આ પણ વાંચો ટ્રેન્ડિંગ સમાચાર
અમદાવાદ, સંજીવ રાજપૂત, એબીએનએસ: માનવતાના મૂલ્યોને ઉજાગર કરતી એક ઘટનામાં અમદાવાદ સિવિલ હોસ્પિટલ ખાતે ૨૨૬મું અંગદાન સફળતાપૂર્વક સંપન્ન થયું છે. સાણંદ તાલુકાના જુવાલ ગામના વતની એવા ૫૨(52) વર્ષીય કંચનબેન મોમણભાઈ ગોહિલના પરિવારે લીધેલા ઉમદા નિર્ણયથી આજે ત્રણ જરૂરિયાતમંદ દર્દીઓને નવું જીવન મળવા જઈ રહ્યું છે.
આ સફળ અંગદાન અંગે વિગતો આપતા સિવિલ હોસ્પિટલના તબીબી અધિક્ષક ડો. રાકેશ જોષીએ જણાવ્યું હતું કે, “જ્યારે કોઈ પરિવાર પોતાના સ્વજનને ગુમાવવાના આઘાત વચ્ચે પણ અન્યના જીવનમાં ઉજાસ ફેલાવવા અંગદાનનો નિર્ણય લે છે, ત્યારે તે માનવતાનું સર્વોચ્ચ શિખર ગણાય છે. સિવિલ હોસ્પિટલની ટીમની ૭૨ કલાકની મહેનત અને પરિવારની ઉમદા ભાવનાને કારણે આજે વધુ ત્રણ જરૂરિયાતમંદોને નવજીવન મળ્યું છે.”
ઘટનાની વિગત મુજબ, કંચનબેન ગોહિલ ગત તારીખ ૧૮ જાન્યુઆરીના રોજ બાઈક ઉપરથી પડી જતાં તેમને માથાના ભાગે ગંભીર ઈજાઓ પહોંચી હતી. મગજમાં હેમરેજ થવાને કારણે તેમને પ્રથમ ખાનગી હોસ્પિટલમાં અને ત્યારબાદ વધુ સારવાર અર્થે અમદાવાદ સિવિલ હોસ્પિટલ ખાતે ખસેડવામાં આવ્યા હતા. અહીં સારવાર દરમિયાન ૨૦ જાન્યુઆરીના રોજ ફરજ પરના ડોક્ટરોએ તેમને બ્રેઈનડેડ જાહેર કર્યા હતા.
કંચનબેનની ગંભીર સ્થિતિમાં સિવિલ હોસ્પિટલ અંગદાન ટીમના ડો. ભાવેશ પ્રજાપતિ તેમજ ડો. અભિષેક બારોટે તેમના પરિવારનું કાઉન્સિલિંગ કર્યું હતું. હોસ્પિટલ ખાતે હાજર કંચનબેનના પતિ મોમણભાઈ અને તેમના બે દીકરા અજીતભાઈ અને વિજયભાઈએ માનવતાનો ઉમદા અભિગમ દાખવતા અન્યના જીવન બચાવવા માટે અંગદાનની સંમતિ આપી હતી. આ સંમતિના પરિણામે કંચનબેનનું એક લીવર અને બે કિડનીનું દાન પ્રાપ્ત થયું હતું. ડો. જોષીએ વધુમાં ઉમેર્યું હતું કે આ અંગોનું સિવિલ મેડીસીટી કેમ્પસની જ કિડની હોસ્પિટલના જરૂરિયાતમંદ દર્દીઓમાં પ્રત્યારોપણ કરવામાં આવશે.
અંગદાન ક્ષેત્રે સિવિલ હોસ્પિટલની અત્યાર સુધીની ઐતિહાસિક સિદ્ધિ
સિવિલ હોસ્પિટલમાં અંગદાનની પ્રવૃત્તિ એક મિશન બની ગઈ છે. ડો. રાકેશ જોષીએ હોસ્પિટલના આંકડાકીય પ્રદાન વિશે વાત કરતા જણાવ્યું કે, આજદિન સુધીમાં કુલ ૨૨૬ અંગદાન દ્વારા કુલ ૭૪૯ મહત્વપૂર્ણ અંગો મેળવવામાં સફળતા મળી છે. આ અંગદાનમાં અત્યાર સુધી ૨૦૦ લીવર, ૪૧૬ કિડની, ૧૮ સ્વાદુપિંડ, ૭૩ હૃદય, ૬ હાથ, ૩૪ ફેફસાં અને ૨ નાના આંતરડાંનો સમાવેશ થાય છે.
અંગો ઉપરાંત પેશીઓના દાનમાં પણ સિવિલ હોસ્પિટલ અગ્રેસર રહી છે, જેમાં ૧૭૪ ચક્ષુ તેમજ ૩૪ ચામડીના દાન મળી કુલ ૨૦૮ પેશીઓનું દાન પ્રાપ્ત થયું છે. આમ, સિવિલ હોસ્પિટલ દ્વારા આજદિન સુધીમાં કુલ ૯૫૭ અંગો તેમજ પેશીઓનું દાન મેળવીને તબીબી જગતમાં એક નવી મિશાલ કાયમ કરવામાં આવી છે.
