આ પણ વાંચો ટ્રેન્ડિંગ સમાચાર
Vadodara : વડોદરા શહેરની મધ્યમાં આવેલ વોર્ડ નં.14ના ભાજપના વોર્ડ મહામંત્રીએ રસ્તાના મુખ્ય માર્ગ પર પોતાનું વાહન પાર્ક કર્યું હોવાથી ટ્રાફિક પોલીસ દ્વારા તેનો ફોટો પાડી તેની સામે દંડનીય કાર્યવાહી કરતા તેની રજૂઆત સ્થાનિક કોર્પોરેટરને કરવામાં આવી હતી. કોર્પોરેટરે આ મામલે એક પી.આઈ. સમક્ષ કાર્યવાહી અંગે ઉગ્ર રજૂઆત કરતા પોલીસ અધિકારી અને કાઉન્સિલર તેમજ પૂર્વ કાઉન્સિલર વચ્ચે ભારે રકઝક થઈ હતી. જેથી મામલો બિચકયો હતો.
સમગ્ર ઘટનાની જાણ જોઈન્ટ સીપીને થતા તેઓએ ચાર દરવાજા વિસ્તારમાં ગઈકાલે સાંજે પાંચથી સાતના સમયમાં પ્રવેશ નિયમનો ભંગ કરનાર સંખ્યાબંધ રિક્ષા ચાલકો સામે દંડનીય કાર્યવાહી કરી મામલો થાળે પાડવાનો પ્રયાસ કર્યો હતો. તો બીજી તરફ આજથી રોજ, એક સપ્તાહ માટે, ભાજપના કાર્યકર્તાઓ માંડવી દરવાજા પર જઈ ટ્રાફિક પોલીસ દ્વારા કરવામાં આવતી કાર્યવાહીમાં બેધારી નીતિ અખત્યાર થાય છે કે કેમ? એનું ધ્યાન રાખશે. આમ ભાજપની ચૂંટાયેલી પાંખના કોર્પોરેટર અને પોલીસ વચ્ચેનો વિવાદ ચરમસીમાએ પહોંચ્યો છે.
શહેરના ચાર દરવાજા વિસ્તારમાં રહેતા ચાર દરવાજા વિસ્તારના ભાજપના વોર્ડ મહામંત્રી પ્રતીક શાહ મુખ્ય માર્ગની નજીક આવેલી ગલીમાં રહે છે અને એમના ઘર પાસે વાહન પાર્ક થઈ શકે તેમ ન હોવાથી તેમણે મુખ્ય માર્ગ પર પોતાનું વાહન પાર્ક કર્યું હતું. દરમિયાન પોલીસે તેમની કારનો ફોટો પાડી તેમને ઈ-મેમો ફટકાવ્યો હતો. જે અંગે તેઓએ સ્થાનિક કોર્પેટર સચિન પાટડીયાને ઘટના અંગેની જાણ કરી હતી. ગતરોજ સચિન પાટડીયાએ આ અંગે એક પી.આઈ. સમક્ષ રજૂઆત કરી હતી કે, અહીં રહેતા રહીશોના ઘર પાસેની ગલીમાં જગ્યા ન હોવાથી તેઓ મુખ્ય માર્ગ પર વાહનો પાર્ક કરતા હોય છે તો તમે એમને મેમો કેવી રીતે આપી શકો?
જે અંગે પીઆઇએ જણાવ્યું હતું કે, મુખ્ય માર્ગ પર વાહન પાર્ક કરવો એ ટ્રાફિકના નિયમનો ભંગ હોવાથી તેમના વિરુદ્ધ કાર્યવાહી કરવામાં આવી હશે. આ દરમિયાન પૂર્વ કોર્પોરેટર મિનેશ શાહ પણ અહીં આવી પહોંચ્યા હતા. જે પછી વર્તમાન કોર્પોરેટર, પૂર્વ કોર્પોરેટર અને પીઆઇ વચ્ચે ભારે રકઝક થઈ હતી. જેમાં ભાજપના અન્ય કાર્યકર્તાઓ દિપક કદમ, ચેતન દરજી વગેરે દોડી આવ્યા હતા. જે પૈકી કેટલાકે જણાવ્યું હતું કે, એક તરફ પોલીસે માંડવી દરવાજા પાસે અડધો રસ્તો રોકી પોલીસ ચોકી બનાવી દીધી છે અને તે પછી બેરીકેટ લગાવી દેવામાં આવી છે. જેના કારણે અહીં આવતા વાહનો મુખ્ય માર્ગ પર ઉભા રહે છે. સિટી બસ કે રીક્ષા આવે એ પણ રસ્તાની વચ્ચોવચ મુસાફરોને ઉતારે કે બેસાડે છે અને તેથી ટ્રાફિકનો પ્રશ્ન વધુ જટિલ બને છે. ટ્રાફિક પોલીસ સાંજના પાંચથી સાત દરમિયાન ચાર દરવાજા વિસ્તારમાં રીક્ષા પર પ્રતિબંધ હોવા છતાં અહીં રિક્ષાઓ ફરી રહી છે અને ટ્રાફિક પોલીસ મૂકપ્રેક્ષક બનીને જોયા કરે છે અને કોઈ કાર્યવાહી કરતી નથી. જે પાછળ ટ્રાફિક પોલીસના હપ્તાનું કારણ હોવાનો આક્ષેપ થતા પીઆઇ અકળાયા હતા અને ત્યારબાદ મામલો બિચકયો હતો.
ઉશ્કેરાયેલા પીઆઇએ આ તબક્કે જણાવી દીધું હતું કે, અમારે તમારી કોઈ જરૂર નથી, અમને અમારી કામગીરી કરવા દો. આ દરમિયાન ભારે રકઝક થઈ હતી. સમગ્ર ઘટનાની જાણ જોઈન્ટ સીપી લીના પાટીલને થતા તેઓએ સમગ્ર મામલો થાળે પાડવા માટે ગત સાંજે 5થી 7 દરમિયાન સંખ્યાબંધ રિક્ષાઓ, જે સાંજના પાંચથી સાત દરમિયાન ચાર દરવાજામાં ફરતી હતી તેને, ડીટેઇન કરાવી હતી અને દંડની વસુલાત કરી હતી. પરંતુ આટલેથી મામલો ન અટકતા હવે આજે સાંજથી, આગામી એક અઠવાડિયા સુધી, રોજ અહીંના ભાજપના કાર્યકર્તાઓ પાણીગેટ દરવાજા ખાતે ઉભા રહેશે અને ટ્રાફિક પોલીસ નિયમ મુજબ કાર્યવાહી કરે છે કે નહીં? તે જોશે. ઉપરાંત નડતરરૂપ રીતે ઉભી કરવામાં આવેલ ટ્રાફિક પોલીસ ચોકીને પણ દૂર કરવા ઉચ્ચસ્તરે રજૂઆત કરશે તેમ જાણવા મળ્યું છે.
