંગ્રેસના ઘણાં કોર્પોરેટરોએ વહેતી ગંગામાં હાથ ઘોતા હોય તેમ
તેમના વોર્ડમાં ગટર સાફ કરવાની કામગીરી કરતી મંડળીઓમાં ભાગીદારી કરી લાખો રુપિયાની
રકમના બિલ માત્ર કાગળ ઉપર કામગીરી કરી હોવાનુ બતાવી રકમ ઘર ભેગી કરી હોવાની પણ
મ્યુનિસિપલ વર્તુળોમા ચર્ચા સાંભળવા મળી રહી છે.
