આ પણ વાંચો ટ્રેન્ડિંગ સમાચાર
મુંબઈ : મુંબઈ ઝવેરીબજારમાં આજે સોના- ચાંદીના ભાવ આરંભમાં ઉંચા ખુલ્યા પછી ઘટાડા પર રહ્યા હતા. જોકે બંધ ભાવની સરખામ ણીના સંદર્ભમાં આજે મુંબઈ ચાંદીના ભાવ કિલોના એકંદરે અઢી હજાર વધ્યા હતા જ્યારે સોનાના ભાવ ૧૦ ગ્રામદીઠ રૂ.૨૦૦થી ૨૫૦ ઘટયા હતા. દરમિયાન, વિશ્વબજારમાં આજે સોનાના ભાવ ઔંશના ૫૧૫૬થી ૫૧૫૭ ડોલરથી વધી ઉંચામાં ભાવ ૫૨૧૦ થઈ ૫૧૮૨થી ૫૧૮૩ ડોલર રહ્યાના નિર્દેશો હતા.
મુંબઈ બુલીયન બજારમાં આજે સોનાના ભાવ જીએસટી વગર ૯૯૫ના રૂ.૧૫૮૬૦૩ વાળા રૂ.૧૫૯૧૮૩ ખુલી રૂ.૧૫૮૩૭૧ના મથાળે બંધ રહ્યા હતા જ્યારે ૯૯ના ભાવ રૂ.૧૫૯૨૪૧ વાળા રૂ.૧૫૯૮૨૩ ખુલી રૂ.૧૫૯૦૦૮ બંધ રહ્યા હતા. દરમિયાન, મુંબઈ ચાંદીના ભાવ કિલોના જીએસટી વગર રૂ.૨૫૨૯૧૨થી વધી આરંભમાં રૂ.૨૬૯૩૬૭ ખુલી રૂ.૨૬૫૪૧૭ બંધ રહ્યા હતા. મુંબઈ સોના- ચાંદીમાંં જીએસટી સાથેના ભાવ આ ભાવથી ત્રણ ટકા ઉંચા રહ્યા હતા.
વિશ્વબજારમાં સોના પાછળ આજે ચાંદીના ભાવ ઔંશના ૮૭.૮૦ વાળા ઉછળી ઉંચામાં ભાવ ૯૧.૨૪ થઈ ૯૦.૫૮થી ૯૦.૫૯ ડોલર રહ્યા હતા. વૈશ્વિક ચાંદીના ભાવ આજે ૪ ટકા ઉછળ્યા હતા. વિશ્વબજારમાં ડોલરનો ગ્લોબલ ઈન્ડેક્સ ઘટતાં વૈશ્વિક સોનામાં ફંડો એકટીવ બાયર્સ રહ્યા હતા. વૈશ્વિક ડોલર ઈન્ડેક્સ ઉંચામાં ૯૭.૮૭ તથા નીચામાં ૯૭.૬૪ થઈ ૯૭.૮૧ રહ્યા હતા. વિશ્વબજારમાં આજે પ્લેટીનમના ભાવ ૫થી ૬ ટકા વધ્યા હતા. જ્યારે મુંબઈ બુલીયન બજારમાં પ્લેટીનમના ભાવ ૧૦ ગ્રામના રૂ.૩૦૦૦થી ૩૫૦૦ ઉછળ્યા હતા.
વિશ્વબજારમાં પ્લેટીનમના ભાવ ઔંશના ઉંચામાં ૨૩૦૪ ડોલર થઈ ૨૨૯૫થી ૨૨૯૬ ડોલર રહ્યા હતા. પેલેડીયમના ભાવ ઉંચામાં ૧૮૩૨ થઈ ૧૮૨૫થી ૧૮૨૬ ડોલર રહ્યા હતા. પેલેડીયમના ભાવ આજે બે ટકા વધ્યા હતા જ્યારે વૈશ્વિક કોપરના ભાવ આજે ૦.૫૮ ટકા પ્લસમાં રહ્યા હતા. દરમિયાન, અમદાવાદ ઝવેરીબજારમાં આજે સોનાના ભાવ ૯૯૫ના રૂ.૧૬૪૨૦૦ તથા ૯૯૯ના રૂ.૧૬૪૫૦૦ બોલાતા હતા જ્યારે અમદાવાદ ચાંદીના ભાવ રૂ.૨૬૦૦૦૦ રહ્યા હતા.
દરમિયાન, વિશ્વબજારમાં ક્રૂડતેલના ભાવમાં બેતરફી વધઘટ દેખાઈ હતી. બ્રેન્ટ ક્રૂડના ભાવ બેરલના ઉંચામાં ૭૧.૭૬ તથા નીચામાં ૭૦.૬૨ થઈ ૭૧.૧૧ ડોલર રહ્યા હતા જ્યારે યુએસ ક્રૂડના ભાવ ઉંચામાં ૬૬.૬૦ તથા નીચામાં ૬૫.૪૫ થઈ ૬૫.૮૪ ડોલર રહ્યા હતા. વિશ્વબજારમાં જાપાનની કરન્સી ઘટી બે સપ્તાહ તળીયે ઉતરી હતી. ત્યાં વ્યાજ દરમાં તોળાતો વધારો પાછો ઠેલાઈ રહ્યાના નિર્દેશો મળ્યા હતા. ડોલર સામે ચીનની કરન્સી વધી ત્રણ વર્ષની ટોચે પહોંચી હતી. ચીનની કરન્સી દસ મહિનામાં સાત ટકા ઉછળી છે.
દરમિયાન, મુંબઈ કરન્સી બજારમાં આજે રૂપિયા સામે ડોલરના ભાવરૂ.૯૦.૯૬ વાળા રૂ.૯૦.૯૩ ખુલ્યા પછી નીચામાં ભાવ રૂ.૯૦.૮૪ તથા ઉંચામાં ભાવ રૂ.૯૦.૯૭ થઈ રૂ.૯૦.૯૫ રહ્યા હતા. બ્રિટીશ પાઉન્ડના ભાવ ૧૮ પૈસા વધી રૂ.૧૨૨.૯૭ રહ્યા હતા તથા ઉંચામાં ભાવ રૂ.૧૨૩.૦૩ નોંધાયા હતા. યુરોના ભાવ રૂ.૧૦૭.૨૩ આસપાસ શાંત હતા. જાપાનની કરન્સી રૂપિયા સામે ૦.૪૩ ટકા ઘટી હતી જ્યારે ચીનની કરન્સી ૦.૧૯ ટકા ઉંચકાઈ હતી.
