આ પણ વાંચો ટ્રેન્ડિંગ સમાચાર
Gujarat Traffic Police Special Drive : ગુજરાતમાં વધતાં જતાં માર્ગ અકસ્માતોની સંખ્યાને ગંભીરતાથી લઈને રાજ્ય પોલીસ વિભાગ દ્વારા આજથી એક વિશેષ ટ્રાફિક ડ્રાઇવનું આયોજન કરવામાં આવ્યું છે. રાજ્યના પોલીસ મહાનિરીક્ષકના આદેશથી અમદાવાદ, વડોદરા, સુરત અને રાજકોટ સહિતના તમામ શહેરો અને જિલ્લાઓમાં આજથી એટલે કે 25 ફેબ્રુઆરી 2026થી 10 માર્ચ 2026 સુધી આ ઝુંબેશ ચલાવવામાં આવશે.
શા માટે લેવાયો આ નિર્ણય?
પોલીસ વિભાગના જણાવ્યા અનુસાર, ગત વર્ષની સરખામણીએ ચાલુ વર્ષે માર્ગ અકસ્માતોમાં નોંધપાત્ર વધારો થયો છે. મોટર વાહન અધિનિયમ હેઠળની જોગવાઈઓના ઉલ્લંઘનને કારણે થતાં આ અકસ્માતોને ડામવા અને ટ્રાફિકના નિયમોનું ચુસ્તપણે પાલન કરાવવા માટે આ 15 દિવસની મેગા ડ્રાઇવનું આયોજન કરાયું છે.
આ 8 બાબતો પર રહેશે પોલીસની ખાસ નજર
ખાસ ડ્રાઇવ દરમિયાન પોલીસ નીચે મુજબના ટ્રાફિક ઉલ્લંઘનો સામે કડક કાર્યવાહી કરી દંડ વસૂલશે:
ડ્રંક એન્ડ ડ્રાઇવ: નશો કરીને વાહન ચલાવનારા સામે કડક કાર્યવાહી.
હેલ્મેટ: ટુ-વ્હીલર ચાલકો દ્વારા હેલ્મેટનો ઉપયોગ ન કરવો.
રોંગ સાઇડ ડ્રાઇવિંગ: ટ્રાફિકના નિયમો વિરુદ્ધ ખોટી દિશામાં વાહન ચલાવવું.
નંબર પ્લેટ: નંબર પ્લેટ વગરના વાહનોનો ઉપયોગ અટકાવવો.
કાળા કાચ: મર્યાદા કરતાં વધુ કાળા કાચ ધરાવતી ગાડીઓ સામે કાર્યવાહી.
LED લાઇટ: વાહનોમાં ગેરકાયદેસર સફેદ LED લાઇટો લગાડવી.
પેસેન્જર કેપેસિટી: મુસાફરોની હેરફેર માટે પરમિટ કરતાં વધુ પેસેન્જરો ભરવા.
ગેરકાયદે પાર્કિંગ: ધોરીમાર્ગો કે જાહેર રસ્તાઓ પર અનધિકૃત વાહન પાર્ક કરવા.
પોલીસ અધિકારીઓને દરરોજની કામગીરીની વિગતો નિયત પત્રકમાં તૈયાર કરી 12 માર્ચ 2026 સુધીમાં ઈ-મેઇલ દ્વારા મોકલી આપવા પણ સૂચના આપવામાં આવી છે. વાહનચાલકોને અપીલ કરવામાં આવે છે કે તેઓ ટ્રાફિકના નિયમોનું પાલન કરે અને પોલીસની આ કામગીરીમાં સહકાર આપે.
